«Erkek pen áıel arasynda dostyq bola ma?» degen saýal kópten beri kókeıde júrgen suraqtardyń biri. Bul turǵyda keıbiri dostyqtyń baryn aıtsa, biri dostyq ataýly erkek pen áıel arasynda bolmaıdy degen oıda. Endeshe, taqyrypty arqaý ete otyryp taldaý júrgizip, talqyǵa túsirsek.

«Turmystyń túrli synynan súrinbeı ótti dese de,

Jubaıyń dosyń boldy ma? Mine, bul – basty másele…

…Taǵdyrdan qashý múmkin be, júrseń de qandaı jolmenen,

Bir mándi suraq aldyńda turady ylǵı kóldeneń:

«Jubaıyń dosyń boldy ma samǵatqan sezim shyraıyn,

Naq sondaı uly baqytty berdi me saǵan qudaıym?

Oınaı ma onyń kózinde sezim men rýh jarqyly,

Uǵa ma ol shattyq muńyńdy jetinshi túısik arqyly?…» degen eken

M. Shahanov «Jetinshi túısik» óleńinde. Osy tarapta aqyn mahabbat pen dostyqtyń qatar júretinin baǵamdasa kerek. Iaǵnı, túsinistik bolsa, dostyq pen mahabattyń egiz uǵym ekenin aıtady.

Ánshi Madına Sádýaqasova bolsa, er men áıel arasynda baýyr, aǵa retinde dostyq sózsiz bolady dep pikir bildirýshilerdiń biri.

Madına Sádýaqasova, ánshi:

«Erkek pen áıel arasynda dostyq bolady. Sebebi, dostyq ózinde syılastyq, túsinispeýshilik, úlken senim jatyr dep bilemin».

Sondaı-aq, Samat Dosymbetov atty oqyrman oıynsha:

«Erkek pen áıel arasynda dostyq bolady. Sebebi, áıel aqylshy, áıel dana, olar bárine jaýapkershilikpen qarap, parasattylyq tanytady, árkez túsine biledi. Buny meniń aldymda qanshama aqyn-jazýshylar, ǵulamalar da aıtyp ketken. Tipti, poezıa tarlany Muqaǵalıdiń ózi Farıza aqynǵa «Qazaqtyń jigitinen dos taba almaı, qyz da bolsań, men saǵan muń shaǵamyn» deıdi.

Al Ánshi Álı Oqapov bolsa, múldem kereaǵar pikirde. Onyń oıynsha, qyz ben jigit arasynda eshqandaı da dostyq bolmaıdy eken.

Ánshimen kelisetin jurtshylyq ta az emes.

Madına Erkinqyzy atty oqyrman:

«Meniń janyma jaqyn tutqan jan dosym bar edi. Maǵan aǵa ornyna aǵa bola bildi, qınalǵan sátte qasymnan tabylyp, jabyrqaǵanda janymda boldy. Árdaıym oǵan ishimdegi bar syrymdy aıtatynmyn. Meni renjitken adamardy da jaı qaldyrmaıtyn. Qamqorlyǵy, baýyrmaldyǵy, shynaıy dostyǵy úshin oǵan rıza bolatynmyn. Biraq, báriniń bir sátte kúl-talqany shyqty. Senip júrgen adamym sezimi bar bolǵan soń ǵana dosym bolǵandyǵy meni qatty qynjyltty. Osydan keıin men jigit ataýly men qyz arasyndaǵy dostyqqa múldem senbeımin» deıdi.

Sabına Jamaý, oqyrman:

«Jigit pen qyz arasynda dostyq bolady dep oılaýshy edim. Biraq 12 jyl boıy janymda júrgen dosym meni jaqsy kóretin bolyp shyqty. Men ony qımaımyn, aramyzdaǵy dostyqtyń óshkenin qalamaımyn, degenmen... ári qaraı bulaı jalǵasa berse onyń sezimimen oınap júrgen tárizdi bolarmyn?!»

Másele týrasynda kópshilik kózqarasyna súıensek, júrgizilgen saýalnama nátıjesinde, 10 adamnyń 3-eýi dostyq bar dese, 7-eýi munymen kelispeıdi.

Nelikten? Al siz qalaı oılaısyz?

DEREKKÓZ: anabol.kz