Elimizdiń Prezıdenti – El­basy Nursultan Nazarbaev ha­lyqtar dostyǵyna, ulttardyń ynty­ma­ǵyna únemi kóńil bólip keledi. Qazaqstan halqy Assambleıasy da sol ıdeıanyń jemisi. Assambleıa – ol ári irgetas, ári beıbitshilik, rýhanı kelisim mádenıetiniń n­e­gizgi qaǵıdaty. Ol – memlekettik organdardyń halyqpen jemisti únqatysýyn, barlyq etnostar ómirleriniń ózekti máseleleriniń sheshilýin qamtamasyz etýshi uıym. «Damýdyń syry – birlikte, tabystyń syry – tirlikte» degendeı, jolyn tapqan muratqa jetedi. Eńbegimizdiń janbaǵy bizdiń ortaq úıimizdi beıbitshiliktiń besigi etip, bardy baǵalaı bilýimizge baılanysty. Qazaqty qasıetti qarashańyraqqa balasaq, elimizdegi barsha etnostar – sol shańyraqqa shanshylǵan ýyqtar.
Mine, bul búgingi Qazaqstan halqy Assambleıasyna Elbasymyz Nursultan Ábishulynyń bergen sıpattamasy. Shyn mánisinde, osynaý Assambleıa qurylǵaly Qazaqstanda turatyn ózge ult ókilderi bir shańyraqtyń astyna birigip, ıaǵnı qarashańyraqqa qadalǵan ýyqtaı el Prezıdentiniń sarabdal saıasatynan nár alyp, ortaq úıimiz bolǵan Qazaqstannyń álemdegi aldyńǵy qatarly 30 eldiń qatarynan kórinýine atsalysyp keledi. Assambleıa ómirge kelgen alǵashqy kúninen bastap qazaq ultynyń kemel keleshegine senimmen qarap, eldiń damýyna ózderiniń súbeli úlesterin qosyp otyr.
Osynaý kóp ult ókilderiniń basyn biriktirgen Assambleıa atty dostyq otaýynyń qurylǵanyna bıyl 20 jyl toldy. Atalǵan shańyraq Qazaqstan Prezıdentiniń 1995 jylǵy 1 naýryzdaǵy Jar­lyǵymen Memleket basshysynyń janyndaǵy konsýltatıvtik-keńesshi organ retinde quryldy. Elbasymyz bul ıdeıany 1992 jyly el Táýelsizdiginiń bir jyldyǵyna arnalǵan Qazaqstan halqynyń birinshi forýmynda jarıalady. Mun­daı ınstıtýtty qurý qajet­tiligi saıası turǵydan, sondaı-aq, jańadan qurylǵan, táýelsiz, polı­etnosty, polıkonfessıaly mem­lekettiń turaqty damý tur­ǵysynan týyndaǵan edi. Bul bastama mádenıetaralyq únqatysýdy nyǵaıtýdyń jańa kezeńiniń negizin qalap, etnosaralyq qatynastardy damytý máselelerin joǵary deńgeıde sheshýge múmkindik jasaıtyn álemdik tájirıbedegi tyń baǵyt bolyp tabylady. Onyń damýy barysynda N.Nazarbaevtyń etnosaralyq toleranttylyq pen qoǵamdyq kelisimniń qazaqstandyq úlgisi qalyptasty. Osy jyldar ishinde Qazaqstan halqy Assambleıa­synyń ınstıtýttyq qury­lymy nyǵaıyp, qoǵamdy uıys­tyrýshy áleýeti tolysty, ol – ha­lyq dıplomatıasynyń ma­ńyzdy kúretamyryna aınaldy. Búginde Assambleıa el Prezıdenti tóraǵalyq etetin konstıtýsıalyq organ bolyp tabylady.
Sondaı-aq, ústimizdegi jyly ózderiniń qurylǵanyna 20 jyl­dyq torqaly toıyn atap ótip jatqan osynaý Assambleıa ókilderi elimizdegi qoǵamdyq tártiptiń nyǵaıýyna, sot júıesiniń jetilýi­ne ózindik úlesterin qosyp kele jatqyndyǵyn atap ótýimiz kerek. Ásirese, Elbasymyz tarapy­nan usynylyp, Assambleıa­dan saılanǵan Parlament depýtattary el tynyshtyǵyn saqtaýǵa atsalysyp keledi. Kóptegen ıgilikti bastamalardyń uıytqysy bolyp júrgenine turǵyndarymyz kýá ­bolýda.
Sol sıaqty, elimizdegi sot salasynda da ózge ult ókilderi jergilikti ult ókilderimen, ıaǵnı memleket quraýshy ult múshelerimen birge tatý-tátti, bir jeńnen qol, bir jaǵadan bas shyǵaryp, qoıan-qoltyq eńbek etýde. Sondyqtan osy áriptesterimiz ben Qazaqstan halqy Assambleıasynyń barlyq múshelerin osynaý tarıhı mereıli merekesimen quttyqtaımyz. Qa­zaq­stannyń damýyna úles qosa berýlerine tilektespiz.

Derekkóz: egemen Qazaqstan