Otyzdan astam kitaptyń avtory – áńgime jazýdyń sheberi, kórnekti prozashy, Qazaqstannyń eńbek sińirgen qaıratkeri Álibek Asqarov Birikken Ulttar Uıymy aıasynda qurylǵan halyqaralyq Jazýshylar odaǵynyń «Ult maqtanyshy» tósbelgisimen marapattalyp otyr.
Jazýshyǵa úlken jaýap­ker­shilik júkteıtin halyqaralyq syılyq Álibek Asqarovtyń ózi basqaryp otyrǵan QR Ulttyq kitaphanasynyń ujymy aldynda tabystalyp, qazaq ádebıeti úshin aıtýly oqıǵaǵa Almatydaǵy zıa­ly qaýym ókilderi ortaqtasty. Jazýshynyń «Sosıalızm áńgi­meleri» men «Áıel parasaty» toptamasyna berilgen tósbelgini «Beıbitshilik álemi» halyqaralyq qazaq shyǵarmashylyq birles­tiginiń Qaraǵandy oblysy bo­ıynsha ókiletti dırektory Muha­medqalı Baımuhanov tapsyrdy.
Ári qazaq qalamgerleriniń de qaýyshyp, dıdarlasýyna septesken saltanatty oqıǵada ádebıettiń, áńgime janrynyń tóńireginde tamasha pikirler aı­tyldy. Álibek Asqarovtyń qalamyna arqaý bolǵan áıel janynyń kúrdeliligi, ana pa­rasaty, qıyndyq kórse qaı­ys­pa­ǵan qazaq qyzdarynyń kórkem beınesi týraly sóz boldy. Kór­kem áde­bıetke degen zamana talaby, oqyrman suranysy jaıly múd­deli oılar ortaǵa salyndy.
– Álibek Asqarov – búgingi ádebıetimizdiń kórnekti ókili, qoǵam qaıratkeri. Jazýshynyń sony tásil, tyń órnektermen órilgen shyǵarmalary estetı­kalyq turǵydan áserli, kór­kemdik deńgeıi bıik dúnıeler. Sondaı-aq, ol shyǵarmalar obraz somdaýdaǵy ózindik tásilmen, boıaýynyń qa­nyqtyǵymen, ta­bıǵatty sýret­teýdegi názik na­qyshtarymen da­ralanady. Tabıǵaty tunyp turǵan Ka­ton­qaraǵaı óńiriniń týmalary – Qalıhan Ysqaq, Oralhan Bókeev syndy kórkemsóz zergerleriniń laıyqty izbasary bola bilgen Álibek Asqarov osy úrdisti jal­ǵastyryp keledi.
Álibek Asqarovtyń árbir shy­ǵarmasy tylsym tabıǵatqa, týǵan jerge, aýyl adamdaryna degen súıispenshilikke, júrek jylýyna toly. Jazýshy sheberliginiń bir syry – kez kelgen ýaqyt ózge­risterin, zaman talqysyn oqyr­man kóz aldyna keletindeı qazaq­tyń qarasózimen somdaı bilýi, deıdi áriptesteri qalamgerdiń qoltańbasy jaıynda.
Almaty zıalylarynyń rýhanı ordasyna aınalyp kele jatqan Ulttyq kitaphanada jalpy ádebıetke qatysty, onyń ishinde, sýretshi-jazýshy Álibek As­qarovtyń týyndylaryn daralaıtyn aıshyqty stıli haqynda ádemi áńgime órbidi.

Derekkóz: egemen Qazaqstan