Bıyl Semeıdegi tatar etnomádenı birlestiginiń qurylǵanyna 25 jyl tolyp otyr. Dostyq úıinde uıymdastyrylǵan sharada tek tatar qyzdary emes, qazaq, orys arýlary da óner kórsetip, san ǵasyrlyq tarıhy bar tatar halqynyń ulttyq erekshelikteri men dástúrlerin dáriptedi. Jáne ártúrli ult pen ulys ókilderi arasyndaǵy dostyqty nyǵaıtýǵa da kóp mán berildi.
Osyǵan oraı uıymdastyrylǵan arýlar saıysynda qyzdar baıqaý sharty boıynsha aldymen ózderin tanystyryp, keıin tatardyń ulttyq taǵamy – «salma» daıyndaýdan jarysty. Qazylar alqasy aldyn ala daıyndalǵan aspazdyq dámderdiń de qaısysy úzdik ekenin tańdady. Dástúrli kıim úlgisin tanystyrý da baıqaý sharttarynyń biri boldy. Qatysýshylar zıatkerlik bólimde tatar maqaldarynyń mánin ashýǵa kúsh salsa, shyǵarmashylyq saıysta án aıtyp, bı bıledi. 3 saǵatqa sozylǵan baıqaýdyń bas júldesi Semeı medısınalyq ýnıversıtetiniń stýdenti Gúlılá Nasyrovaǵa buıyrdy. Basqalary da syı-sıapattan qur qalǵan joq.
«Men Qazaqstanda týyp-óstim. Qazaqstan – meniń Otanym. Biraq, ózim tatar bolǵandyqtan, osy baıqaýlar arqyly ózimniń tatar ekenimdi dáleldegim keldi. Tatar qyzynyń qolynan bári kelýi kerek. Iaǵnı, ol bolashaqta kelin bolady. Qonaq kútýdi, taǵam pisirýdi bilýi tıis. Bolashaqta bári jaqsy bolsyn!» – dedi baıqaýdyń bas júldegeri Gúlılá Nasyrova.
Semeıde, sondaı-aq, Qazaqstan halqy Assambleıasy jylyna oraılastyrylǵan tatar óneriniń halyqaralyq festıvali ótti. Osymen 16-ret uıymdastyrylǵan mádenı sharaǵa Qazaqstan men Reseıdiń 400-den astam óner ujymy qatysty. 3 kúnge sozylǵan óner báıgesinde túrli tatar ánderi men bıleri ǵana emes, mýzykalyq aspaptardyń sıqyrly úni de kórermen kóńilin jaýlap alǵany anyq.
Qazaqstan halqy Assambleıasynyń 20 jyldyǵyna oraı «Tatar halqynyń tarıhı-mádenı muralary jáne qazirgi zaman» atty taqyrypta halyqaralyq ǵylymı-tájirıbelik konferensıa bolyp ótti. Bul sharany «Tatar» qoǵamdyq ortalyǵy men tatarlardyń álemdik kongresi jáne Semeı qalasynyń ákimdigi uıymdastyrdy. Qazaqstan halqy Assambleıasynyń 20 jyldyǵyna jáne Shyǵys Qazaqstan oblystyq tatar qoǵamdyq ortalyǵynyń 25 jyldyǵyna oraı ótkizilgen sharaǵa ǵalymdar, ólketanýshylar, qoǵam qaıratkerleri qatysty.
– Atalǵan sharany ótkizýdegi maqsat álemniń ár túkpirine tarydaı shashyraǵan tatar ultynyń etnostyq mádenıetine qoǵamnyń, zıaly qaýymnyń nazaryn aýdarý, onyń baı murasyn saqtaý bolatyn, – deıdi sharany uıymdastyrýshylardyń biri Kamalıa Ismaılova. Halyqaralyq ǵylymı konferensıaǵa Máskeý, Qazan, Almaty, Óskemen qalalarynan 40-tan asa qurmetti meıman keldi. Sondaı-aq, irgeli basqosýǵa Semeı qalasyndaǵy Shákárim atyndaǵy memlekettik ýnıversıtettiń ǵalymdary, atap aıtqanda, tarıh ǵylymdarynyń kandıdaty M.Kárimov, belgili ǵalym, tarıhı muralardy zertteýshi Amantaı Isın keldi. Basqosýǵa óńirimizdegi murajaılar men kitaphanalar qyzmetkerleri, joǵary oqý oryndarynyń ustazdary men stýdentter qaýymy da qatysty.
Sharaǵa qatysýshylardy eń aldymen Semeı qalasynyń ákimi Ermak Sálimov arnaıy quttyqtady. Sóz alǵandar qatarynda, sonymen qatar, Halyqaralyq tatarlar kongresi tóraǵasynyń birinshi orynbasary D.Shakırov, Tatarstannyń Qazaqstandaǵy ókili R.Valıýllov, eńbek ardageri, Tatar qoǵamdyq qory tóralqasynyń múshesi R.Hasanova boldy.
Sharadan soń kúrdeli jóndeý jumystary júrgizilip, kórkeıip kele jatqan Ertis jaǵalaýynda tatar aqyny, pýblısıst Ǵabdolla Toqaıdyń eskertkishine gúl qoıý rásimi ótti. Baýyrlas tatar halqynyń uly perzentine arnalǵan sharaǵa Semeı qalasynyń ákimi Ermak Sálimov, Halyqaralyq tatarlar kongresi tóraǵasynyń birinshi orynbasary Danıs Shakırov, sonymen qatar, depýtattar men shaharymyzdyń zıaly qaýym ókilderi qatysty.
Semeı óńirinde júzden astam ult pen ulys ókilderi ómir súredi. Olar tili men salt-dástúrin saqtap, mádenıetin baıytýda. Solardyń qatarynda tatarlar da bar. Qalada 12 myńnan asa tatar turady. Olar tili men dástúrinen eshqashan ajyraǵan emes. Óz arasynan shyqqan talanttardy da áspettep otyrady.
Derekkóz: "Egemen Qazaqstan"
