Irak pen Sırıa aýmaǵynda áreket etip jatqan «DAISH» lańkestik uıymy sodyrlardyń sany ótken jyldan eki esege artty. Arab memleketteriniń barlaý qyzmetteriniń baǵalaýynsha, atalǵan eki elde 27 myńnan astam sodyr soǵysyp jatyr, - dep habarlaıdy «Qamshy» portaly QazAqparatqa silteme jasap.

AQSH-tyń «Sýfan Grýpp» saraptamalyq ortalyǵy óziniń derek kózderine silteme jasap, túrli elderdiń Irak pen Sırıaǵa sheteldik sodyrlarynyń barýyna kedergi keltirý jáne lańkestik uıymdarǵa degen qyzyǵýshylyqty azaıtý jolyndaǵy sharalary ázirge nátıje bermeı otyrǵanyn habarlady.

Olardyń derekterine qaraǵanda, 86 eldiń shamamen 27000-31000 sheteldik sodyry Irak pen Sırıada. 2014 jyldyń maýsymynda bul san 12 myń sodyrdy qurady, dep esepteıdi  «Sýfan Grýpp».

«Islam memleketiniń» qataryna Taıaý Shyǵys pen Magrıbten jylyna shamamen  8000 adam qosylady eken. Shamamen 5000 Eýropadan jáne 4700 adam burynǵy Keńes Odaǵy respýblıkalarynan barady.

«Sýfan Grýpp» atap ótkendeı, sheteldik sodyrlardyń 20-30 paıyzy óz elderine oralyp, ulttyq arnaıy qyzmettiń jumysyn qıyndata tústi.