Jumys saparymen Qos­ta­naıǵa kelgen «Nur Otan» par­tıasy Tóraǵasynyń birin­shi orynbasary Asqar Myrzah­metov partıanyń oblystyq fılıalynyń kezekten tys HHİ konferensıasyna qatysty. Oblystyń, aýdannyń basshylary, kásipkerler, partıa belsendileri qatysqan oblystyq fılıaldyń bul konferensıasynda aldymen fılıaldyń jańa tóraǵalyǵyna óńirdiń jańa basshysy Arhımed Muhambetov biraýyzdan saılandy.
Asqar Isabekuly fı­lıal­dyń partıa isinde tájirı­besi mol jańa basshysyna tabystar tilep, onyń jumy­syn aldaǵy ýaqytta bıikterge kóteretinine senim bildirdi, kýáligin tabystady. Óz kezeginde oblystyq fılıaldyń jańa tóraǵasy, oblys ákimi Arhımed Mu­ham­betov te barlyq ıgi tájirı­belerin partıa jumy­synyń jaqsarýyna jumsaı­tynyn málimdeı otyryp, ózine artylǵan senim úshin rahmet aıtty.
Oblystyq fılıal tór­aǵa­synyń birinshi orynbasary Álıa Saparova baıandamasynda bastaýysh uıymdar jumysyna naqty toqtaldy. Oblystyq fılıal partıanyń elimizdegi eń iri uıymdarynyń birinen sanalady. Búginde partıanyń oblystyq qurylymynda 22 fılıal jumys isteıdi. Partıa músheleriniń sany 61 213 adam bolyp otyr. Jyl basynan beri partıa qataryna qabyldanǵan 2 459 adamnyń 1 894-i shaǵyn jáne orta kásipkerlik ókilderi. Álıa Súıindikqyzy muny Ortalyq apparattyń partıa qataryn tolyqtyrýda jalań sannan sapaǵa nazar aýdarý jónindegi qoıyp otyrǵan talabyn oryndaýǵa baǵyttalǵan jumystardyń bir sarasy ekenin aıtyp ótti.
– Oblysta 445 bastaýysh partıa uıymy qyzmet jasaıdy. Bul uıymdardyń jelisin udaıy jetildirýmen qatar, olardyń qyzmetin árbir azamattyń ómirine oń yqpalyn tıgize alatyndaı tıimdi deńgeıde uıymdastyrý baǵytynda izdenip kelemiz. Ótken jyly irilendirilgen bastaýysh partıa uıymdarynyń ishinen 1000-nan astam partıa toptary quryldy, – dedi oblystyq fılıal tóraǵasynyń birinshi orynbasary Álıa Saparova.
Sapa bolý úshin bastaýysh partıa jetekshileriniń saıası jumys, partıa talaby men onyń maqsaty týraly bilimi men biligi kóterilýi tıis, sonda ǵana jergilikti jerlerde atqarylǵan jumystar jandana túseri haq. Sol úshin oblys óńirindegi 90 bastaýysh uıymnyń tóraǵalary partıanyń Ortalyq apparatynyń Saıası menedjment mektebi uıymdastyrǵan biliktilikti arttyrý kýrstarynda oqyp keldi. Bastaýysh uıymdar jumys istegende ǵana partıa jumysynyń nátıjesi bolady. Olardyń arasynda da jumystyń júrýine yqpaly bolar báseke, jarys bolýy tıis. Bul bastaýysh uıymdardyń halyqty ózine kóbirek tartýyna yqpal etedi. Sondyqtan «Eń úzdik bastaýysh partıa uıymdary» respýblıkalyq baıqaýy elimizdegi partıa uıymdarynyń halyqpen tyǵyz baılanys ornatýdaǵy áleýetin, qabiletteri men búgingi qyzmetin baǵalaýǵa jol ashty. Baıqaýdyń aýmaqtyq kólemdegi birinshi aınalymynyń qorytyndysy boıynsha 342 bastaýysh partıa uıymy iriktelip shyqsa, oblystyq saıysqa jeńimpaz bolyp tanylǵan 43 uıym ótti. Kelesi respýblıkalyq deńgeıge laıyqty degen uıym saraptaýdan ótýde. Sońǵy eki aıdyń ishinde 500 jumyskeri bar úlken eki kásiporynda partıanyń bastaýysh uıymy iske kiristi.
