Keshe Parıjde Qazaqstan Respýblıkasynyń Prezıdenti Nursultan Nazarbaevtyń Fransıa elindegi resmı sapary bastaldy. Elbasy bul elge Fransıa Prezıdenti Fransýa Ollandtyń shaqyrýymen keldi.
Gazetimizdiń oqyrmandary F.Ol­land Qazaqstanǵa 2014 jylǵy jeltoqsan aıynda kelgenin jaqsy biledi. 5-6 jeltoqsanda ótken sol sapar barysynda Fransýa Olland Astana jáne Almaty qalalarynda bolyp, Fransıanyń Qazaqstanmen aradaǵy strategıalyq áriptestikti odan ári nyǵaıtýǵa barynsha nıetti ekendigin ashyq ańǵartqan bolatyn.
«Qazaqstannyń geografıalyq orny da óte mańyzdy, ol – Eýropa men Azıa arasyn baılanystyratyn kópir. Qazaqstannyń osy geo­grafıalyq ornyn ońtaıly paıda­lanǵan saıasatynan Fransıa ózine qajetti sabaq alsa bolady. Qa­zaqstanǵa ınvestısıalaý – Eýro­pa men Azıaǵa ınvestısıalaý. Iaǵ­nı, bolashaq Eýrazıalyq ekono­mıkalyq odaqpen jaqsy qarym-qatynasta bolý degen sóz. Eýro­panyń búgin bolmasa da, bir kúni qurlyqtyń osy bóligimen tyǵyz baılanysary anyq», degen bolatyn sonda F.Olland Almatydaǵy Ǵylym ordasyndaǵy sózinde.
Sol sapar barysynda F.Ol­land­tyń Elbasynyń usynysy boıynsha óz baǵdarlamasyna shuǵyl ózgeris engizip, qaıtar jolynda bizdiń Elbasymyzdyń usynysy boıynsha Máskeýge soǵyp Re­seı prezıdenti Vladımır Pýtın­men kez­des­keni, kezdesý barysynda Ýkraı­na­daǵy saıası daǵdarysty retke keltirý jó­ninde Reseı basshylyǵymen ke­lis­sózder júrgizgendigi belgili.
Sondyqtan bul jolǵy sapar­dy eki el basshylyǵynyń syı­lastyq qarym-qatynasy óris alǵan tustaǵy jaýapty sapar retin­de qarastyrýǵa bolady. Elimizdi álemdegi damyǵan otyz el qataryna qosý, odan beri alǵanda «Nurly Jol» baǵdarlamasyn júzege asyrý úshin bizge Batystyń damyǵan elderiniń ınvestısıalary, olardyń bizdi qoldaýy qajet. «Jaqsymen joldas bolsań jetilersiń» dep atamyz qazaq ta tegin aıtpaǵan. Sondyqtan Elbasynyń Batys áleminiń aı múıizdi memleketterine balanatyn Ulybrıtanıa men Fransıaǵa jasaǵan bul saparlaryn bir esepten alǵanda Qazaqstannyń keleshegi úshin san túrli máselelerdiń basyn qosqan mándi de mańyzdy sapar dep aıtýǵa ábden bolady. Ulybrıtanıa jerindegi áńgime men kelisimder 12 mıllıard dollardyń aınalasynda qozǵalǵandyǵyn keshegi kúni jazdyq. Sol sekildi Fransıa jerindegi saparynyń alǵashqy kúnin de Elbasymyzdyń osyndaǵy bıznes shortandarymen kezdesýden bastady.
06-11-02
05-11-05
Solardyń alǵashqylarynyń qa­tar­ynda Qazaqstan Prezıdenti Peugeot Citroón kompanıasy basqarmasynyń tór­aǵasy Karlos Ta­varespen kezdesti.
