Qaraǵandy oblystyq sotynda «Ahmetov isi» boıynsha «Topar jylyjaılaryna» qatysty jetinshi epızod boıynsha kýágerlerden jaýap alynýda. Aıtarlyǵy, sotqa jaýap berýge shaqyrylǵan kýágerlerdiń barlyǵy «Topar holdıńtik kompanıasy» JSHS-niń ıesi Serik Ahmetovtiń ózi bolǵanyn habarlady. 6 qarashadaǵy sot otyrysynda kúdikti Ǵumar Raqymjanovtyń kómekshisi Ernar Nurkeevten jaýap alyndy. Ol 2014 jyly tergeý organdarynyń tekseristeri bastalǵan kezde «Topar holdıńtik kompanıasynyń» quramyna kiretin kásiporyndardyń formaldy quryltaıshylarynyń basqosýy bolǵany týraly áńgimeledi.
Buǵan deıin sotta túsinik bergen «Topar jylyjaılary» JSHS-niń dırektory Aleksandr Zabırov 2014 jyldyń kúzinde Qaraǵandy oblysy ákiminiń keńesshisi Ǵ. Raqymjanovtyń kómekshisiniń qala syrtyndaǵy úıinde jınalys bolǵanyn habarlaǵan-dy. Keıinirek sotta A. Zabırovtyń osy sózin kýáger Elena Vechkınzova da rastady. «Bul oqıǵa 2014 jyldyń qazan aıynda bolǵan. Maǵan Raqymjanovtyń ózi ne kómekshisi telefon soǵyp, barlyq kásiporyndardyń jetekshilerine basqosý týraly habarlaýdy tapsyrdy. Vıshnevka (qazirgi ataýy Arshaly) kentindegi jer úılerdiń birinde kezdestik. Estýimshe, ol Raqymjanovtyń kómekshisiniń úıi eken. Sol jerde bir-birimizben jaqynyraq tanysyp, ár kompanıanyń jaǵdaıyn talqyladyq»,- dedi ol 4 qarashadaǵy sot otyrysynda.
Aldyńǵy eki kýágerdiń sottaǵy sózin Ǵ. Raqymjanovtyń kómekshisi Ernar Nurkeev te rastady. Ol bolǵan oqıǵany bylaısha áńgimeledi: «Bul oqıǵa shamamen osydan bir jyl buryn bolǵan. Jumystan keıin men, júrgizýshi jáne Ǵ. Raqymjanov úsheýmiz S. Ahmetovtiń Telman kentindegi úıine bardyq. Júrgizýshi ekeýmiz kóliktiń ishinde qaldyq. Raqymjanov úıge kirip ketti de, bir saǵattan keıin shyqty. Biz kelgen jolymyzban keri qaıttyq. Jol ústinde Raqymjanov maǵan jınalys ótkizetin jer tabý qajettigin aıtty. Erteńine men birneshe konferens-zaldardy usyndym. Biraq ol bárinen bas tartyp, bólmeni qala syrtynan izdeýimdi ótindi. Sol kezde oıyma Arshaly kentindegi áke-sheshemniń úıi túse ketti. Raqymjanov ta buǵan birden kelisti. Sóıtti de maǵan kezdesýge Zabırovty, Vechkınzovany, Mushtaqovty, Shımpfti jáne taǵy basqalardy shaqyrýdy tapsyrdy. Men bárine habarlasyp, bas qosatyn jerdiń meken-jaıyn aıttym. Sol kúni túske taman atalǵan adamdardyń barlyǵy áke-sheshemniń úıinde bas qosty. Jınalys tórdegi bólmede ótti. Olar esikti jaýyp alyp, 1,5-2 saǵat otyrdy. Áńgimeniń ne jóninde bolǵanyn estigen joqpyn».
Sondaı-aq Ernar Nurkeev sotqa bergen túsiniginde «Topar holdıńtik kompanıasy» JSHS-niń kásiporyndary óndirgen ónimderdi Premer-Mınıstri Serik Ahmetovtiń úıine ózi birneshe ret jetkizgeni týraly ashyp aıtty. 2013 jyldyń basynda Ǵ. Raqymjanov oǵan Ǵ. Mataevtyń júrgizýshisi Álibektiń telefonynyń nómirin beredi. Ernar «Topardan» shyǵarylyp, aq paketterge salynǵan qıarlar men qyzanaqtardy Álibek arqyly Ǵ. Mataevtyń jáne S. Ahmetovtiń úıine jiberip turǵan. «Men únemi Álibekpen telefony arqyly habarlasyp, osy paketterdi berip otyrdym. Keı kezderi onyń ýaqyty bolmaǵanda S. Ahmetovtiń júrgizýshisi Qýandyqtyń ózine aparatynmyn. Álgi ónimderdi Mataevtyń úıine jáne Telman kentindegi Ahmetovtiń de úıine aparǵan kezderim boldy. Keıbir qıarlar men qyzanaqtardy taldaý jasaýǵa alyp otyratyn»,- dep túsindirdi E. Nurkeev.
Ámına BÁKİR
