Oraldaǵy №37 mekteptiń 7 «a» synyp oqýshysy Dilnáz Ádilova anasymen birge joǵalyp ketti dep habarlaıdy «Qamshy» portaly «Ýralskaıa nedelá» basylymyna silteme jasap.
«Bul oqıǵa oqýshylardyń kúzgi demalysynda boldy. 7 «a» synybynda oqıtyn Ádilova Dilnázdiń dástúrli emes dinı baǵytty ustanatyn anasy Baqytjamal Hasanǵalıevamen birge iz-tússiz joǵalyp ketýi bizdi qatty qynjyltýda. 4 qarashada kúzgi demalysqa ketip, 12 qarasha kúni sabaqqa kelmegen Dilnázdiń anasymen synyp jetekshisi habarlasty. Alaıda, ekeýiniń de telefony sóndirýli boldy. Qyzdyń ákesi Jeńis Hasanǵalıev Atyraýda vahtalyq ádispen jumys isteıtin edi. 13 qarasha kúni ákesi mektepke kelip, qyzy men áıeliniń joǵalyp ketkenin aıtyp, etegi jasqa tolyp jylap, bizden kómek surady. Biz BQO ishki ister departamentine hat jazyp, oqýshymyzdyń joǵalyp ketkenin habarlap, izdeý salýyn suradyq. Olardyń anyqtaýy boıynsha, kúni búgin Dilnázdiń anasymen birge Qazaqstan aýmaǵynan shyǵyp ketkeni belgili bolyp otyr. Biraq qaı elge ketkeni bizge belgisiz. Bul oqıǵa bizdi qatty alańdatady”, — dedi mektep dırektory Tamara Musaqyzy mektepte ótken «Otbasy, mektep jáne qoǵamnyń urpaq tárbıesinde ıgilikti bolashaq jolyndaǵy ózara yntymaqtastyǵy» taqyrybynda ótken dóńgelek ústel barysynda.
№37 mektepte 1200 oqýshy bilim alýda. Sonyń 39-y – dástúrli emes dinı baǵytty ustanatyn oqýshylar (ata-analarynyń sany – 24). Olardyń ishinde 14 qyz bala hıdjab jamylady.
“Men ata-ana retinde qatty alańdaýlymyn. Qoǵamda bolyp jatqan neshe túrli soraqy jaǵdaılardy estip te, kórip te otyrmyz. Dilnázben qyzymyz bir synypta oqydy. Dinı aǵymdaǵy ol qyzdyń meniń qyzymmen habarlasyp, oǵan keri áser etpesine kim kepil? Balalar ǵalamtor arqyly habarlasyp jatady. Dilnázda barlyq synyptasynyń telefon nómiri bar. Ol qyzyma, álde basqa synyptasyna skaıp arqyly shyǵyp, «Mynda keremet» dep sýretin jiberip, kóńilderin buzyp, alańdatsa qaıtemiz? Qyzym Dilnázdiń joǵalyp ketkenin júregine aýyr aldy. «Mama, Dilnáz joq, joǵalyp ketipti» dep mektepten ýaıymdap keldi. Bul oqıǵa jalǵyz oǵan emes, barlyq synyptastaryna qatty áser etip otyr. Qyzymnyń telefonyn tekserip, kimdermen sóıleskenin baqylap otyramyn. Alaıda ata-analardyń kóńilinde úreı, qorqynysh basym”, – deıdi Aıymgúl Qazıeva esimdi ata-ana.
Jıynda tártibi, oqý úlgerimi jaqsy oqýshysyn joǵaltyp otyrǵan ustazdar qaýymymen qosa ata-analar da bul oqıǵaǵa qatty alańdaıtyndyqtaryn bildirdi.
Keıin quqyq qorǵaý organdary Baqytjamal Hasanǵalıeva qyzymen birge Máskeý arqyly Sırıaǵa ótip ketkenin anyqtady dep jazady «Ýralskaıa nedelá».