Konferensıada partıanyń bastaýysh uıymy jumys isteıtin Meńdiǵara aýdanyndaǵy «Qarqyn» jaýapkershiligi shekteýli seriktestiginiń dırektory, Qazaqstannyń Eńbek Eri Saıran Buqanov sóz aldy. Ol aýyl sharýashylyǵy jetistikterimen qatar, aldan shyǵyp otyrǵan problemalarǵa toqtaldy. Memlekettiń aýyl sharýashylyǵyna jasap otyrǵan qamqorlyǵy ushan-teńiz ekenin, «Sybaǵa», «Altyn asyq», «Qulan» baǵdarlamalarynyń da paıdasyn aýyl turǵyndary sezinip otyrǵanyn, mal sany burynǵydan kóbeıip kele jatqanyn aıtty.
– Degenmen, keıbir máselelerdiń sheshimi qaıta qaralmasa, ol aýyl sharýashylyǵyndaǵy ónimdiliktiń tómendeýine áser etedi. Qazir maıly daqyldarǵa suranys úlken. Alaıda, daqyldyń bul túrine beriletin sýbsıdıa burynǵydaı gektaryna tólenbese, dıqandar onyń alqabyn azaıtýy ábden yqtımal. Sonymen qatar, maıly daqyldardyń tuqymyn syrttan alamyz. Ony ózimizde shyǵaratyn jaǵdaı jasalýy tıis, sonda dıqan shyǵyny azaıady, – dedi Saıran Bálkenuly.
«Nur Otan» partıasy Tóraǵasynyń birinshi orynbasary Asqar Myrzahmetov osy jumystardyń basty maqsaty Elbasy, partıa Tóraǵasy atap ótkendeı, «qarapaıym halyqty tolǵandyratyn ózekti máselelerdi eskerýsiz qaldyrmaý, partıanyń óńirlerdegi jumysyn nyǵaıtý» ekendigin jetkizdi. Jergilikti fılıaldardyń qadrlyq áleýetiniń artqany olarǵa júktelip otyrǵan naqty jumystar sapasynyń artýyna múmkindik beretinin atap kórsetti. Ortalyqta bul másele erekshe nazarǵa alynyp, fılıaldar qyzmetin baǵalaýǵa arnalǵan nysanaly ındıkatorar ázirlengeni aıtyldy. Partıa fılıaldary jumysynyń tıimdiligin arttyrý maqsatynda partıa Tóraǵasynyń birinshi orynbasary men óńirlik fılıaldar arasynda memorandýmǵa qol qoıylmaq. Bul qujat naqty kórsetkishter men ındıkatorlar arqyly «Nurly Jol» baǵdarlamasyn, sol sıaqty memlekettik jáne salalyq baǵdarlamalardy júzege asyrýdy, búdjettiń atqarylýyna partıalyq baqylaý júrgizýdi qarastyrady.
Asqar Myrzahmetov Elbasy qoıǵan mindetterdi oryndaý barysynda partıa yqpalyn kúsheıtý úshin partıa ishinde jasalyp jatqan jumystarǵa da toqtaldy. Sondaı-aq, «Nur Otan» partıasynyń ǵımaratynda oblystyń tańdaýly belsendi jastarymen kezdesti. Asqar Isabekuly jastardyń búgingi kúnniń ózekti máselelerin qozǵaǵan túrli suraqtaryna jaýap berdi. Saparynyń sońyna qaraı, Asqar Myrzahmetov Qostanaı qalasyndaǵy jeltoqsan aıynda tapsyrylatyn kóp qabatty turǵyn úıdiń qurylysy jumysymen tanysty.

Derekkóz: egemen Qazaqstan