AQTÓBE. 9 qarasha. Aqtóbede bir kúnde eki birdeı balabaqsha paıdalanýǵa berildi. Bul týraly egemen.kz habarlady.
«Shattyq» pen «Dýman» balabaqshalarynda 400-ge jýyq búldirshin tárbıelenetin bolady. «Zarechnyı-1» shaǵyn aýdanynda boı kótergen №48 «Shattyq» balabaqshasynyń ashylý saltanatyna qatysqan qala ákimi Bekbol Saǵyn turǵyndardy ata-analardyń ıgiligi úshin paıdalanýǵa berilgen áleýmettik nysannyń ashylýymen quttyqtap, jyly lebizin bildirdi.
Ol Elbasynyń tapsyrmasymen Aqtóbede taǵy da bir balabaqsha paıdalanýǵa berilgenin, «Máńgilik El» bolamyz dep aldyna úlken murat qoıǵan memleketimizde jas urpaqtyń tárbıesine úlken mańyz berilip otyrǵanyn jetkizdi. Qazaqtyń uly jazýshysy Muhtar Áýezovtiń «El bolamyn deseń, besigińdi túze!» degen ataly sózin tilge tıek ete kelip, Elbasy Nursultan Nazarbaevtyń 2020 jylǵa deıin elimizdegi 3-6 jastaǵy baldyrǵandardyń bárin birdeı balabaqshamen qamtýdy mindettegenin atap ótti. Qazirdiń ózinde Aqtóbe qalasyndaǵy 3-6 jastaǵy balalardyń balabaqshamen qamtylý deńgeıi 80 paıyzdan asqanyn bul saladaǵy jetistik retinde baǵalady.
Ata-analar atynan sóz alǵan Gúlnar Sarıeva balabaqshanyń ashylýyna uıytqy bolǵany úshin Elbasyna jáne jergilikti bılikke rızashylyǵyn bildirdi.
Balabaqsha qurylysyna jergilikti búdjetten 362,3 mıllıon teńge bólingen. 150 oryndyq balabaqshada 6 top bar. 40-qa jýyq maman jumys isteıdi. Munda balalardyń oıyn jáne jatyn bólmeleri, mýzyka zaly, medısınalyq bólme, asqana sapaly jıhazdarmen jaraqtandyrylǵan. Medısınalyq blogta dezınfeksıalyq quraldardy daıyndaıtyn jáne fızıoterapevtik bólmeler ornalasqan. Balabaqsha alańynda búldirshinderdiń belsendi qımyldaýyna arnalǵan kóleńkeli bastyrma, shaǵyn sáýlet nysandary ornatylǵan.
Budan keıin qala basshysy oblys ortalyǵyndaǵy 11-shaǵyn aýdanda ornalasqan №49 «Dýman» balabaqshasyna bardy. Memleket basshysy buryn balabaqsha ǵımaraty bolǵan nysandardy qaıtaryp, kúrdeli jóndeýden ótkizip, jas urpaqqa qaıtarýdy júktegen bolatyn. «Dýman» balabaqshasy osy tapsyrma negizinde ashylyp otyr. Kúrdeli jóndeýden keıin paıdalanýǵa berilip otyrǵan ǵımaratta 11-shaǵyn aýdanmen qatar, oǵan kórshiles ornalasqan 12, «Máskeý» jáne «Bolashaq» shaǵyn aýdandarynyń da balalary tárbıelenetin bolady.
«Álemde, elimizde qarjylyq qıyndaqtar bolǵanyna qaramastan, memleket aldyna qoıǵan áleýmettik mindettemelerin oryndaýda. Munyń barlyǵy elimizdegi san túrli ult pen ulystyń tatý tirlik etýiniń arqasynda júzege asyrylyp jatyr», – deı kelip, shahar basshysy Bekbol Saǵyn saltanatty sátke jınalǵan jurtshylyqty balabaqshanyń ashylýymen quttyqtady.
230 balaǵa arnalǵan balabaqshada 10 top bar. Jalpy alańy 3621,66 sharshy metr ǵımarattyń qurylysyna búdjetten 238 247 myń teńge jumsalǵan. Qurylys jumystaryn «Elıtstroıservıs» JSHS júrgizgenin atap ótken jón.
«Bıyl jaz aıynda 7 myńǵa jýyq bala balabaqshamen qamtyldy. Kelesi jyly 8 myń búldirshinge balabaqshaǵa joldama beriledi», – deıdi qalalyq bilim bóliminiń basshysy Lázzat Orazbaeva.
Sondaı-aq, jyl aıaǵyna qaraı «Nur Aqtóbe» shaǵyn aýdanynda 320 oryndyq balabaqsha boı kóteredi dep kútilýde.
Derekkóz: egemen Qazaqstan