Kezdesýde kompanıanyń Qa­zaq­stan avtoóndirýshilermen yn­tymaq­tas­tyǵynyń perspektıvalary, elimizdegi qyzmeti jáne onyń aıasyn keńeıtý máseleleri tal­qy­landy. K.Tavares Elba­syna qazaqstandyq seriktes­teri­men eki jyl ishindegi birles­ken jumysy, daıyn ónim shyǵa­rý óndirisi jáne ony kórshi elder­diń naryǵyna eksporttaý josparlary týraly aıtyp berdi.
Sondaı-aq, Memleket basshysy «Total» kompanıasynyń bas atqarýshy dı­rektory Patrık Pýıannemen de kez­desti.
Kez­desý barysynda kómirsýtek shı­ki­­za­tyn óndirý salasyndaǵy ózara yq­pal­­das­tyqtyń negizgi baǵyttary talqy­landy.
Memleket basshysy kompa­nıa­nyń Qazaqstanda belsendi ári uzaq ýaqyt jumys istep kele jat­qanyna, sonyń nátı­jesinde syndarly yntymaqtastyq boı­­ynsha qomaqty tájirıbe jınaqtal­ǵanyna nazar aýdardy.
P.Pýıanne óz sózinde Nursultan Nazarbaevqa Qashaǵan kenishin ıgerý já­ne elimizdegi ózge de ın­vestısıalyq joba­lardyń júzege asyrylý barysy týraly aıtty.
Kezdesý aıaqtalǵannan keıin qazaq­standyq bir top jýrnalıs P.Pýıanne myrzadan shaǵyn suh­bat alǵan edik. Sol suhbatynda «Total» kompanıasynyń basshysy Elbasynyń elimizde jasap jatqan jumystary týraly jaqsy pikirin bildirdi. Qazirgi kúni Qazaqstanda ekonomıkanyń áleýetin ashý úshin shetten ınvestısıa tartý maq­satynda ınvestorlar úshin birqatar qolaıly ahýaldyń jasalǵandyǵyn tilge tıek etti.
Elbasynyń «Aubert&Duval» kom­pa­nıasynyń prezıdenti Jorj Dúval­men jáne Óskemen tı­tan-magnıı kom­bı­natynyń pre­zı­denti Ásem Mamyto­vamen kezde­sýinde metalýrgıa sala­syn­daǵy yn­tymaqtastyq máseleleri qaras­tyryldy.
Memleket basshysy eki ká­sip­­orynnyń birlesken jumy­sy eldi ındýstrıalandyrý baǵ­dar­lamasynyń mańyzdy bóligi ekenin atap ótti. Qazaqstan Prezıdenti sondaı-aq, kompanıanyń mashına jáne aspaptar jasaýǵa arnalǵan tıtan-magnıı ónimderi óndirisin keńeıtý jónindegi jumystarynyń esebin tyńdady.
Osy oraıda Nursultan Nazarbaevtyń fransýz ekonomısi Jak Attalımen kezdeskenin de aıta ketý kerek. Kezdesý barysyn­da jahandyq naryqtardaǵy ahýal, álemdik ekonomıkadaǵy daǵ­darys úrdisterin eńserý joldary, sondaı-aq, qazirgi qalyptasqan jaǵ­daıdaǵy Qazaq­stannyń is-qımyl baǵdarlamasy – bes ınstıtýttyq reforma men «100 naqty qadam» Ult jos­pary talqylandy. Ta­rap­tar elimizdegi ınfraqury­lymdyq jań­ǵyr­týlar perspektıvasyna da arnaıy toqtaldy.
Munan keıin Elbasynyń Fran­sıanyń jetekshi kompa­nıa­larynyń basshylarymen jalpy kezdesýi ótti.
Kezdesýge qatysýshylar aldynda sóılegen sózinde Memleket basshy­sy olardyń kópshiliginiń elimizde ju­mys istep jatqanyn, Qazaqstannyń múm­kin­dikteri men uzaq merzimdi basymdyq­taryn jaqsy biletinin aıtty.
