«Bizdiń halqymyz eshqashan búgingideı baqýatty turmys keship kórgen joq. Táýelsizdik alǵannan beri 1300-den astam densaýlyq saqtaý nysany men 1700-den astam bilim berý oshaǵyn saldyq. Olardyń barlyǵyn eń sońǵy úlgidegi quraldarmen jabdyqtadyq. Asa kúrdeli operasıalardy óz elimizde, óz dárigerlerimiz jasaıtyn jaǵdaıǵa jettik. Jalpy halyqtyń turmysynyń, densaýlyǵynyń túzelýi, sanynyń ósýi nátıjesinde qazaqstandyqtardyń ortasha ómir uzaqtyǵy 72 jasqa jýyqtady. Memleket qandaı jaǵdaıǵa qaramastan áleýmettik mindettemelerin shashaý shyǵarmaı oryndap keledi»,- dep málimdedi memleket basshysy Nursultan Nazarbaev 30 qarashada Qazaqstan halqyna arnaǵan Joldaýyn jarıalaý kezinde.
Budan baıqaǵanymyzdaı, eshqandaı qarjylyq quldyraý Qazaqstannyń áleýmettik mindettemelerin oryndaýǵa kedergi bola almaıdy. «2016 jyldyń 1 qańtarynan bastap biz yntymaqtastyq júıedegi zeınetaqyny ınflásıa deńgeıinen 2 paıyzǵa asyra otyryp ındeksteımiz. 2016 jyly «B» korpýsyndaǵy memlekettik qyzmetshilerdiń eńbekaqysy 30 paıyzǵa ósedi. Barlyq búdjet shyǵyndaryn ońtaılandyrýdan keıin únemdelgen qarjyny osy maqsatqa jumsaımyz. 2016 jyldyń 1 qańtarynan bastap densaýlyq saqtaý salasyndaǵy qyzmetkerlerdiń jalaqysy ortasha alǵanda – 28 paıyzǵa, bilim berý qyzmetkerlerdiń jalaqysy – 29 paıyzǵa, áleýmettik qorǵaý salasy qyzmetkerleriniń jalaqysy – 40 paıyzǵa kóteriledi»,- dedi Elbasy. Buǵan qosa, aldaǵy jyly múgedektigine jáne asyraýshysynan aırylýyna baılanysty beriletin járdemaqy jáne shákirtaqy kólemi 25 paıyzǵa ulǵaıady.
Qazaqstandyqtardy áleýmettik jaǵynan qoldaý sharalaryn keńeıtý maqsatynda Nursultan Nazarbaev Úkimetke 2016 jyldyń 1 toqsanynyń sońyna deıin halyqty jumyspen qamtýdyń jańa Jol kartasyn ázirleýdi tapsyrdy. Atap aıtarlyǵy, bul baǵdarlamanyń qarjylandyrý kólemi 2007-2009 jyldary júzege asyrylǵan Jol kartasyna uqsas bolýy shart. Prezıdenttiń pikirinshe, mundaı qadam jergilikti ınfraqurylymdy damytý men eldi-mekenderdi kórkeıtý baǵytyndaǵy jobalar esebinen eńbek naryǵynyń turaqtylyǵyn saqtaýdy qamtamasyz etedi. Sonymen qatar, Elbasy aldaǵy úsh aıdyń ishinde Úkimetke áleýmettik qamtamasyz etý júıesin ońtaılandyrý boıynsha usynystar engizýdi júktedi. «Jekelegen azamattardyń erekshe qajettilikterin eskere otyryp, eń tómengi kúnkóris deńgeıiniń qurylymyn qaıtadan qarap, ártúrli mólsherin belgileý kerek»,- dep atap kórsetti. Memlekettik ataýly kómek oǵan naǵyz muqtaj adamdarǵa ǵana berilýi qajettigin eskertti.
Eýrazıalyq ekonomıkalyq odaqtaǵy áriptesterimiz – Reseı Federasıasy men Belarýs Respýblıkasyndaǵy jalaqy ósimin Qazaqstandikimen salystyryp qaraıyq. «Rossııskaıa gazeta» habarlaǵandaı, Reseı Úkimeti búdjet qyzmetkerleriniń jalaqysyn ındeksteý máselesin 2016 jyldyń 1 qazanynda qarastyrady. Reseı Federasıasynyń Eńbek mınıstri Maksım Topılınniń aıtýynsha, búdjet qyzmetkerleriniń naqty jalaqysy 2015 jyldyń sáýirinde 2014 jylǵy kórsetkishpen salystyrǵanda 13 paıyzǵa qysqarǵan. «Bizdiń mınıstrlik jalaqyny barynsha ósirýdi usyndy, al Qarjy mınıstrligi onyń kólemin azaıtty. Qazir eki mınıstrlik dıalog júrgizip, jalaqyny ósiretin merzimdi naqtylaı almaı jatyrmyz»,- deıdi mınıstr «Rossııskaıa gazetaǵa» bergen suhbatynda.
«Ex-Press.by» saıty jazǵandaı, Belarýs Respýblıkasynyń Ókilder palatasynyń búdjettik komısıasynyń tóraıymy Lúdmıla Dobrynına 2016 jyly eldegi búdjet qyzmetkerleriniń jalaqysynyń kólemi 13 paıyzǵa kóbeıetinin habarlady. Alaıda Belarýs Respýblıkasy Ekonomıka mınıstriniń birinshi orynbasary Aleksandr Zaborovskııdiń pikirinshe, aldaǵy jyly ınflásıanyń deńgeıiniń 12 paıyzǵa deıin kóterilýi 13 paıyzdyq ósimdi «jep qoıýy» múmkin. 2016 jylǵa arnalǵan búdjet jobasyna jalpy minezdeme bergen joǵary laýazymdy sheneýnik bul jolǵy búdjettiń boljap bolmaıtyn tustary kóp ekendigin atap aıtty.
Ámirlan Álimjan
