Prezıdent Nursultan Nazarbaev usynǵan «5 ıns­tı­týttyq reformany júzege asyrýdaǵy 100 naqty qa­dam» josparyn talqylaý maqsatynda Semeıde arnaıy jıyn ótti. Jıynǵa qalalyq ishki saıasat bóliminiń basshysy Aıdar Sadyrbaev, qala ákimi apparatynyń memlekettik-quqyqtyq jumystar bóliminiń basshysy Serjan Ázbergenov, Semeı qalasy № 2 sotynyń sýdıasy Janat Ábenova jáne memlekettik qyzmetkerler men sot salasynyń qyzmetkerleri qatysty.
Jıynnyń basty taqyryby strategıalyq qujattyń 1-2 taraýynda belgilengen kási­bı memlekettik apparatty qurý men zańnyń ústemdigin qam­tamasyz etý jóninde boldy. S.Áz­­­bergenov aıtyp ótkendeı, Ult jos­parynyń alǵashqy 15 qadamynda memlekettik qyz­metkerler korpýsyn kásibı ári av­to­nomıaly etýge basymdylyq berilgen. Iaǵnı, aldaǵy ýaqytta memlekettik qyzmetke qabyldaý úderisi jańǵyryp, úmitkerler óz jumystaryn tómengi satydan bas­taıtyn bolady. Elbasy aldaǵy Qazaqstannyń damý jolyn saılaý aldyndaǵy bes reformamen, sol reformalar aıasynda júzege asatyn 100 naqty qadammen baı­lanystyrdy. Aldymen bes reformaǵa kelsek, bul másele «Nur Otan» partıasynyń sesıasynda Elbasynyń saılaý­aldy baǵdarlamasy retinde jarıalanǵan bolatyn.
«Reformalar jospary, birin­shiden, álemdegi búgingi turaq­syzdyq jaǵdaıynda halyqtyń qaýipsizdigin, ekinshiden, keń aý­qymdy jańǵyrtýlardy qam­tamasyz etedi. Táýelsizdik al­­ǵan alǵashqy jyldary egemen memlekettiń negizderi qalandy. Bul memleketti qalyptastyrýdyń alǵashqy ke­zeńi boldy. Osydan keıin biz qalyptasqan memlekettiń jolynan óttik, bul ekinshi kezeń edi. Qazir úlken reformalar bastalyp jatyr, biz máńgilik elge jol salamyz. Bul bizdiń memlekettik qurylystyń úshinshi kezeńi bolady», degen edi Elbasy reformalar josparyna túsinikteme bere otyryp. Osy saılaýaldy tuǵyr­namanyń mańyzdylyǵyna Memleket basshysy ulyqtaý rásiminde de nazar buryp, qaıta saılanǵan Prezıdent retinde eń birinshi kezekte Jańǵyrtý jónindegi ulttyq komısıa qura­tynyn jetkizgen-tin», dedi S.Ázbergenov.
Búginde elimizde sot salasyn jetildirýge baılanys­ty kóptegen is-sharalardyń atqa­ry­lyp jatqany belgili. Osy oraıda sýdıalardyń esep berý tártibin kúsheıtý; sýdıalardyń ja­ńa etıkalyq kodeksin jasaý jáne basqa da máseleler Ult jos­parynyń 19-qadamynda kórsetilip otyrǵanyn aıta ket­kenimiz jón. Qujattyń 20, 21, 22-qadamdary sot salasyna arnalǵan. Osy rette Semeı qalasy №2 sotynyń sýdıasy Janat Ábenova azamattardyń sot tóreligine qoljetimdiligin art­­tyrý úshin sot júıesi ınstansıalary ońtaılanatyndyǵyn baıan­dady. Naqtyraq aıtqanda, bes satyly sot júıesinen úsh deńgeıli tórelik tetigine kóshý joldary qarastyrylmaq. Budan ózge, sýdıa laýazymyna úmitkerler saraptalyp, biliktilik talaptary kúsheıtiletin bolady. Endi sýdıa qyzmetine taǵaıyndalý úshin synǵa túsetin azamattardyń 5 jyldyq jumys tájirıbesi bolýy mindet, dedi J.Ábenova.

Derekkóz: Egemen Qazaqstan