«Mysalǵa, Fransıanyń 24 kompanıasy Qazaqstanda qazirdiń ózinde 2 mıllıard dollardan asatyn jobalardy júzege asyrdy, 14 joba júzege asyrylý kezeńinde tur, taǵy 10-y – keleshektiń enshisinde. Bir ǵana meniń saparym barysynda jalpy quny 5 mıllıard dollardan asatyn kelisimsharttarǵa qol qoıylatyn bolady», – dedi Qazaqstan Prezıdenti.
Nursultan Nazarbaev Qa­zaq­stan men Fransıanyń saýda-eko­nomıkalyq jáne ınvestı­sıalyq yqpaldastyǵyna egjeı-tegjeıli toqtaldy.
«Fransıa Qazaqstannyń je­tekshi ekonomıkalyq serik­tes­teriniń qataryna kiredi. Bizdiń ózara saýda aınalymymyz sońǵy jyldary syrtqy jaǵdaıdyń kúrdeliligine qaramastan, 6 mıl­lıard dollar kóleminde turaqtap otyr. Fran­sýz bıznesiniń sońǵy 10 jylda bizdiń ekonomıkamyzǵa salǵan ınvestısıasy shamamen 12 mıllıard dollar boldy. Qazaqstan naryǵynda 130 fransýz kompanıasy túrli salalarda jumys isteıdi», – dedi Memleket basshysy.
Qazaqstan Prezıdenti búginde daıyn ónim alatyn birlesken tabysty jobalar júzege asyrylyp jatqanyn atap ótti. «Olardyń qatarynda «Alstom» elektro­voz­dary, «Evrokopter» tikushaǵy, «Pe­jo» jáne «Sıtroen» avtomo­bılderi, kún batareıalary, sement, «Danon» sút ónimderiniń jańa túrleri men basqa da óndirister bar. «Eırbas Defens end Speıs» kom­panıasymen birlesip Jerdi qa­shyqtan zondtaıtyn eki jer­serik ushyrdyq jáne ǵarysh apparattaryn qurastyrý-synaý kesheni ǵımaratynyń qurylysyn aıaqtaýdy josparlap otyrmyz», – dedi Nursultan Nazarbaev.
Memleket basshysy júzege asyrylyp jatqan birlesken ınvestısıalyq jobalar qatarynda Airbus kompanıasymen jumysqa arnaıy toqtaldy.
«Elimiz tıtannan joǵary tehnologıaly ónim jasaıtyn zaýyt ashty, bul ónim Airbus ushaqtaryn qurastyrý úshin paıdalanylady. Qazaqstannyń «Eır Astana» kompanıasy fransýz avıasıa ónerkásibiniń ushaqtaryn paıdalaný arqyly osy sıkldy aıaqtaıdy», – dedi Qazaqstan Prezıdenti.
Memleket basshysynyń aıtýynsha, Astana men Parıj arasynda tikeleı áýe qatynasyn ashý jáne ınvestorlar úshin vızasyz rejim engizý eki eldiń ınves­tısıalyq yqpaldastyǵyna oń áserin tıgizedi.
Sonymen qatar, eki eldiń isker toptary arasynda qol qoıýǵa ázirlenip jat­qan kelisimsharttar Fransıaǵa ýran jetkizý, avtomobıl ónerkásibi, sýmen qamtamasyz etý, qaldyqtardy joıý já­ne basqa da mańyzdy baǵyttardy qamtı­tyny atap ótildi.
Memleket basshysy Qazaq­stan­nyń ın­ves­tısıalyq ahýaldy odan ári jaq­­sartý, Bes ınstıtýttyq reformany já­ne Ult josparyn, «Nurly Jol» baǵ­darlamasyn júzege asyrý, sondaı-aq, Astanada EKSPO-2017 halyqaralyq ma­man­dandyrylǵan kórmesin ótkizýge daıyndyq jumystary týraly da aıtty.
Sońynda Nursultan Nazarbaev fran­­sýz bıznesin Qazaqstandy ındýs­trıa­landyrýǵa, josparlanyp otyrǵan iri kásiporyndardy jekeshelendirýge jáne qurylyp jatqan «Astana» halyqaralyq qarjy ortalyǵynyń jumysyna belsene qatysýǵa shaqyrdy.
