Búgin Aqordada QR Prezıdenti Nursultan Nazarbaev alǵash ret jarıa túrde elimizdiń jańa Azamattyq-prosessýaldyq kodeksine qol qoıdy. Bul týraly «Qamshy» portaly QazAqparatqa silteme jasap habarlaıdy.

«Búgin men Qazaqstan Respýblıkasynyń jańa Azamattyq-prosessýaldyq kodeksine sizderdiń aldaryńyzda qol qoıaıyn dep otyrmyn. Mundaı rásimdi biz tuńǵysh ret jasap otyrmyz. Sebebi, bul kodekstiń mańyzy el úshin óte zor. Búkil Qazaqstan úshin máni zor», - dedi Elbasy.

Osy rette Memleket basshysy úkimettik emes uıymdar ókilderin, búgingi sharaǵa qatysyp otyrǵan adamdardy jańa Zańnyń mánin halyqqa keńinen jetkizýge shaqyrdy.

«Barsha halqyma aıtarym, jańa Azamattyq-prosessýaldyq kodeks quqyq salasyn túbegeıli jaqsartatyn bolady. Ózderińiz bilesizder, men sáýirde jarıalaǵan «5 reforma», «100 naqty qadam» degen tapsyrma bar. Sol jóninde Parlament jumys istep, 59 zańnamany qabyldaýy qajet. Bul jumys qazir qaýyrt istelip jatyr. Sol zańdardyń ishindegi 16 Zańǵa men qol qoıyp úlgerdim. Qazirgi qol qoıaıyn dep otyrǵanym 17-shi zań. Bul jospardyń mańyzdy baǵyttarynyń biri zańnyń ústemdigin qamtamasyz etý degen tártip bar. Jańa kodeksti qabyldaý arqyly osy mindetti oryndaýǵa kirisemiz», - dedi QR Prezıdenti.