Shymkentte oblys ákimi janyndaǵy áıelder isteri jáne otbasylyq-demografıalyq saıasat jónindegi komısıanyń keńeıtilgen otyrysy ótti. Jıynda qaralǵan máselelerdiń alǵashqysy komısıanyń jyl basynan beri atqarǵan jumysy týraly boldy. Sonyń ishinde Túrkistan qalasy men Tólebı aýdandaryndaǵy jaǵdaıǵa erekshe mán berildi. Aýdan men qala ákimderiniń dál osy salaǵa qatysty orynbasarlary jyl basynan beri júzege asyrǵan jumystary týraly esepterin qolyndaǵy qaǵazǵa jazylǵan jazýdy sýdyrlatyp oqyp berýden ary asa almady. Tipti komısıa tóraǵasy men músheleri tarapynan qoıylǵan qosymsha suraqtardy buryn-sońdy estimegen bolýy kerek, mardymdy jaýaptary daıyn bolmaı shyqty. Aqyry sońynda baıandamashylarǵa qoıylǵan suraqtarǵa komısıa músheleriniń biri aralasty. Máselen, Túrkistandaǵy bala ólimi byltyrǵy jylmen salystyrǵanda birneshe paıyzǵa artqan. Alaıda túrkistandyq sheneýnik esebindegi statısıka basqa. Bul problemanyń ózindik sebebi de bar bolyp shyqty. Oblystyq densaýlyq saqtaý basqarmasy ókiliniń aıtýynsha, Túrkistandaǵy perzenthana tek jergilikti áıelderge emes, kórshiles jatqan Sozaq, Kentaý men Otyrardan kelgenderge de qyzmet kórsetedi eken. Al statısıka osy úsh aýdan, qaladaǵy kórsetkish.
Bul aqparatty tyńdaǵan komısıa tóraǵasy mınıstrliktiń talabyna saı ár medısına mekemesiniń óz talaptary, naqtyraǵy qyzmet kórsetetin halyq sany bekitiletinin jáne bul ólim bola bersin degen sóz emestigin basa aıtty. Bar máseleni densaýlyq saqtaý qyzmetkerlerine ysyryp qoıǵysy kelgen baıandamashy Dáýren Rahymuly ólimniń aldyn alý boıynsha bılik tarapynan atqarylyp jatqan jumystardyń ózin aıtyp bere almady. «Bala óliminiń negizgi sebebi ana densaýlyǵynyń nashar bolýynan eken. Biraq, bizde otbasyny, bala súıýdi josparlaý degen bolýy kerek qoı. Sondyqtan da ákimdik tarapynan dál osy máselege qatysty halyqqa túsindirý jumystaryn uıymdastyryp otyrý qajet», - dedi E.Aıtahanov.
Komısıa otyrysynda munan soń otbasylyq zorlyq-zombylyq, otbasy qurýdyń mańyzdylyǵy men berekeni saqtaýdyń joldary, bala tárbıesinde ata-ananyń jaýaptylyǵy týraly sóz qozǵaldy. Al atqarylǵan jumystarǵa komısıa tómen baǵa berdi. Otyrys sońynda aýdan, qala komısıa tóraǵalaryna jumysty jandandyrý kerektigi, jergilikti bılik bolsa, barlyq jumysty uıymdastyrý qajet ekendigi aıtyldy. Jyldyń sońynda nátıje bolmasa, birazy qyzmetpen qosh aıtysýy múmkin.
Aıta keteıik, OQO ákiminiń orynbasary Erlan Aıtahanov óńir basshysy janyndaǵy áıelder isteri jáne otbasylyq-demografıalyq saıasat jónindegi komısıasyna tóraǵa bolyp taǵaıyndalǵanyna eki aptadan asty. Buǵan deıin bul qyzmetti áriptesi Sáken Qanybekov atqarǵan.
Derekkóz: http://rgmedia.kz/