Fransýzdyń iri kompa­nıa­larynyń basshylary Qa­zaq­stan­daǵy qolaıly ınvestısıalyq ahýal qalyptastyrý saıa­satyna joǵary baǵa berip, bizdiń eldiń ózin senimdi seriktes retinde kórsetkenin atap ótti. Sonymen qatar, fransýz bıznesiniń ókilderi Qazaqstan bıznesimen birlesip jańa jobalardy júzege asyrý isine zor qyzyǵýshylyq tanytty.
İs-sharaǵa Airbus, Alstom Transport, Vicat, Soufflet, Rothschild Group, Veolia Asia, Areva jáne basqa da kompa­nıa­lar­dyń basshylary qatysty.
Jalpy, osy arada eki el ara­syndaǵy saýda-ekonomıkalyq qaty­nastar jaıyna toqtala ketet­in bolsaq, ony ekpindi túrde óris alyp kele jatyr dep aıtýǵa bolady. Sońǵy jyldary Fransıa Qazaqstannyń saýda áriptesteri tiziminde eki jaqty saýda kólemi boıynsha Reseı, Qytaı, Nıderland jáne Italıadan keıin besinshi oryn­da keledi. Jyl saıynǵy saýda aınalymynyń 8 mıllıard dol­larǵa deıin sharyqtaǵan sáti de boldy. Bul – alystaǵy Fransıanyń Qazaqstanǵa qanshalyqty jaqyn­daı túsetindigin bildiretin tamasha kórsetkish. Sońǵy kezeńdegi daǵdarys aýyrtpalyǵy qan­sha­lyqty zardabyn tıgizdi desek te, alys elmen jáne ortasynda ashyq teńiz joly joq elmen júzege asyrylý ústindegi alys-beris saýdamyz kóp quldyraı qoıǵan joq. Mu­­nyń ózi eki el arasyndaǵy yn­ty­­maq­tas­tyqqa berik negiz bola alatyn fak­torlardyń biri bolyp tabylady.
Qazaqstan eksportynyń negizgi bóligin munaı, metal, hımıa ónim­deri quraıdy. Importqa óndiristik jabdyqtar, dári-dármek jáne kosmetıka, kólik, azyq-túlik, ushatyn jáne ǵarysh apparattary kiredi.
Qazaqstanda fransıalyq ka­pı­taldyń qatysýymen 128 kompanıa jumys isteýde. Solardyń qa­tarynda «Total», «Areva», «Da­non», «Vıkat», «Pejo», «Als­tom», taǵy basqa kompanıalar bar. Elbasynyń osy jolǵy Parıjde fransýzdyń bıznes kapıtandarymen kezdesýine mine, osyndaı Qazaqstanmen jumys isteýge múd­delilik tanytyp otyrǵan nemese bizdiń eli­mizge qyzyǵýshylyq tanyta bastaǵan kóptegen iskerler keldi.
Eki el arasyndaǵy iskerlik baı­la­nys­tardyń jandanýy úshin qos el úkimetteri tarapynan birqatar tıimdi tetikter uıymdastyrylǵan. Máselen, 1992 jyldan bastap Úki­metaralyq ekonomıkalyq ynty­maqtastyq jónindegi komısıa (ÚAK) jumys isteýde (komıs­sıanyń qazaq tarapynan teń tóraǵasy – Investısıalar jáne da­mý mınıstri Á.Isekeshev, fran­sýz tarapynan Syrtqy saýda jónin­degi memlekettik hatshysy – M.Fekl).
Fransıalyq iri kompanıalar basshylary kiretin Qa­zaq­stan-Fransıa İskerlik keńesin Qazaqstan tarapynan «Vızor Hol­dıng» AQ dırektorler keńesiniń tóraǵasy Aıdyn Káribjanov, al fransýz tarapynan «Total» kom­panıasynyń bas dırektory Iv-Lýı Darrıkarrer basqarady.
