Qazaqstan Iordanıaǵa oq ótkizbeıtin 50 áskerı kólik eksporttamaq. Bul týraly»Qamshy» portaly QazAqparatqa silteme jasap habarlaıdy.

"Lısenzıalyq kelisim boıynsha, kólikterdi álemniń 12 eline, TMD, Baltyq memleketterine, Taıaý Shyǵys, Qytaı, Reseıge sata alamyz. Munda arnaıy saýytty kóliktermen qatar, azamattyq ónim de shyǵarýǵa bolady. Sondaı-aq biz qazir KamAZ kompanıasymen birge olardyń qozǵaltqyshtary men elektr júıelerin osy kólikterge engizýdi kózdeýdemiz", - deıdi atalmysh saýytty kólikterdi shyǵaratyn «Qazaqstan Paramaýnt Injınırıń» JSHS basshysy Erbol Sálimov.

Onyń sózine qaraǵanda, zaýyt jeke menshik ıelikte, ınvestısıalar da jeke kózderden keldi. Kompanıa 50 de 50 úlespen quryldy. Investısıalar kólemi - 7 mlrd. 80 mln. teńge.

"Zaýyt bıyl qazan aıynda ashyldy. Biraq óndiristik qýatyna endi ǵana shyqty. Biz eki korpýsty ashtyq. Qurylys 2014 jyldyń sáýir aıynda bastaldy. Belsendi qurylys 2015 jyly qolǵa alyndy. Zaýytty 6 aıda bitirdik desek de bolady.

Biz Iordanıaǵa 50 kólikti jetkizýdi josparlaýdamyz, taraptar arasynda tıisti memorandým bar", - dep atap ótti E. Sálimov.

"Jylyna 120 kólik shyǵaratyn bolsaq, jumyskerler sany 150 adamǵa jetedi. 53 adam Ońtústik Afrıkada Dánekerleý ınstıtýtynda bilimderin jetildirip qaıtty.

Eksport máselesi Syrtqy ister mınıstrliginiń deńgeıinde sheshilýde. Bizdiń elshilikter men áskerı attasheler birneshe memleketpen kelissózder júrgizýde. Belgili bir baılanystar bar, sebebi Qazaqstannyń logıstıkalyq erekshelikterine baılanysty ónim suranysqa ıe bolady dep oılaımyz.

Biz úsh túrli kólik: 4h4 «Arlan», 4h4 «Nomad» jáne 6h6 «Barys» markalaryn shyǵaramyz. Keńeıtýge ázirmiz, bolashaqta arnaıy kólikterdi, ınassatorlyq kólikterdi, oq ótpeıtin dońǵalaqty kólikterdi jasamaqpyz.

«Arlan» áskerı kóligi qorshaýda qalǵan adamdardy oqtan aman-esen alyp shyǵarýǵa arnalǵan. Ol mınalardan, balıstıkalyq qarýlardan qorǵaıdy, oq ótkizbeıdi", - dedi zaýyt basshysy.