Bir jasqa deıingi bala kútimine baılanysty jumysynan aıyrylǵan áıelderge memleket esebinen sýbsıdıa beriledi. Iá, ıá, qatelesken joqsyz. Bul aqparatty alǵash esitigemizde biz de tańyrqap qaldyq. Sýbsıadıa degende kóz-kelgen jannyń oıyna aýylsharýashylyq salasy oralatyny bar. Sondyqtan da, munyń qandaı sýbsıdıa ekenin bilýge asyǵyp, memlekettik zeınetaqy tóleý ortalyǵy OQO boıynsha fılıalynyń bastyǵy Saǵıra Aıtanaevaǵa jolyqtyq.
memlekettik zeınetaqy tóleý ortalyǵy OQO boıynsha fılıalynyń bastyǵy Saǵıra Aıtanaeva
Memlekettik zeınetaqy tóleý ortalyǵy OQO boıynsha fılıalynyń bastyǵy Saǵıra Aıtanaeva
– Saǵıra Ermekbaıqyzy, bala bir jasqa tolǵanǵa deıin onyń kútimine baılanysty tabysynan aıyrylǵan áıelderge memleket esebinen sýbsıdıa beriledi degen aqpar qanshalyqty ras?
– Bir jasqa deıingi bala kútimine baılanysty jumysynan aıyrylǵan áıelderdiń zeınetaqy qoryndaǵy mindetti jarnalary sýbsıdıalanady. Sýbsıdıalaý – Zeınetaqymen qamsyzdandyrý týraly Zańǵa sáıkes, Biryńǵaı jınaqtaýshy zeınetaqy qorynan júzege asyrylady.
Zeınetaqymen qamsyzdandyrý týraly Zańnamaǵa sáıkes İ jáne İİ toptardaǵy múgedekter men múgedektigi merzimsiz belgilengen jandar úshin mindetti zeınetaqy jarnalaryn sýbsıdıalaý áleýmettik tólem somasynan mindetti zeınetaqy jarnalaryn ustaýǵa onyń kelisimi bolǵan kezde ǵana júzege asyrylady. Alaıda, bul áıeldiń qolyna aqsha beriledi nemese esepshotyna aqsha aýdarylady degen sóz emes.
– Mindetti zeınetaqy jarnalarynyń aı saıynǵy búdjettik sýbsıdıasynyń mólsheri qalaı anyqtalady?
– Mindetti zeınetaqy jarnalarynyń aı saıynǵy búdjettik sýbsıdıasynyń mólsheri, BJZQ aýdarylǵan ortasha aılyq tabys mólsheri men bala bir jasqa tolǵanǵa deıin onyń kútimine baılanysty tabysynan aıyrylǵan jaǵdaıda tólenetin áleýmettik tólemnen ustalatyn mindetti zeınetaqy jarnalarynyń somasy arasyndaǵy aıyrmasymen aıqyndalady.
Máselen, áıeldiń 24 aıǵa shaqqanda ortasha aılyq tabysy 100 000 teńgeni quraıdy delik. Iaǵnı, aı saıyn onyń aılyǵynan BJZQ-na 10%-y jarna aýdarylady. Bir jasqa deıin bala kútimine baılanysy tabysynan aıyrylǵandyqtan onyń zeınetaqy qoryna eshqandaı aýdarymdar júrgizilmeıdi. Alaıda, ol bir jasqa deıingi bala kútimi úshin memlekettik áleýmettik saqtandyrý qorynan aı saıyn áleýmettik tólem alyp turady. Bizdiń jaǵdaıda onyń somasy 40000 teńge bolmaq. Taǵaıyndalǵan somanyń 10%-y, ıaǵnı 4000 teńgesi BJZQ-daǵy shotqa túsedi. Eger de ol bala bir jasqa tolǵanǵa deıin onyń kútimine baılanysty tabysynan aıyrylmaǵan jaǵdaıda, onyń bastapqydaǵy tabysynan 10 000 teńge kóleminde zeınetaqy jarnalary ustalýy tıis bolatyn. Alaıda, onyń arasynda 6000 teńge kóleminde aıyrma shyǵyp tur. Soǵan sáıkes, aıyrmasyn memleket óz tarapynan Respýblıkalyq búdjet qarajaty esebinen sýbsıdıa túrinde tólep beredi.
– Mindetti zeınetaqy jarnalaryn sýbsıdıalaý barysy qaı merzimge deıin júzege asyrylady?
– Mindetti zeınetaqy jarnalaryn sýbsıdıalaý balanyń týý týraly kýáliginde kórsetilgen balanyń týǵan kúninen bastap, al balany asyrap alǵan jáne ata-anasynyń qamqorlyǵynsyz qalǵan bir jasqa deıingi balaǵa qamqorshylyq taǵaıyndalǵan jaǵdaılarda balany asyrap alý týraly sot sheshimi zańdy kúshine engen kúninen bastap nemese qorǵanshy taǵaıyndalǵan kúninen bastap, bala bir jasqa tolǵan kúndi qosa alǵan kúnge deıin júrgiziledi.
– Qandaı jaǵdaılarda sýbsıdıalaý toqtatylady?
Eger:
Áleýmettik tólemdi alýshynyń zeınetaqy qoryna jumys berýshi tarapynan 10 paıyz mindetti zeınetaqy jarnalaryn aýdarý faktisi anyqtalsa;
Qazaqstan Respýblıkasynyń aýmaǵynan tys jerge turaqty turýǵa ketý faktisi anyqtalsa;
Qaıtys bolsa;
Sheteldiktiń nemese azamattyǵy joq adamnyń jeke basyn kýálandyratyn qujattyń qoldanylý merzimi ótse;
Bosatylǵan jáne shettetilgen qamqorshylar týraly málimetter kelip túskende ýákiletti organnyń sheshiminiń negizinde sýbsıdıalaýǵa jatatyn mindetti zeınetaqy jarnalaryn aýdarý toqtatylady.
Aıtpaqshy, qordan bala bir jasqa tolǵanǵa deıin onyń kútimine baılanysty tabysynan aıyrylǵan jaǵdaıda tólenetin áleýmettik tólemdi alýshyǵa jumys berýshiniń esebinen 10 paıyz mindetti zeınetaqy jarnalaryn aýdarý faktisi anyqtalǵanda sýbsıdıalaný toqtatylatynyn aıttyq. Alaıda mindetti zeınetaqy jarnalary birjolǵy bolyp, alýshy rasymen bala kútimine sáıkes tabyssyz otyrǵan bolsa, ortalyq bólimshege jumys ornynan bekitilgen nysandaǵy (qosymsha №8) anyqtamany tapsyrýy qajet. Jumys istemeıtindigi jónindegi anyqtamany tapsyrǵan soń, sýbsıdıalaý qaıta jańǵyrtylady.
– Ýaqyt bólip, túsindirip bergenińizge rahmet.
Derekkóz: http://kazrabat.kz/