2015 jyldyń 29 naýryzynan bas­tap Astana-Parıj baǵytynda «Eır Asta­na» áýe kompanıasynyń tikeleı ushý baǵy­ty júıeli jol­ǵa qoıyldy. Fransıa aza­mat­tarynyń Qazaqstanǵa qysqa mer­zimdi (15 kúndik) saparlary úshin vızasyz rejim 2015 jyldyń 16 shildesinen 2017 jyl­dyń 31 jel­toqsanyna deıin uzartyldy.
Fransıa EKSPO-2017-ge qaty­sýǵa nıet bildirgen elder arasynda birinshi bolyp oǵan qatysý búdjetin belgiledi já­ne kórmedegi bolashaq fransýz pa­vılo­nynyń bas komısary etip P.Lorony taǵaıyndady.
Endi Fransıanyń álemdegi qazirgi jaǵdaıyna kelsek, Fransıa – Batys Eýropadaǵy eń iri memleket, jeriniń aýdany jaǵynan ol Ulybrıtanıadan eki ese úlken. Fransıanyń quramyna Korsıka araly, Jerorta teńizi men Bıskaı shyǵanaǵyndaǵy usaq araldar enedi. Fransýz odaǵy dep atalatyn bir­lestikke bes shalǵaı departament (Ka­rıb teńizi alabyndaǵy Gva­delýpa, Mar­tı­nıka, Ońtústik Ame­rıkadaǵy Gvıana, Ún­di muhı­tyndaǵy Reıýnon, Atlant muhı­tyn­daǵy Sen-Per men Mıkelon) jáne t.b. jatady. Halyq sany 64,6 mln. adam (1 shilde 2014). Fran­sýz­dar óz elin «gek­sagon» (alty­burysh) dep ataıdy.
Eýropanyń batysynda or­na­lasqan eldiń negizgi aýmaǵynyń qurlyqtaǵy shek­aralary soltús­tikte Belgıa men Lúk­sembýrg, shy­ǵysta Germanıa men Shveı­sarıa, al ońtústik-shyǵysta Ita­lıa jáne Monakomen, ońtústik-batysta Ispanıa jáne Andorramen shektesedi.
Eýropalyq odaqqa enetin damy­ǵan memleketterdiń aralyǵynda orna­lasýy Fransıanyń eýro­pa­lyq birtutas qarym-qatynas­tardyń damýyna oń áser etedi. Fransıanyń teńiz shekaralary Jerorta teńizi, Bıskaı shyǵanaǵy jáne La-Mansh buǵazyn bólip tur. Jaǵalaýlarynda keme toqtaıtyn qolaıly qoınaýlardyń bolýy Fransıanyń ejelden-aq teńiz kóliginiń damýyna jáne Eýropa ǵana emes, basqa dúnıe bólikterinde ornalasqan eldermen de syrtqy saýda ekonomıkalyq qatynastar ornatýyna alǵyshart boldy.
Mine, osyndaı elmen aradaǵy yn­ty­maqtastyqty nyǵaıtýdyń Qazaqstan úshin mańyzy zor ekendigi túsinikti. Elimizdiń táýelsizdiginiń eleń-alań shaǵynyń ózinde-aq Qazaqstan memleketiniń basshysy qazir arnasy jyldan-jylǵa keńeıip kele jatqan osy joldyń alǵashqy súrleýin saldy. Sóıtip, qazaq-fransýz qatynastarynyń negizgi qaǵıdattary Nursultan Nazarbaevtyń Fransıaǵa 1992 jyly jasaǵan resmı sapary aıasynda «Dostyq, yntymaqtastyq jáne ózara túsinistik týraly» shartqa qol qoıý sátinen bastaý aldy. Munan keıin Elbasy Fransıaǵa resmı jáne jumys saparlarymen toǵyz ret kelip qaıtty. Árbir kelgen saparynda qarym-qatynastyń jańa arnalarynyń bastaý alýyna serpin berip otyrdy.
