Keshe «Nur Otan» partıasy Or­ta­lyq apparatynyń ǵımaratynda orna­lasqan partıa baspasóz ortalyǵy óz ju­mysyn resmı túrde bastady. Onyń alǵash­qy brıfıńin partıa Tóraǵasy birinshi orynbasarynyń keńesshisi Berik Qurmanǵalı men partıa Ortalyq apparatynyń jetekshisi Janat Qojahmetov ótkizip, sońǵy eki aıda atqarylǵan jumystar barysynan habardar etti.
Aldymen sóz alǵan Berik Ýálıuly Baspasóz ortalyǵynyń basty maqsaty Elbasy, «Nur Otan» partıasynyń Tóraǵasy N.Á.Nazarbaev bekitken Bes ınstıtýttyq reformanyń «Ashyq jáne halyqqa esep berýshi mem­leket qurý» baǵyty boıynsha par­tıanyń qalyń jurtshylyq aldyn­daǵy jarıalylyǵyn kórsetý ekenin aıtty. Onyń aıtýynsha, «Nur Otan» elimizdegi jetekshi saıası kúsh bolǵandyqtan, aqparattyń ashyq­tyǵyna qashanda múddeli. Sony­men qatar, ol partıa ashyqtyq pen aı­qyndyq qaǵıdasyn saqtaýǵa jáne kez kelgen aqparatty ashyq usynýǵa daıyn ekenin jáne baspasóz ortalyǵy osyny júzege asyrýdyń bir tetigi bolyp tabylatynyn alǵa tartty. Endigi joly ár aptanyń seısenbisi men beısenbisi partıanyń laýazymdy tulǵalary, departament basshylary jáne partıanyń Májilistegi fraksıasynyń depýtattary buqaralyq aqparat quraldary ókilderiniń aldyna shyǵyp, brıfıń beretin bolady.
B.Qurmanǵalı bul oraıda «Nur Otannyń» jańa medıalyq saıasaty júzege asyrylyp jatqandyǵyna da nazar aýdartty. Ol, sondaı-aq, qazir­gi kezde jumys alty baǵyt boıynsha aıqyndalǵandyǵyn sanamalap berdi. Birinshisi – memlekettik baǵdarlamalardyń oryndalýy, ıaǵnı memleket qarjysynyń tıimdi jumsalýyna partıalyq baqylaýdy kúsheıtý. Partıa aldaǵy ýaqytta osy jumystardy óristetetin bolady. Ekinshisi – qoǵamdyq qabyldaýlar jumysyn jolǵa qoıý. Úshinshi – bastaýysh partıa uıymdarynyń jumysyn jandandyryp, júıeleý jáne Ortalyq apparat pen óńirler arasynda tyǵyz baılanys ornatý. Tórtinshi – «Jas Otan» jastar qanatynyń jumysyn naqtylyqqa negizdeý. Besinshi – partıanyń Parlamenttegi múmkindigin keńinen paıdalaný. Partıa fraksıasy arqyly halyqtyń óńirdegi kókeıkesti máselelerin sheshetin zańnamalardyń der kezinde qabyldanýyna kúsh salý. Altynshy – sybaılas jemqorlyqqa qarsy ıdeologıa men osy jumystardy jergilikti jerdegi partıalyq qurylymdardy tarta otyryp, kúsheıtý.
