Keshe «Nur Otan» partıasynyń Ortalyq apparatynda «Nur Otan» partıasy Tóraǵasynyń birinshi orynbasary Asqar Myrzahmetovtiń qatysýymen partıa janyndaǵy mádenıet pen ónerdi damytý máseleleri jónindegi «Mıras» respýblıkalyq qoǵamdyq keńesiniń keńeıtilgen otyrysy ótti.
Kún tártibinde Elbasy, partıa Tóraǵasy N.Á.Nazarbaevtyń «Uly Dala eli» ıdeıasyn nasıhattaý sharalary jáne Qazaqstan Respýblıkasynda tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasynyń oryndalýy máseleleri qaralyp, memlekettik tildiń bıznes pen memlekettik qyzmet salasyndaǵy qoldanylý aıasy talqylandy.
Otyrysty Parlament Májilisiniń depýtaty, keńes tóraǵasy Máýlen Áshimbaev ashyp, bıylǵy jyly úshinshi ret ótkizilip otyrǵan bul keńes osy kezeń ishinde qoǵamdaǵy birlik pen yntymaqty saqtaý, qazaqstandyq patrıotızmdi qalyptastyrý baǵytynda el zıalylary pikir bildiretin alań bolyp aıqyndalǵandyǵyn atap ótti. Keńestiń kezekti otyrysynda da aýqymy keń, máni tereń máseleler qamtylǵandyǵyn jetkizip, eldik máselelerdi erkin talqylap, oı bólisýge shaqyrdy.
Elbasy, partıa Tóraǵasy N.Á.Nazarbaev­tyń «Uly Dala eli» ıdeıa­sy – halqymyzdy biregeı ataýdyń astyna toptastyryp, ortaq maqsatqa jumyldyrýdy, ózindik tarıhy men órkenıeti, derbes bolmysy men mádenıeti qalyptasqan el retinde álemge tanytýdy maqsat tutady. Osy másele jóninde keńinen toqtalǵan partıa Tóraǵasynyń birinshi orynbasary A.Myrzahmetov «Nur Otan» partıasy mádenı jáne rýhanı qundylyqtardy saqtap, ulǵaıtýdy óz doktrınasynda basymdyq retinde belgilep otyrǵanyn atap ótip, bul jobalar Memleket basshysynyń «Uly Dala eli» ıdeıasymen tutastaı úılesim tapqandyǵyn jetkizdi. Elbasy usynǵan ómirsheń uǵymdy júzege asyrýda partıa tarapynan birqatar tyń bastamalar qolǵa alynyp jatqandyǵyn málimdedi.
Atap aıtqanda, «Nur Otan» partıa­sy «Uly Dala eli» uǵymyn bildiretin nyshannyń (logotıptiń) qabyldanýyna óz úlesin qosyp, dızaınerler arasynda konkýrs ótkizbek. Osy ıdeıany nasıhattaýǵa arnalǵan respýblıkalyq is-sharalar josparyn ázirleýdi qolǵa alyp, «Uly Dala órkenıeti» beıne ensıklopedıasyn shyǵarýǵa sep bolmaq. Partıalyq buqaralyq aqparat quraldary arqyly «Uly Dala ósıeti» jelisimen halqymyzdyń kemeńger tulǵalarynyń eldik pen birlikti saqtaý týraly aıtqan danalyq sózderin júıeli túrde nasıhattamaq. Dala tarıhy men órkenıetin, mádenıetin dáripteıtin qysqametrajdy fılmderdiń túsirilýine yqpal etip, áleýmettik jeliler arqyly taratýǵa muryndyq bolmaq. «Jas Otan» jastar qanatynyń sharalaryn «Uly Dala eli» ıdeıasymen úılestirip, «Jas Ulan» qozǵalysyn osy ıdeıamen ushtastyrmaq.
«Elbasy halyqtyq bes reformada bolashaǵy birtutas ultty qalyptastyrýda memleket quraýshy ult retinde halqymyzǵa erekshe jaýapkershilik júkteletinin atap kórsetti. Osy oraıda, «Mıras» qoǵamdyq keńesi shejireli tarıhymyz ben baı mádenıetimizdi túgendeýge, rýhanı qundylyqtarymyzdy jańǵyrtýǵa ólsheýsiz úles qosyp, búkil eldiń mádenı-rýhanı órkendeýine qyzmet etip keledi. Aldaǵy ýaqytta qoǵamdy ortaq ıdeıa sheńberindegi bastamalarǵa jumyldyryp, jetken jetistikti eseleý paryz. Búgingi kezdesýdegi basty maqsat – ózderińizben osy másele boıynsha oı bólisý», – dedi A.Myrzahmetov.
Memleket basshysy usynǵan ıdeıanyń aıasyna qoǵamdy toptastyrý jóninde óz usynys-pikirlerin bildirgen memleket jáne qoǵam qaıratkeri, fılologıa ǵylymdarynyń doktory, profesor Myrzataı Joldasbekov, Qazaqstannyń eńbek sińirgen ártisi, qoǵam qaıratkeri, Ulttyq sport túrleri qaýymdastyǵynyń prezıdenti Bekbolat Tileýhan, Halyqaralyq Túrki akademıasynyń prezıdenti Darhan Qydyráli Elbasy Qazaqstannyń beıresmı sımvoldyq ataýyn búkil álem boıynsha ilgeriletý týraly tyń mindet qoıǵandyǵyn atap ótip, bul óz kezeginde Uly Dalanyń mol rýhanı baılyǵyn qoǵamdyq sanada jańǵyrtýǵa bastaıtyn qadam dep baǵalady. El zıa­lylary «Memleketimizge «Uly Dala eli» atalymynyń telinýi halqymyzdyń ótkenin búginimen jalǵap, keleshegin kemel etpek. Ult ýyzyna balanatyn salt-sanamyzben qaıta qaýyshtyryp, san ǵasyrlyq bolmys-bitimimizdi bekemdeı túspek. Sondyqtan, elimizdiń sımvoldyq ataýy urpaq jadyna táýelsizdik ıdeıasyn synalap sińiredi», – dep oı túıdi.
Keńestiń kún tártibine qoıylǵan ekinshi másele – Qazaqstan Respýblıkasynda tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasynyń oryndalýy boıynsha esepti Mádenıet jáne sport vıse-mınıstri Marat Ázilhanov jasady. Ol óz sózinde memlekettik baǵdarlama aıasynda josparlanǵan sharalardyń atqarylýy jóninde keń maǵlumat berdi. Memlekettik organdarda memlekettik tilde is júrgizý kezeń-kezeńimen júzege asyp jatqandyǵyn málimdep, til saıasaty salasyndaǵy túıinderdi tarqatýda mınıstrlik tarapynan usynylyp otyrǵan bastamalardy ortaǵa saldy.
Osy másele jóninde pikir bildirgen Parlament Senatynyń depýtaty Nurlan Orazalın Elbasynyń «Uly Dala eli» ıdeıasy sheńberinde memlekettik til de órken jaıýy kerektigine nazar aýdardy.
Keńes otyrysyn qorytyndylaǵan M.Áshimbaev mańyzdy máseleler qaralǵan keleli jıynda qatysýshylar tarapynan qundy oı-pikirler aıtylǵanyn, bul usynystar memlekettik organdarǵa tıisti sheshim shyǵarý úshin joldanatynyn málimdep, jıynǵa belsene qatysqan keńes múshelerine alǵysyn bildirdi.

Derekkóz: egemen Qazaqstan