Sol sekildi Fransıa eliniń basshy­ly­ǵy da eki el arasyndaǵy yntymaqtas­tyqty damytý maqsatynda Qazaqstanǵa birneshe ret kelip qaıtqandyǵyn aıta ketsek artyq bolmas. Máselen, eldiń burynǵy prezıdenti Fransýa Mıtteran Qazaqstanǵa 1993 jyly saparmen kelse, Nıkola Sarkozıdiń tabany Uly Dala eline 2009 jyly tıdi. Al elimizge ótken jyly Fransýa Ollandtyń kelýi joǵary deńgeıdegi yntymaqtastyqty nyǵaıta túsýge jaqsy dem berdi.
Sonymen, bul joly Elbasymyz fransýzdar eline on birinshi ret saparmen kelip otyr. Onyń tabysty bolatyndyǵy sapardyń alǵashqy sátinen-aq aıqyn ańǵaryldy. Óıt­keni, fransýz bıznesiniń ser­ke­leri Qazaqstanmen jumys isteý­ge nıetti ekendikterin tanytty. Sonyń bir kýási ekonomıka sala­syndaǵy birneshe qujatqa qol qoıylýy boldy. Mine, osy qu­jat­tardyń negizinde elimizdiń eko­no­mıkasyna qanshama qarjy quıylmaq.
Osynaý sátti bastalǵan sapar­dyń úlken núktesi Qazaqstan Res­pýb­lıkasynyń Prezıdenti Nursultan Nazarbaevtyń Fransýz Respýblıkasynyń Prezıdenti Fransýa Ollandpen Elıseı saraı­yndaǵy kezdesýi kezinde qoıyldy. Jalpy, tarıhy úsh ǵasyrlyq ýaqytty qamtıtyn bul ataqty saraı fransýzdardyń álemdik sharyqtaý sátteriniń kýásindeı bolyp, elge rýh berip keledi.
Fransıa – tarıhy tereńge ketetin elderdiń biri. Kóne tarıhynda qazirgi Fransıanyń Gal­lıa atanǵany belgili. Bul el azat­tyq úshin kúresken erjúrek galldardyń otany bolǵan. Tarıh­ty beriden alǵanda Rım ımpe­rıasynyń qurylýy men kúıreýi bul eldiń qazirgi saıası bet kel­betiniń qalyptasýyna úlken áser etti. Bizdiń zamanymyzdyń 486-shy jyly frankter Gallıadaǵy sońǵy Rım ıeligin basyp aldy da Frank memleketin qurdy. Mem­lekettiń Fransıa atalýy mine, osy oqıǵadan bastaý alady.
XVI-XVII ǵasyrlarda Fransıa Batys Eýropadaǵy ústemdik úshin «Qasıetti Rım ımperıasynyń» muragerleri Gabs­býrg­ter áýle­timen jáne Ispanıamen soǵys­tar júrgizdi.
1789 jyly bastalǵan Fransýz revolúsıasy nátıjesinde monarhıa men feodaldyq tártiptiń joıylýy, birinshi jáne ekinshi respýblıkanyń jarıalanýy, Napoleon Bonaparttyń bılikke kelýi, ımperıa qurýy fransýz tarıhynyń aıshyqty sátteri bolyp tabylady. Elıseı saraıy mine, osy Napoleon Bonaparttyń tusynda memleket basshysynyń resmı rezıdensıasyna aınaldyrylǵan bolatyn. Tarıhshylar sol kezden beri saraıdyń túri men kelbeti de ózgermegendigin aıtady.
Sol sekildi bizdiń qazaq hal­qy­nyń tarıhy da tereńge kete­tindigi belgili. Biz ózimizdi galldan qaharmandyǵy kem emes saq pen ǵunnyń urpaqtarymyz dep esepteımiz. Onyń ber jaǵynda taıaý­da ǵana Qazaq handyǵynyń quryl­ǵandyǵynyń 550 jyldyǵyn atap óttik. Kóptegen adamdardyń aıtýynsha, qazaq halqy men fransýz halqy arasynda uqsastyqtar da az emes. Kezinde shetel saıahatshylarynyń biri erkóńildiligi men serilik ómir saltyna qarap, «Qazaqtar – Azıanyń fransýzdary» dep jazǵanyn da osy oraıda eske sala ketkimiz bar. Bizdiń bir aıybymyz – kenjelep damyǵandyǵymyz, otar elder qatarynda bolǵandyǵymyz. Mine, osy olqylyqtyń ornyn toltyrý, Qazaqstandy álemdegi damyǵan elder qataryna qosý Elbasynyń basty maqsattarynyń biri bolyp keledi.
