AQTÓBE. 6 qarasha. Aqtóbedegi «Qonys» sport saraıynda dańqty palýan, grek-rım kúresinen Olımpıada chempıony Jaqsylyq Úshkempirovtiń Máskeý Olımpıadasynda chempıon bolǵanyna 35 jyl tolýyna arnalǵan grek-rım, erkin jáne áıelder kúresinen Qazaqstan Kýbogy jolyndaǵy jarys ótýde. Bul týraly egemen.kz tilshisi habarlady.
Baıraqty básekege elimizdiń on tórt oblysynan jáne Almaty men Astana qalalarynan 300-den astam palýan jınaldy. Olar aldyn ala irikteý beldesýlerin bastap ta ketti. Jarys qorytyndysy boıynsha Álem Kýbogyna, Azıa jáne álem birinshilikterine daıyndalyp, qatysý úshin Qazaqstan qurama komandasy jasaqtalatyn bolǵandyqtan ilgeri kúnge úmit artqan ár palýan beldesýlerin jeńiske degen jigermen ótkizýde. Palýandar «myńnan tulpar» shyǵý úshin bar sheberlikterin salýda.
Sondyqtan da bolar sport saraıynda ótken jarystyń saltanatty ashylýyna jankúıerler de kóp jınaldy. Jankúıerler talaı márte boz kilemniń ajaryn ashyp, báıge tórinen kóringen sańlaq balýandardy jarystyń qurmetti qonaqtary qatarynda kórdi. Olardyń arasynda Máskeý Olımpıadasynyń chempıony, álem chempıony, Álem Kýbogynyń ıegeri, Eýropa chempıonatyń kúmis júldegeri, KSRO-nyń eki dúrkin chempıony, KSRO birinshiliginiń kúmis, qola júldegeri, KSRO halyqtary spartakıdasynyń chempıony, KSRO-ǵa eńbegi sińgen sport sheberi Jaqsylyq Úshkempirov, Olımpıada oıyndarynyń, álem jáne Azıa chempıonattarynyń jeńimpazdary men júldegerleri Iýrıı Melnıchenko, Bahtıar Baıseıitov, Nurbaqyt Teńizbaev jáne basqalary bar. Sondaı-aq, Olımpıada oıyndarynyń eki dúrkin chempıony, álemniń alty dúrkin chempıony, Eýropa jáne KSRO birinshilikteriniń birneshe dúrkin chempıony Sergeı Beloglazov ta kelgen.
Palýandar jarysynyń saltanatty ashylýynda sóz alǵan oblys ákimi Berdibek Saparbaev ultty, memleketti ózge elderge tanytatyn sport ekenin aıta kelip, halqymyzdyń alyp kúsh ıeleri, jaýyryny jerge tımegen palýan perzentteri Balýan Sholaq, Qajymuqannyń izbasarlarynyń táýelsiz Qazaqstandy álemge moıyndatýdaǵy eren eńbekterin alǵa tarta sóıledi.
«Máskeý Olımpıadasynda dańqty palýan Jaqsylyq Úshkempirov chempıon bolyp, qazaq elin tórtkúl dúnıege tanytty. Bul ult úshin úlken maqtanysh edi. Táýelsizdik jyldary Iýrıı Melnıchenko tuńǵysh Olımpıada chempıony boldy. Álemdik dodalarda áldeneshe ret olja salǵan, Olımpıada oıyndarynda júldeger bolǵan Dáýlet Turlyhanovtyń jetken jetistigi óz aldyna bir tóbe. Mundaı is-shara jastarymyzǵa ulaǵatty tárbıe, osyndaı bolmaq kerek degen úlgi-ónege bolyp tabylady. Qazir boz kilemdegi palýandardyń sheberlikterin kórip otyrǵan jastardyń arasynan da álemdik jarystarda kók baıraǵymyzdy jelbiretetin bula kúshti, sheberligi shyńdalǵan palýandar shyǵaryna senim mol», – dedi óńir basshysy.
Berdibek Saparbaev osy jarysqa demeýshilik jasaǵan «Aqpan» JSHS-ne rızashylyǵyn bildire kelip, Máskeý Olımpıadasynyń chempıony Jaqsylyq Úshkempirovke sheteldik temir tulpardyń kiltin tapsyrdy.
Sodan keıin Mádenıet jáne sport mınıstrligi sport komıteti tóraǵasynyń orynbasary Ádil Dóńbaı jarysqa qatysýshylardy quttyqtady. Ol elimizde 136 myń sportshynyń kúres túrlerimen aınalysatynyn, olarǵa 2400 jattyqtyrýshy palýandyqtyń qyr-syryn úıretetinin jetkizdi. Jarysty ótkizýdegi maqsat salaýatty ómir saltyn nasıhattaý, buqaralyq sportty damytý ekenin de atap ótti. Ol Olımpıada chempıondary Jaqsylyq Úshkempirov pen Iýrıı Melnıchenkoǵa «Qazaq handyǵynyń 550 jyldyǵy» merekelik medalin tapsyrdy.
Óz kezeginde Jaqsylyq Úshkempirov sporttaǵy jetken jetistigi jáne eren eńbegi úshin osyndaı ulym bar dep alaqandaryna salyp, aıalap kele jatqan halqyna jáne Elbasyna alǵys sezimin arnady.
Ataqty palýannyń álemdik dodadan altyn oljalap oralǵan aqtóbelik jas palýan Meırambek Aınaǵulovqa ózi kıgen sporttyq kıimi men ómirbaıany jazylǵan kitapty syıǵa tartýy da jarasymdy boldy. Ol jaqynda Ońtústik Koreıada ótken Úİ álemdik áskerı oıyndardyń jeńimpazy boldy, 2013 jylǵy eresekter arasyndaǵy Qazaqstan Kýbogynyń ıegeri, eresekter arasynda Qazaqstannyń ótken jylǵy chempıony, eresekter arasynda Qazaqstannyń İÚ jazǵy spartakıadasynyń jeńimpazy.
Qazaqstan Respýblıkasy grek-rım, erkin jáne áıelder kúresi federasıasynyń vıse prezıdenti Erlan Qojasbaı quttyqtaý tilegin jetkizdi. «Qazmunaıgaz» AQ ókili Baqyt Imanǵalıev Jaqsylyq Úshkempirovtiń ıyǵyna shapan jaýyp, alǵys hat tapsyrdy.
Jarystyń saltanatty ashylýy grek-rım kúresinen birinshi jáne tórtinshi oryndar úshin beldesýlerge ulasty. Jarys qorytyndysynda Ońtústik Qazaqstan oblysynyń qurama komandasy birinshi, aqtóbelikter ekinshi, al Qaraǵandy oblysynyń qurama kumandasy úshinshi oryndy ıelendi. Erkin jáne áıelder kúresinen beldesýler jalǵasýda.
Derekkóz: egemen Qazaqstan
