Sońǵy 5 jylda elimizde ana ólimi 3 esege, náreste ólimi 1,5 esege azaıdy. Mundaı málimet QR Densaýlyq saqtaý jáne áleýmettik damý birinshi vıse-mınıstri Salıdat Qaıyrbekovanyń Jambyl oblysyna jasaǵan jumys sapary barysynda jarıa etildi, dep habarlaıdy BNews.kz.
Búgin QR Densaýlyq saqtaý jáne áleýmettik damý birinshi vıse-mınıstri S.Qaıyrbekova Jambyl oblysyna jumys sapary sheńberinde Taraz qalasynda ana men náresteler ólimin, qan aınalymy júıesi aýrýlarynan bolatyn ólim-jitimdi azaıtý úshin jedel sharalar qabyldaý jónindegi respýblıkalyq shtabtyń kóshpeli otyrysyn ótkizdi.
Vedomstvonyń baspasóz qyzmetinen habarlaǵandaı, jıynǵa elimizdiń ońtústik óńirleri: Qyzylorda, Ońtústik Qazaqstan, Jambyl oblystary jáne Almaty qalasynyń densaýlyq saqtaý basqarmalarynyń jetekshileri, Akýsherlik, gınekologıa jáne perınotologıa ǵylymı ortalyǵy, Pedıatrıa jáne balalar hırýrgıasy ǵylymı ortalyǵy jáne Qazaq medısınalyq úzdiksiz bilim berý ýnıversıtetiniń basshylary jınaldy. Qalǵan óńirler selektorlyq rejimde qatysty.
Shtab otyrysynda Qyzylorda, Ońtústik Qazaqstan jáne Jambyl oblystarynda oryn alǵan ana jáne náreste ólimi jaǵdaılary qaraldy.
Baıandama jasaýshylar 2014 jylǵy 11 aıdyń qorytyndysynda elimizde týylǵan balalardyń jartysynan astamy jáne analar ólim-jitiminiń 55,5%-y ońtústik óńirlerdiń úlesine tıetinin alǵa tartty.
Ana ólim-jitimi oqıǵalary oryn alǵan óńirler jetekshileri, perınataldyq ortalyqtar men perzenthanalardyń bas dárigerleri medısınalyq kómektiń qoljetimdiligi men sapasyn arttyrý baǵytynda jasalyp jatqan is-sharalar týraly baıandady.
Salıdat Qaıyrbekova BUU Myńjyldyqtyń damý maqsattaryna jetý jáne álemniń eń damyǵan 30 eliniń qataryna kirý densaýlyq saqtaý júıesi úshin basym baǵyttardyń biri ekenin alǵa tartty. Al bul salada ana men bala densaýlyǵyn saqtaý basty kórsetkishterdiń biri. Osy oraıda ol «Densaýlyq saqtaý jáne áleýmettik damý mınıstrliginiń shaqyrýymen, qazir Qazaqstanda ana ólim-jitimi kórsetkishterin baǵalaý úshin Dúnıejúzilik densaýlyq saqtaý uıymynyń halyqaralyq táýelsiz sarapshylar toby jumys istep jatyr»,-dedi.
Birinshi vıse-mınıstr sońǵy jyldary elimizde bul salada aýqymdy jumystar atqarylyp, kórsetkishter eleýli túrde jaqsarǵanyn atap ótti. Perzenthanalar men balalardy emdeý uıymdaryn materıaldyq-tehnıkalyq jabdyqtaý jaqsaryp, tıimdi halyqaralyq tehnologıalar, dıagnostıkalaý men emdeý standarttary men hattamalary engizilýde.
Ana men bala densaýlyǵyn qorǵaý qyzmetine jasalǵan saraptama alǵashqy kómek býyny belsendi jumys isteı bastaǵanyn kórsetken. Táýekeli joǵary áıelderdi ýaqtyly emdeýge jatqyzý barlyq jerde jolǵa qoıyldy.
Sonymen qatar, elimizde balalar men analar óliminiń tómendeýine júkti áıelderdi táýlik boıy monıtorıńileý júıesiniń engizilýi jáne tarıfke engizilgen qarajat esebinen dárigerlerdiń biliktiligin arttyrý oń septigin tıgizdi.
Shtab tóraıymy bekitilgen standarttar men hattamalardy qatań saqtaýǵa, barlyq mamandardy úzdiksiz jáne sapaly oqytýǵa shaqyrdy. Óıtkeni, mamandardyń biliktiligin arttyrýǵa bólingen qarajat medısınalyq uıymdardyń ózderine berilgen, tıisinshe olar óz mamandaryn qaıda jáne qalaı oqytý kerektigin derbes sheshedi. Sondaı-aq, turǵyndardy aqparattandyrý deńgeıin kóterý kerek.
Sońǵy 5 jylda elimizde ana ólimi 3 esege, náreste ólimi 1,5 esege azaıdy. «Qazaqstandyqtardyń ortama ómir súrý uzaqtyǵyn arttyrýǵa jáne ólim-jitimdi azaıtýǵa múmkindikterimiz ben áleýetimiz bar. Eń aldymen, ol sektoraralyq ózara is-árekettestikke qatysty, óıtkeni, adam densaýlyǵy 70-80%-y onyń ómir súrý salty men qorshaǵan ortasyna baılanysty»-dedi birinshi vıse-mınıstr.
Jumys sapary aıasynda Salıdat Qaıyrbekova birqatar medısınalyq uıymdarda: oblystyq balalar aýrýhanasynda, oblystyq perınataldyq ortalyqta, № 1, 2, 4, 5, 7, 9 emhanalarda jáne oblystyq jáne qalalyq balalar aýrýhanasynda bolyp, medısınalyq qyzmetkerlermen jáne azamattarmen kezdesti.
Derekkóz: Bı-nús
