ASTANA. 9 qarasha. 2015 jyldyń 29 qazanynda Memleket basshysy «Qazaqstan Respýblıkasynyń keıbir zańnamalyq aktilerine quqyq qorǵaý organdarynyń qyzmetin jáne quqyq qorǵaý qyzmetin ótkerý tártibin jetildirý máseleleri boıynsha ózgerister men tolyqtyrýlar engizý týraly» Zańǵa qol qoıdy. Bul týraly Bas prokýratýranyń baspasóz qyzmeti habarlady.
Zań «Memleket basshysynyń bes ınstıtýsıonaldyq reformany iske asyrý jónindegi Ult jospary – 100 qadamdy», sondaı-aq Qazaqstan Respýblıkasy Prezıdentiniń 2013 jylǵy 31 jeltoqsandaǵy №720 Jarlyǵymen maquldanǵan Quqyq qorǵaý júıesin odan ári jańǵyrtýdyń 2014-2020 jyldarǵa arnalǵan memlekettik baǵdarlamasyn jáne Quqyq qorǵaý organdarynyń kadr saıasaty tujyrymyn iske asyrý maqsatynda ázirlengen.
Zańmen jekelegen zańnamalyq aktilerge túzetýler engiziledi.
«Prokýratýra týraly» Zańǵa Memleket basshysynyń 2015 jylǵy 4 mamyrdaǵy № 15 Jarlyǵymen qurylǵan Bas prokýratýra janyndaǵy Quqyq qorǵaý organdary akademıasynyń qyzmetin reglamentteý boıynsha tolyqtyrýlar engizilgen.
Akademıa qyzmetiniń negizgi baǵyttary retinde quqyq qorǵaý organdary qyzmetkerleriniń, onyń ishinde Quqyq qorǵaý organdary basshylyǵynyń prezıdenttik rezervinde turǵan qyzmetkerlerdiń kásibı deńgeıin arttyrý, quqyq qorǵaý qyzmeti salasyndaǵy vedomstvoaralyq ǵylymı zertteýler júrgizý jáne olardy úılestirý, sondaı-aq joǵary oqý ornynan keıingi bilim berý baǵdarlamalaryn iske asyrý aıqyndalǵan.
«Quqyq qorǵaý qyzmeti týraly» Zańǵa engizilgen túzetýler quqyq qorǵaý júıesin kadrlyq qamsyzdandyrýdyń quqyqtyq bazasyn jetildiredi. «Kadrlyq boljam», «kadrlyq josparlaý», «básekege qabilettilik kórsetkishi», «moraldy-psıhologıalyq jaǵdaı» «rotasıany josparlaý» sekildi jáne basqa da novelalar engiziledi.
Qyzmetke qabyldanǵan jas qyzmetkerler arnaıy baǵdarlama boıynsha daıyndyqtan ótetin bolady. Bul olardyń quqyq qorǵaý qyzmetine beıimdelýi, kásibı qalyptasýy jáne júktelgen mindetterdi sapaly oryndaý qasıetteriniń damýy úshin qajet. Zańmen sondaı-aq tálimgerlik ınstıtýty bekitiledi.
Quqyq qorǵaý qyzmetine kandıdattardyń jáne rezervtegilerdiń vedimistik derekqoryn qurý qarastyrylady. Qol jetkizgen nátıjelerge qaraı jalaqy tóleýdiń dıferensıasıasyna negizdelgen yntalandyrý júıesi engiziledi.
Tártiptik teris qylyqtardyń aýyrlyǵyn baǵalaý júıesin jáne tártiptik jaýapkershilik qalyptastyrý tártibin Memleket basshysy aıqyndaıtyn bolady.
2014 jyly memlekettik basqarýdy reformalaý barysynda qurylǵan Sybaılas jemqorlyqqa qarsy qyzmet pen Ekonomıkalyq tergeý qyzmetine Qazaqstan Respýblıkasynyń zańnamasynda kózdelgen tártipte ýaqytsha ustaý ızolátorlaryn, tergeý ızolátorlaryn paıdalaný quqyǵy beriledi.
Úsh jasqa deıingi bala kútimi boıynsha demalystaǵy quqyq qorǵaý organdarynyń qyzmetkerlerin áleýmettik qorǵaý máselesi naqtylandy.
Endi osyndaı demalysta bolý kezeńi quqyq qorǵaý qyzmetindegi eńbek ótiline, arnaýly ataq, synyptyq shen berý nemese biliktilik synybyn belgileý úshin eńbek sińirgen jyldarǵa esepteletin bolady.
«Azamattyq qorǵaý týraly» Zańǵa engizilgen túzetýlermen İshki ister mınıstrligine Arnaýly ataqtar, biliktilik synyptary beriletin órtke qarsy qyzmet, memlekettik feldegerlik qyzmet laýazymdarynyń, sondaı-aq atalǵan qyzmetter sanynyń normatıvteriniń tizimin bekitý quqyǵy beriledi. Budan basqa, atalǵan qyzmetterdiń qyzmetkerlerin nysandyq kıimmen jáne arnaýly kıim-keshekpen qamtamasyz etý máseleleri retteldi.
Qabyldanǵan Zańmen quqyq qorǵaý organdaryna turǵyndardan satyp alynǵan tehnıkalyq aqaýsyz jáne paıdalanýǵa jaramdy travmatıkalyq áser beretin uńǵysyz atys qarýy men gaz qarýyn berý tártibin bekitýge Úkimettiń quzireti kózdelgen.
Derekkóz: egemen Qazaqstan
