El arasynda áleýmettik jelini qoldaný deńgeıiniń artýyna baılanysty nebir jańa qubylystar paıda bolýda. Adamdardyń ózin-ózi sýretke túsirip, jelige salatyn «selfı» dástúrine qatysty halyq arasynda neshe alýan pikir bar. Bireýler «Buda turǵan eshteńe joq» dep qoldaý tanytsa, endi bir kisiler «Ózin-ózi sheksiz jaqsy kórýdiń, narsısızm belgisi» dep aıyptaýda.

Selfıdiń tóńireginde birjaqty pikirge kele almaı júrgende, áleýmettik jeli qoldanýshylary arasynda «belfı» degen taǵy bir qylyq shyǵyp, qyzý talqyǵa túsýde. Joǵaryda aıtylǵan selfıge qatysty eki jaqty pikir bolsa, bul belfıdi aıyptaýshylar kóp. Alaıda, osy qubylysty áleýmettik jelidegi ózinshe bir dástúrge aınaldyryp jatqandar da jetip artylady.

Sonymen, «Belfı» degen ne? «Belfı» aǵylshyn tilindegi butt (bókse) jáne selfie (aýdarmany qajet etpeıtin sóz) degen eki sózdiń qosylýynan týǵan uǵym. Iaǵnı, óz bóksesin sýretke túsirý. Belfıge júginetinderdiń kóbi bultyńdaǵan bóksesin jarnamalaýǵa qumar jandar. Óz atymen aıtqanda – qyzdar.

Sondaı-aq, ǵalamtorda jumsaq dene múshesiniń barlyq sýretterin de osy ataýmen atap júrgender bar.

Iaǵnı, onsyz da kún sanap jutań tartyp bara jatqan ar, abyroı, ıba men uıat degen adamı qundylyqtar osy «belfıdiń» kesirinen kelmeske ketetin túri bar. Instagramm jelisinde selfı dástúrin nasıhattaýǵa otandyq óner juldyzdary men basqa da tanymal tulǵalar aıtarlyqtaı úles qosty. Úlken-úlken konsertterden bastap, toı-tomalaq, ár alýan bas qosýlardaǵy sýretterin jarıalaý qazaqstandyq juldyzdar úshin úırenshikti jaǵdaıǵa aınaldy. Endigi kezek belfıge kelip júrmesin dep tileıik.