Ákimder jurttyń áleýmettik jaǵdaıyn jaqsartýǵa dep búdjetten bólingen qyrýar qarjyny bıyl da usata almady. Jyl aıaqtalyp qalǵanymen qazynanyń bir jarym trıllıon teńgesi áli sol kúıi qozǵalmaǵan. Saldarynan myńdaǵan otbasy baspanasyz qaldy.

Al qanshama úı, jylý, jaryq, sýǵa jarymaı otyr. Úkimettegiler jergilikti bıliktiń bul áreketin alaıaqtyqqa teńedi. Bul týraly "Qamshy" portaly KTK arnasyna silteme jasaı otyryp habarlaıdy.

Bul joly da halyqtyń jaǵdaıyn jaqsartý úshin bólingen aqshanyń 60 paıyzy ǵana ıgerilipti. Ákimder sonda da toıymsyz dep shúılikti úkimettegiler.

“Bıyl búdjetti josparlaǵanda aımaqtar suraǵan qarjyny 2 trıllıon teńgege qysqarttyq. Ákimderdiń qolyn bıyl qaıtarsań, kelesi jyly qaıta ótinish jazady”, – deıdi Qarjy mınıstri Baqyt Sultanov.

Biraq sol ákimder bar aqshany usata alamaı otyr. Máselen, baspana salý úshin bıyl qazynadan 140 mıllıard teńge bólinipti. Sony sheneýnikter oryndy jumsaı almaǵan. Saldarynan qanshama otbasy úısiz júr.

“Jalǵa beriletin úıdiń qurylysyna kelsek, búdjetten bólingen 92 mıllıard teńgeniń tek 51 mıllıardy ıgerilgen. Al, qurylysy buryn bastalǵan jobalardy aıaqtaý úshin 30 mıllıard teńge qarastyrylǵan. Jalpy, bul salada 355 mıllıon teńge ıgerilmeı qalalady degen qaýip bar”, – deıdi Ulttyq ekonomıka mınıstri Erbolat Dosaev.

Sondaı-aq, jurtty jumyspen qamtý baǵdarlamasyna, jylý júıesi men sý qubyrlaryn jańartýǵa bólingen qarjy da jelge ushqan. Ásirese, Pavlodar, Jambyl, Almaty, Atyraý, Mańǵystaý oblystaryndaǵy jaǵdaı syn kótermeıdi. Eń soraqysy qara tizimdi Astana bastap tur. Elordadaǵy sheneýnikter 7 mıllıardqa jýyq teńgeni usata almapty.

Búdjet qarjysynyń oryndy jumsalýyna qatysty Bas prokýratýra da tekserý júrgizgen eken. Quzyrly organnyń málimetin kórip, jaǵamdy ustadym deıdi Darıǵa Nazarbaeva.

“Tekserýdiń nátıjesinde kóptegen zańbuzýshylyq anyqtalǵan. Bul degenimiz qazyna qarjysyn ysyrap etý, alaıaqtyq. Jergilikti bılik jaýap berýi tıis. Qazir oblystarda jeti memlekettiń baǵdarlama júzege asyrylýda. Bul baǵytta bólingen aqsha da sol ákimderdiń qolynda”, – dedi premer-mınıstrdiń orynbasary Darıǵa Nazarbaeva.

Ákimder bar aqshany dalaǵa shashyp jatsa, munaı óńdeıtin zaýyttardy jóndeý jumystaryna aqsha jetpeı jatyr. Qarjynyń tapshylyǵynan Atyraý men Shymkenttegi munaı óńdeý zaýytyndy jańartý keıinge qaldyrylýy múmkin. Iaǵnı úkimettiń 2017 jyly janarmaıdan  tapshylyǵynan qutylamyz degen ýádesi de sóz júzinde qalmaq. Al, qara altyn qunynyń quldyraýynan kelesi jyly 47 myń munaıshy jumystan qysqaryp qalýy múmkin.

“Qazir bizde aqsha tapshy, bárine jetpeı jatyr. Sondyqtan memlekettiń ár tıynyn eseptep, únemdeýimiz kerek”, – deıdi premer-mınıstr Kárim Másimov.

Sonymen, búdjetten bólinip qoıǵan 1 jarym trıllıon teńge ıgerilmeı bos jatyr. Syn estigen sheneýnikter qyrýar qarjyny nebary bir jarym aıdyń ishin oryndy jumsap úlgeremiz dep sendirip otyr. Al uzaq úzilisten keıin mınıstr men ákimderdi 4 saǵat boıy silkigen Kárim Másimov 8-shi jeltoqsanǵa deıin eki mańyzdy qujat: jurtty jumyspen qamtý jáne daǵdarysqa qarsy baǵdarlamalaryn qabyldap úlgerýge tapsyrma berdi.