El ishinde jeńil ónerkásiptiń taptyrmas shıkizatyna paıdalanatyn tórt túlik mal júni óńdelmeıtini aqıqat.
San jyldar boıy mal sharýashylyǵyn shyǵynǵa batyryp, óńdelmeı qoqysqa tastalatyn mal júnin halyqtyń ıgiligine paıdalaný úshin Atyraý oblysynyń ákimi Baqtyqoja İzmuhambetov aımaqqa basshy bolyp taǵaıyndalǵan sátte-aq aýqymdy jobany josparlady. Nátıjesinde, «Caspiy Lana Atyrau» túıe jáne qoı júnin óńdeý jáne toqyma fabrıkasy aǵymdaǵy jyly Táýelsizdik kúni qarsańynda paıdalanýǵa beriletin bolady. Elimizde tolyq qýatyna qosylatyn balamasy joq jańa jobany jeke kásipker Álimjan Baljigitov «Atyraý» áleýmettik-kásipkerlik qorporasıasynyń qoldaýymen júzege asyrýda. 
Ózge aımaqtarda joq jobany júzege asyrýǵa táýekel etken kásipker Álimjan Qapanulynyń aıtýynsha, jeltoqsan aıyn­da paıdalanýǵa berilýi josparlanǵan fabrıkada alǵashqy kezeńde 100 tonna túıe jáne 350 tonna qoı júni óńdeýden ótkiziledi. Tarqatyp aıtqanda, maldyń júnin alǵashqy óńdeý kesheni 2 sehtan turady. Birinshisi – maldyń júnin jýyp-tazalaý, boıaý, ekinshisi – tazalanǵan júndi tarap, túbitin alý. Túıe men qoı júnin óńdeý jáne toqyma fabrıkasy týraly sóz qozǵalǵannan-aq, oblys ortalyǵy men jeti aýdan halqy túıe men qoı júnin jınap, fabrıkaǵa ótkizýge daıyndyq jumystary bastalyp ketti. Alǵashynda bastapqy óńdeý satylarynan ótken shıkizat toqyma sehyna jóneltiledi. 
«Joba birneshe kezeńnen turady. Aldymen tekstıl salasynda jylyna 400 myń jumsaq jamylǵy kórpe shyǵaramyz. Kelesi kezeńde bul jumystar kúrdelenip, naryqqa beıim ónim túrlerin kóbeıtý maq­satymyz bar. Osy jobany saraptaý kezinde biz, trıkotaj buıymdaryn shy­ǵaratyn sehymyzǵa laıyq maman­dardyń oblysta joq ekenin bildik. Trıkotajdan ónim shyǵarý óte kúrdeli jumys eken. De­genmen biz trıkotajdan kostúmnen bas­tap shulyqqa deıin sapaly ónim shyǵarýǵa bel býyp otyrmyz. Bıylǵy oqý jylyna Máskeýdegi ýnıversıtetke 8 adamdy oqýǵa jiberdik. Olar oqýdan tys kezde fabrı­kamyzǵa kelip, Máskeýden ótken praktı­kalyq tájirıbelerimen bólisedi ári oqýdy aıaqtaǵan soń kásibı maman bolyp ysylyp keler degen úmitimiz bar. Fabrıka paıdalanýǵa berilgen soń, jergilikti jer­den 150 adam jumysqa qamtylady dep bol­jap otyrmyz» degen Álimjan Qapan­uly aǵymdaǵy jyldyń jeltoqsan aıynda fabrıkany iske qosýǵa qaýyrt jumys júrýde dedi. Naqtysynda, qazirgi tańda jumystyń 80 paıyzy aıaqtalǵan. 
Jún jýý sehyna qural-jabdyqtar alýǵa «QingdaoYuanQuanMachineryCO» kompanıasymen, toqyma sehy úshin jańa tehnologıany jetkizýge ıtalályq VICOTEXSRL kompanıasymen kelisimshart jasalǵan. Jeńil ónerkásibi qarqyndy damyǵan shetelderdiń bilikti mamandary keńesshi retinde tartylady. Qazirdiń ózin­de Atyraýda bastapqy óńdeýden ótkiziletin júnge Reseı, Qytaı jáne Mońǵolıa elderiniń qyzyǵýshylyǵy baıqalyp otyr. Sonymen birge Eýropa elderi tehnolo­gıasymen kıim tigýdi qolǵa alý joldary qarastyrylady. Osyǵan baılanysty Fransıa, Italıa jáne Belgıa sekildi elderdiń jetekshi mamandarynan keńes alý atalǵan jobanyń sátti jumys istep ketýine úlesin qosary sózsiz. 
 Aımaq basshysy Baqtyqoja İzmuham­betov balamasy ázirge joq fabrıka ónim­deri­niń básekege qabiletti bolatyndyǵyna senimdi. Alǵashqy tapsyrysty toqyma fabrıkasyn qural-jabdyqtarmen qamty­ǵan ıtalályqtardyń ózderi jasap, to­qyma fabrıkasynyń alǵashqy ónimderin jetkizip berýge ótinish bildirgen. 
– Aýdandardy aralaǵanymda máslıhat depýtattary aýylsharýashylyq taýar­laryn óndirý men jún óńdeý máselesin jıi kóterip, usynys-pikirlerin joldaǵan edi. Bul joba Údemeli ındýstrıalyq-ın­novasıalyq damý baǵdarlamasy boıynsha qolǵa alyndy. Oblysta túıe basy kóbeıý­de. Qazir 60 myńdaı túıe bar. Budan basqa, Mańǵystaý men Batys Qazaqstan oblysta­ry mal júnin jetkizýge ýáde berip otyr. Mańǵystaý oblysynda 70 myńdaı túıe bar. Biraq qos órkeshti túıelerdiń júni aq jáne túbitti bolaryn eskerip, bola­shaqta aq tústi ári qos órkeshti túıeler sanyn kóbeıtýdi josparlap otyrmyz, – degen oblys ákimi Baqtyqoja Salahat­dınuly fabrıka keler jyly tolyq qýatyna shyǵady dep senimmen aıtty.

Derekkóz: Aıqyn-aqparat