Elimiz sońǵy jyldary BUU aıasynda bitimgershilik mısıalaryna qatysyp keledi. Osyǵan oraı elimiz Senaty Halyqaralyq qatynastar, qorǵanys jáne qaýipsizdik komıtetiniń músheleri Astana mańyndaǵy nómiri 68665 áskerı bóliminde bolyp, bitimgershilik qyzmeti salasyn quqyqtyq qamtamasyz etý máseleleri boıynsha Qorǵanys mınıstrligi basshylyǵymen kezdesý ótkizdi.
Joǵary zań shyǵarý organynan kelgen depýtattarǵa áskerı daıyndyq barysy kórsetilip, eldi mekenderdi sodyrlardyń basyp alǵan kezdegi áskerılerdiń is-qımyldary kórinisi pash etildi. Sondaı-aq, áskerıler arnaıy tırde ózderiniń mergendigimen tanylyp jatty. Budan basqa, sap túzegen sarbazdar depýtattar men joǵary áskerı sheńdiler aldynda marshpen júrip ótip, daıyndyqtaryn taǵy bir qyry­nan kórsete bildi. Artynan bitim­gershilik qyzmetin quqyqtyq qam­tamasyz etýge arnalǵan shtabtaǵy otyrysta salanyń túıtkilderi men je­tistikteri jan-jaqty talqylandy.
Senattyń Halyqaralyq qaty­nastar, qorǵanys jáne qaýipsizdik komıtetiniń tóraǵasy Ikram Adyrbekov Qazaqstannyń BUU aıasyndaǵy bitimgershilik mısıalaryna qatysýy aımaqtyq jáne halyqaralyq qaýipsizdikti qamtamasyz etýge jáne nyǵaıtýǵa baǵyttalǵan Syrtqy saıasat tujy­rymdamasynan týyndaıtynyna erek­she toqtaldy. Komıtet tóra­ǵasy bul rette Qazaqstan Respýb­lıkasy Prezıdentiniń Jar­ly­ǵymen 2011 jyly beki­til­gen Áskerı doktrınanyń ere­je­lerine sáıkes, bitimgershilik qyz­meti ujymdyq jáne ulttyq qaýip­sizdikti nyǵaıtý jónindegi saıasattyń mańyzdy quramdasy bolyp tabylatynyn da qaperge sala ketti. Sonymen birge, elimizdiń áskerı saıasatynyń negizgi min­detteriniń biri beıbitshilik pen qaýipsizdikti qoldaý jónindegi halyqaralyq mindettemelerin oryndaý, onyń ishinde BUU Qaýipsizdik Keńesiniń sheshimin oryndaý aıasynda bitimgershilik qyzmetine qatysý bolyp tabylady.
Qazirgi tańda ulttyq zańnamany halyqaralyq quqyqtyq aktilerge sáıkes keltirý jumystary júrgizilýde ekendigi belgili. 2015 jyly 15 maýsymda Memleket basshysy «Bitimgershilik qyzmeti týraly» Zańǵa qol qoıǵandyǵyn ataı ketken jón. Osyǵan oraı, Parlament tarapynan qabyldanǵan «Bitimgershilik týraly» Zańnyń negizgi erejelerin senator, armıa generaly Muhtar Altynbaev jan-jaqty aıtyp berdi. Depýtat bul kezdesý beıbitshilik qyzmetti odan ári damytý jónindegi jumystardy shırata túsetindigine nazar aýdartty.
«Qazirgi kezdegi jetistikter – bolashaq urpaq úshin mura. Bul Tuńǵysh Prezıdent N.Á.Nazarbaev bastaǵan kúshti Qazaqstandy qurý jáne eldiń turaqty damýynyń negizi», dedi Muhtar Qapashuly. Bul rette, 2013 jylǵy 20 qazanda Qazaqstan Respýblıkasy Qarýly Kúshteriniń sardarlaryn BUU mısıasyna áskerı baıqaýshylar retinde jiberý týraly Prezıdent N.Nazarbaevtyń usynysyna Parlament qoldaý bildirgendigin aıta ketý kerek. Sonyń negizinde ár mısıaǵa BUU mısıasy aıasynda Gaıtı, Batys Sahara, Kot-d Ivýar jáne Lıberıaǵa qazaqstandyq bes bitimgershiden attandyrý týraly sheshim qabyldanǵan-dy. Jalpy, beıbitshilik mısıasy úshin 20-ǵa tarta ofıser daıyndalyp jatsa, taǵy jeteýi BUU mısıasy aıasynda áskerı boryshtaryn óteýde eken.
Otyrys barysynda Qazaqstan Respýblıkasy Qarýly Kúshteri Bas shtaby Jaýyngerlik daıyndyq departamentiniń bitimgershilik ázirlikti josparlaý jáne úılestirý bóliminiń bastyǵy Baýyrjan Nyǵmetýllın sóz sóılep, bitimgerler atynan ulttyq jáne aımaqtyq qaýipsizdikti qamtamasyz etýge qosqan úlesi úshin taıaýda 70 jyldyǵyn atap ótkeli otyrǵan burynǵy Qorǵanys mınıstri, Halyq qaharmany M.Altynbaevqa alǵysyn da bildire ketti. Jalpy, «Qazbat» bitimgershileri Irakta túrli nysandardy 4 mıllıonǵa tarta qaýipti jarylǵysh zattardan tazartqany belgili. Budan basqa, 5 myńdaı jergilikti turǵynǵa medısınalyq kómek te kórsetilgen. Sóz reti kelgende Qurlyq áskerlerine qarasty Áskerı ınstıtýtta «Beıbitshilik jolyndaǵy seriktestik» oqý ortalyǵy qurylyp, BUU tıptik baǵdarlamasy negizinde «BUU beıbitshilik mısıasyna keter aldynda qazaqstandyq áskerılerdiń daıyndyq kýrsy» ázirlengendigin aıta ketý kerek. Sonymen qatar, Shvesıa men Fınlándıanyń oqý ortalyqtarynyń sarapshylarymen birlesip, «BUU shtabtyq ofıserleri» kýrstyq oqý baǵdar­lamalary ázirlengen bolatyn.

"Qamshy"silteıdi

Derekkóz: egemen Qazaqstan