Qazaqstan Respýblıkasynyń Pre­zı­dentin Fransıa Prezı­den­tiniń qarsy alýy barynsha saltanatty deńgeıde ótti. Elbasyn aldymen Parlamentpen baılanys jónindegi memlekettik hatshy Jan-Marı Le Genom jáne Parıjdiń áskerı gýbernatorynyń ókili qarsy aldy. Al Elıseı saraıynda qurmetti qaraýyl sapqa turdy. Osy jerde Fransıa Pre­zı­denti Fransýa Olland Qazaqstan basshy­sy Nursultan Nazarbaevty qurmetti ás­kerı qaraýyl aldynda qarsy aldy. Biz­ge berilgen túsiniktemege sáıkes, mun­daı qa­byldaý barynsha qurmetti dep esep­te­le­di jáne sırek jaǵdaıda júrgiziledi eken.
Osy kúni Qazaqstan Prezıdenti Nursultan Nazarbaev Fransýz Respýb­lı­ka­­synyń Prezıdenti Fransýa Olland­pen kezdesti.
Shaǵyn jáne keńeıtilgen quram­da ót­ken kez­desý barysynda memleket­ter bas­­shy­lary ekijaqty yntymaqtas­tyq­tyń ne­gizgi baǵyttaryn talqylap, kún tárti­bindegi halyqaralyq ózekti máseleler jóninde pikir almasty.
Memleket basshysy Fransıa Qazaq­stan­nyń mańyzdy serik­tes­teriniń biri ekenin, elderimizdiń arasynda búginde eko­nomıka jáne saıasat máseleleri boıynsha tolyq túsinistik ornaǵanyn aıtty.
Nursultan Nazarbaev pen Fransýa Olland Fransıa Prezı­dentiniń Astanaǵa jasaǵan keıingi sapary kezinde qol jetken ýaǵdalastyqtardyń júzege asyrylý barysyn da talqylady.
Qazaqstan Prezıdenti búginde Asta­na men Parıj arasynda saýda-ekono­mı­kalyq, ınvestısıalyq, mádenı-gýma­nı­tarlyq, sondaı-aq, aeroǵarysh sala­laryndaǵy yqpaldastyqtyń zor áleýeti bar ekenin atap ótti.
Kezdesý barysynda Nursultan Nazarbaev Fransıa Prezıdentin İ dáre­jeli «Dostyq» ordenimen marapattady.
Kelissózder qorytyndysy boıynsha tómendegideı qujattar qabyldandy:
– Qazaqstan Respýblıkasy Pre­zı­denti men Fransýz Respýblıkasy Prezı­dentiniń birlesken deklarasıasy;
– Astana qalasynda ótetin Halyq­aralyq EKSPO-2017 ma­man­dandyrylǵan kórmesine Fran­sýz Respýblıkasynyń qaty­sýy týraly shart;
– Qazaqstan Respýblıkasynyń Inves­tı­sıalar jáne damý mınıstr­liginiń Aero­ǵarysh komıteti men Fransýz Res­pýb­­lıkasynyń Ǵaryshtyq zertteýler ult­tyq ortalyǵy arasyndaǵy Ǵarysh bo­ı­­yn­­sha yntymaqtastyqty damytý sala­­syn­daǵy nıettestik týraly deklarasıa;
– Qazaqstan Respýblıkasy Bilim jáne ǵy­lym mınıstrligi men Fransýz Res­pýblıkasy Joǵary bilim jáne ǵylym mı­nıstrliginiń birlesken deklarasıasy.

Derekkóz: egemen Qazaqstan