Qazaqstan Respýblıkasy Ulttyq ulanynyń «Búrkit» arnaıy maqsattaǵy jasaǵynyń jaýyngerleri arnaıy jasaqtyń aıyrym belgisi «Kúreń beret» pen «Búrkit» keýde belgisin taǵý quqyǵyn ıelený úshin synaq tapsyrdy. Bul týraly «Qamshy» portaly Ulttyq ulannyń baspasóz qyzmetine silteme jasap habarlaıdy.

Bıyl on besinshi ret ótken synaqqa qatysýǵa barlyǵy 92 áskerı qyzmetshi nıet bildirse, aldyn ala tekseristerden soń olardyń sany edáýir qysqaryp, 70 shaqyrymdyq synaq baǵytyna barlyǵy 67 úmitker shyqqan. Bir jarym táýlik ishinde úmitkerler 16 túrli normatıv tapsyryp, kúshterin synady. Oonyń arasynda dene daıyndyǵy, atý, ınjenerlik-topografıalyq daıyndyq, tóbesinen oq borap, irgesinde granata jarylǵan kedergiler jolaǵynan ótý  syndy birneshe baǵyttaǵy normatıvterden quraldy. Baby men baǵy qatar shaýyp, aýyr synnan súrinbeı ótkender aqtyq synaq - qoıan-qoltyq tóbeleste kezdesti.

Synaq sońynda 13 jaýynger barlyq synnan súrinbeı ótip, ózderiniń shyn myqty ekendikterin dáleldedi. Olarǵa Ulttyq ulan Bas qolbasshysynyń buıryǵymen arnaıy jasaqtyń aıyrym belgisi kúreń beret pen arnaıy keýde belgisi tabystaldy. Sonymen qatar, arnaıy operasıalar kezinde erlik pen batyldyq úlgisin kórsetkeni úshin Ulttyq ulan kúreń beret ıeleri ortalyq keńesiniń qoldaýymen İİM «Suńqar» arnaıy jasaǵynyń qyzmetkerleri polısıa maıory Pernehan Júsipálıev pen polısıa kapıtany Andreı Volkovqa da atalǵan aıyrym belgileri tapsyryldy.