Ǵ.Músirepov atyndaǵy Akademıalyq jasóspirimder men balalar teatry kórermender men 1986 jylǵy jeltoqsan oqıǵasynyń qatysýshylarynyń kezdesýin ótkizbek, - dep habarlaıdy «Qamshy» portaly teatrdyń baspasóz qyzmetine silteme jasap.

«1986 jyl 16 jeltoqsan – erlik pen órlik, qaıǵy men qasiret mıdaı aralasqan qaraly da, qasiretti kún edi. Sol qaraly oqıǵa qazaqtyń qabyrǵasyn qaıystyryp, júregin syzdatyp, batyrlarymyzdan qol úzip qalǵanymyzben, san ǵasyr armandaǵan Táýelsizdikke qol jetkizdik» delingen baspasóz qyzmeti taratqan habarlamada.

Kezdesýge respýblıkalyq «Jeltoqsan-86» Táýelsizdik qyrandary» Halyq qaharmandary qozǵalysy tóraıymy –Gúlbahram Júnis, «Jeltoqsan-86» Respýblıkalyq táýelsizdik kúreskeri – Úsiphan Seıtimbet, «Jeltoqsan-86» Respýblıkalyq táýelsizdik kúreskeri – Baqytjan Turdalıeva kelip, táýelsizdik pen eldik, egemendik jaıly súbeli suhbat bolmaq.

Kezdesý teatr ártisteri sahnalaıtyn «Jeltoqsan jeli» qoıylymymen qorytyndylanbaq.