Keshe Prezıdent janyndaǵy Ortalyq komýnıkasıalar qyzmetinde ótken kezekti baspasóz máslıhatynda óńirlerdi damytýdyń 2020 jylǵa deıingi baǵdarlamasyn «Samuryq-Qazyna» jyljymaıtyn múlik qorynyń iske asyrýy jaıy talqylandy.
Jıyn barysynda «Samuryq-Qazyna» jyljymaıtyn múlik qory» AQ basqarma tóraǵasy Bolat Palymbetov atalǵan aksıonerlik qoǵam óńirlerdi damytýdyń 2020 jylǵa deıingi baǵdarlamasy sheńberinde jekemenshik kompanıalarmen áriptestik ornata otyryp, shamamen 585 myń sharshy metr turǵyn-jaı qurylysyn júrgizip jatqanyn málimdedi. Bul degenimiz, shamamen 10 255 páter eken. Onyń ishinde 472 myń sharshy metri, ıaǵnı 8 286 páter «Samuryq-Qazyna» jyljymaıtyn múlik qoryna tıesili. Búginde jalpy aýdany 344 myń sharshy metr paıdalanýǵa berildi, onyń ishinde Jyljymaıtyn múlik qoryna tıesili bóligi – 267 myń sharshy metr nemese 5 063 páter bolyp otyr, dedi basqarma basshysy. Aıta ketsek, satyp alý quqyǵymen jalǵa beriletin páterler 15 jyl merzimge beriledi. Jaldaý tólemderiniń mólsheri satyp alý quqyǵymen jaldaýdyń búkil merzimi ishinde birqalypty deńgeıde bolady.
B.Palymbetov, sonymen qatar, qor jer­gilikti qurylys kompanıalarymen tyǵyz yntymaqtastyqta turǵyn úıler salyp, óńirlerdi damytýǵa belsendi qatysyp otyrǵandyǵyn aıta kele, atalǵan baǵdar­lamany júzege asyrý aıasynda Jyljymaıtyn múlik qory elimizdiń 11 óńirindegi qurylystar tórt myńnan astam jumys oryndaryn ashqanyn jetkizdi. «Qurylys salýshylardyń nysandardy salý kezinde qazaqstandyq qurylys materıaldaryn qoldanýy jáne jergilikti jumys kúshin tartýy arqasynda aǵymdaǵy jyldyń 9 aıyndaǵy nátıjesi boıynsha iske asyrylyp jatqan jobalardaǵy jergilikti qamtý deńgeıin or­ta­sha esep­pen 80 paıyzǵa deıin art­tyrýǵa qol jetkizýmen qatar, Jyl­­jy­maıtyn múlik qorynyń qa­ty­­sýymen salynyp jatqan ny­san­­dardyń qurylys qunyn qym­­bat­tatpaýǵa múmkindik berdi», dedi ol.
Basqarma tóraǵasy baspana baǵasyna qatysty da aqparat­tar­men bólisti. «Óńirlerdi damy­týd­yń 2020 jylǵa deıingi baǵdar­lamasy 2012 jyldan beri jumys istep kele jatqanyn bilesizder. 2012 jyly bir sharshy metr bas­pa­nanyń ózindik quny, ıaǵnı biz qu­rylys kompanıa­larymen keli­sim­sharttar bekitken kezde óńir­lerde 1 sharshy metr úshin – 120 myń teńge, al Almaty, Astana Aty­raý jáne Aqtaýda 150 myń teń­ge boldy. 2013-2014 jyldary óńirlerde – 132 myń teńge, Almaty men Astanada 164 myń teńge deńgeıinde qalyptasty. Búginde óńirlerde sharshy metr 137 myń teńge tursa, Almaty, Astana, Atyraý jáne Aqtaýda – 171 myń teńge. Jyl saıyn ósim 4-4,5 paıyz deńgeıinde bolyp otyr», dedi B.Palymbetov. Onyń atap ótýinshe, valúta baǵamynyń ózgerýine baılanysty baǵalardyń kúrt ósýi boljanyp otyrǵan joq. «Baǵanyń artýyn biz anyqtamaımyz, ıaǵnı Ulttyq ekonomıka mınıstrligi Qurylys, turǵyn úı-kommýnaldyq sharýashylyq isteri jáne jer resýrstaryn basqarý komıtetine silteme jasaımyz», dep túsindirdi «Samuryq-Qazyna» jyljymaıtyn múlik qory» AQ basqarma tóraǵasy.
Bastysy, «Samuryq-Qazyna» jyljymaıtyn múlik qory» AQ qazaqstandyqtarǵa baspana alýǵa jáne turǵyn úı jaǵdaıyn jaqsartýǵa shynaıy múmkindik berip otyr, deıdi mamandar.

Derekkóz: egemen Qazaqstan