Elbasynyń «Uly Dala eli» ıdeıasynyń aıasynda elimiz boıynsha kóptegen jumystar júrgizilýde. Sol jumysty shıratý úshin «Nur Otan» partıasy óz janynan qurylǵan «Mıras» qoǵamdyq respýblıkalyq keńesinde osy máseleni jan-jaqty talqydan ótkizgen. Qazirdiń ózinde basylym betterinde «Erkin minbe» («Svobodnaıa trıbýna»), «Bılik nazaryna» aıdarlary ashylyp, óńirlerdegi azamattardyń sheshimin tapqan máseleleri jan-jaqty kórsetiletin bolady. Bul rette, Berik Ýálıuly «Nurly Jol» baǵdarlamasynyń qanshalyqty der kezinde ári sapaly júzege asyrylyp jatqandyǵyn ashyp kórsetý maqsatynda partıalyq emes buqaralyq aqparat quraldaryna da júginetindikterin jetkizdi. Sondaı-aq, 13 partıalyq joba ońtaılandyrylyp, 8 jobaǵa biriktirilgeni de atap ótildi. Partıalyq buqaralyq aqparat quraldarynda «Uly Dala ósıeti» aıdarymen el tarıhyndaǵy orny erekshe uly oıshyldardyń naqyl sózderin, tálim-tárbıelik mańyzy bar ósıetterin óskeleń urpaq sanasyna sińirý maqsatyndaǵy beınerolıkter kórsetilip, arnaıy aıdarlar ashylýda. Taǵy bir jańa joba aýyldaǵy jumyssyzdyq máselesin sheshýge baǵyttalyp, otbasylyq sharýalarǵa qoldaý kórsetý júıesin qurýdy kózdeıdi. Bul óz kezeginde aýyl sharýashylyǵyn ilgeriletýge ózindik úlesin qosýy tıis.
«Nur Otan» partıasy Ortalyq apparatynyń jetekshisi Janat Qojahmetov Elbasy, partıa Tóraǵasy N.Á.Nazarbaevtyń qoıǵan mindetteri aıasynda partıalyq baqylaý men óńirlerdegi jumys tıimdiligin arttyrý jóninde atqarylǵan jumystar jaıynan habardar etti. Ol Ult josparyn zańnamalyq turǵydan qamtamasyz etý boıynsha Májilistegi partıa fraksıasyna kelip túsken 62 zań jobasynyń 59-y maquldanyp, ústimizdegi jyldyń 1 qarashadaǵy málimetine sáıkes, Parlamentte 36 zań jobasy qabyldanǵanyn jetkizdi. Budan basqa, óńirlerden Ortalyq ap­paratqa kelgen usynystar saralanyp, Parlament Májilisiniń jumys toptaryna jetkiziletini erekshe ataldy.
«Nurly Jol» baǵdarlamasynyń júzege asyrylýyn baqylaý jóninde Májilis pen máslıhattardaǵy partıa fraksıalary janynda 4 komısıa qurylǵanyn tilge tıek etken J.Qojahmetov aldaǵy ýaqytta agroónerkásip keshenine qatysty taǵy bir komısıa qurylatynyn jetkizdi. Keltirilgen málimetke qaraǵanda, qoǵamdyq qabyldaý bólmeleri men «Elektrondy partıa» halyqpen keri baılanystyń nyǵaıa túsýine yqpal etken. Atap aıtqanda, 2 jylda memlekettik organdardyń jetekshileri men depýtattardyń azamattardy jeke qabyldaýlarynyń sany 8 ese ósken. Shaǵymdardyń árbir altynshysy elektrondy túrde qabyldansa, sonymen qatar, Májilistegi partıa fraksıasynyń múshelerine tikeleı ótinish jiberýge múmkindik beretin «Depýtat blogy» qyzmet etip turǵan.
Ortalyq apparatta júzege asyrylǵan ońtaılandyrý barysy da sóz etildi. Negizinen, partıa Tóraǵasynyń birinshi orynbasary Asqar Myrzahmetov buǵan deıin 1 qarashadan bastap partıanyń Ortalyq apparaty men óńirlik fılıaldar jańa shtat kestesi boıynsha jumys atqara bastaıtynyn habarlaǵan bolatyn. Sonymen, ortalyqta jumys isteıtin qyzmetkerler sany 132-den 116-ǵa deıin qysqaryp, tıisinshe óńirlik fılıal qyzmetkerleriniń sany 43%-ǵa, ıaǵnı 358 birlikke kóbeıgeni belgili bolyp otyr. Sondaı-aq, fılıaldardyń jumys sapasy men tıimdiligin baǵalaýdyń nysanaly ındıkatorlary ázirlenipti.

Derekkóz: egemen Qazaqstan