Almaty qalasyndaǵy «Ádebıetshiler úıinde» Qazaqstan Jazýshylar odaǵynyń uıymdastyrýymen ulttyq kórkem ádebıetti qoldaý maqsatynda Qazaq handyǵynyń 550 jyldyǵyna oraı ótkizilgen «Alash tarıhynyń aqıqaty» atty jabyq báıge jeńimpazdaryn saltanatty túrde marapattaý rásimi bolyp ótti.
Gran prı proza 01
Korganbek 0«Ádebıetshiler úıinde» ótken saltanatty sharany Qazaqstan Respýblıkasy Mádenıet jáne sport mınıstri Arystanbek Muhamedıuly quttyqtaý sózben ashyp, báıge jeńimpazdaryna jyly lebizin arnady. Osy jerde Premer-Mınıstr Kárim Másimovtiń quttyqtaý hatyn oqyp berdi. «Qazaq handyǵynyń 550 jyldyǵyna arnalǵan saltanatty jıynda Elbasy Nursultan Nazarbaev tarıhymyzǵa qatysty kóptegen ózekti máselelerdi tarqatyp aıtty. Qazaqstan – Uly Dala eli. Táýelsizdik – mańdaıǵa bitken baǵymyz, máńgi aıalap óter amanatymyz. Sizderdiń shyǵarmalaryńyz arqyly árbir adam boıynda ultty súıý men ulttyq rýh qalyptasady. Talanty men kúsh-jigerin halqymyzdyń ıgiligine arnaǵan barsha qalamgerlerimizge shyǵarmashylyq tabys tileımin» delingen Úkimet basshysynyń hatynda. Sondaı-aq, qazaq qalamgerleriniń ult tarıhyna úles qosqan báıgeli shyǵarmalary marapattalǵan jıynda Almaty qalasy ákiminiń birinshi orynbasary Arman Qyryqbaev qala ákiminiń arnaıy quttyqtaý hatyn oqyp berdi.
El ıgiligi úshin uıymdastyrylǵan sharany qarjylaı qoldaǵan ERG resmı ókili Bolat Orazov osy toptyń basqarma tóraǵasy Aldıar Qaztaevtyń joldaǵan quttyqtaý jedelhaty men qazaq qalamgerlerine degen ystyq yqylasyn jetkizdi. Sonymen qatar, Qazaqstan Jazýshylar odaǵy basqarmasynyń tóraǵasy, aqyn, senator Nurlan Orazalın da jeńimpaz qalamgerlerdi quttyqtap, osynaý ıgi sharanyń ótkizilýine rızashylyq bildirgen el azamattarynyń joldaǵan jedel hattaryn halyqqa jetkizip, ult ádebıeti men rýhanıatyna qoldaý kórsetken tulǵalarǵa alǵys sezimin bildirdi.
Eýrazıalyq toptyń (ERG) qarjylaı demeýshiligimen júzege asqan jabyq báıge qorjynyna proza, poezıa jáne dramatýrgıa salasy boıynsha 200-ge tarta týyndy túsip, úzdik dep tanylǵan shyǵarmalar «Alash tarıhynyń aqıqaty» atty qos tomdyqqa engizilgen. «An-Arys» baspasynan jaryq kórgen atalmysh kitaptyń tusaýyn qazaqtyń dúldúl aqyny İlıas Jansúgirovtiń uly Saıat Jansúgirov pen Qazaq KSR-iniń halyq ártisi Sábıt Orazbaev kesip, ultymyzdyń rýhanı qazynasyna qosylǵan qos tomdyqtyń kótergen júgi men arqalaǵan amanatynyń mańyzdylyǵy jóninde tebirene sóıledi.
Atalmysh báıgede oza shaýyp, júldeli orynǵa ıe bolǵan týyndylar men qalamgerlerdi atap aıtsaq, proza janry boıynsha bas júldeni Tynymbaı Nurmaǵanbetov, 1-oryndy Mombek Ábdákimuly, 2-oryndy Turysbek Sáýketaı, Baqytjan Qanapıanov, Qýanysh Jıenbaı, 3-oryndy Ádilbek Ybyraıymuly, Tóken Áljantegi, Asqar Altaı, Serik Saǵyntaı ıelendi. Poezıa janry boıynsha bas júldeni Serik Turǵynbekuly, 1-oryndy Saılaý Baıbosyn, 2-oryndy Serik Aqsuńqaruly, Ábýbákir Qaıran, Jaras Sársek, 3-oryndy Qorǵanbek Amanjol, Baqytbek Bámishuly, Ǵalym Árip, Esken Elýbaı, Myńbaı Rásh, Naýryzbek Sarshaev aldy. Al dramatýrgıa janry boıynsha bas báıge Iranbek Orazbaev, 1-oryn Rahymjan Otarbaev, 2-oryn Sultanáli Balǵabaev, Dýman Ramazan, Joltaı Álmeshtegi, 3-oryn Nurǵalı Oraz, Kenjebaı Ahmet, Járken Bódesh pen Maǵıra Qojahmetovaǵa buıyrdy.
Qazaq rýhanıaty men ádebıetin dáriptegen saltanatty shara ult aspaptar orkestri men halyq ánin oryndaýshy óner qaıratkerleriniń konserttik baǵdarlamasymen órnekteldi.
Derekkóz: egemen Qazaqstan
