Qazaq eli Táýelsizdiginiń 24 jyldyǵy qurmetine álem elderiniń basshylary Memleket basshysy Nursultan Nazarbaevqa quttyqtaý hattaryn joldap jatyr. Máselen, eń birinshi bolyp AQSH-tyń Qazaqstandaǵy Tótenshe jáne Ókiletti elshisi Djordj Krol qazaqstandyqtardy Táýelsizdik kúnimen qazaq tilinde quttyqtady. Alaıda, irgemizdegi keıbir kórshi memleketterdiń basshylary Táýelsizdigimizdiń 24 jyldyǵymen quttyqtamaǵanyn aıta ketken jón.
Árıne, álemniń barsha memleketteriniń basshylary Qazaq elin Táýelsizdik kúnimen quttyqtaýǵa mindetti emes. Onyń ústine, Táýelsizdikktiń 24 jyldyǵy «dóńgelek data» emes. Áıtse de, Qazaq eliniń Táýelsizdigimen alystaǵy AQSH pen Ulybrıtanıa quttyqtap jatqanda qudaıy kórshilerimiz «aýyldastyń taıy ozsyn» dep nıettestik tanytpady. Máselen, Ulybrıtanıanyń Qazaqstandaǵy Tótenshe jáne Ókiletti Elshisi Kerolın Braýn qazaqstandyqtardy qazaq tilinde Táýelsizdik kúnimen quttyqtady. Bir qyzyǵy, tek AQSH pen Ulybrıtanıa elshileri ǵana qazaq tilinde quttyqtaý jasady.
Al, baýyrlas Ózbekstan men Qyrǵyzstan jáne Qytaı halyq Respýblıkasy resmı quttyqtaý joldamady. Sondaı-aq, Qazaq eliniń Táýelsizdigin eń birinshi bolyp moıyndady dep júrgen Túrkıa da bul joly únsiz qaldy. Bizdiń oıymyzsha, bul únsizdik Reseı-Túrkıa jan-jalyna baılanysty bolsa kerek. Óıtkeni, ushaq daýyna baılanysty Memleket basshysy Nursultan Nazarbaev Reseıdiń ustanymyn qoldaǵan bolatyn. Soǵan qaraǵanda, resmı Ankara prezıdenttiń ustanymyna ókpeli sıaqty.
Al, RF prezıdenti Vladımır Pýtın eń sońǵy bolyp Qazaq eliniń Táýelsizdik kúnimen quttyqtady. «Máńgilik dosymyzdyń» AQSH pen Ulybrıtanıadan keıin quttyqtaý hat joldaýy neni ańǵartady? Óıtkeni, qudaıy kórshimiz áli kúnge deıin Qazaq eliniń Táýelsiz el bolǵanyn qalamaıdy. Qalamaıdy degenimiz sypaıylyq, tipti Reseı bizdiń Táýelsiz el bolǵanymyzǵa qarsy.
Máselen, 16 jeltoqsan kúni «Drýgaıa Rossıa» partıasynyń 20 shaqty belsendisi Peterbýrgtegi Qazaq eliniń elshiligine baryp narazylyq aksıasyn uıymdastyrdy. Belsendiler Reseı bıligi ruqsat etken aksıaǵa Qazaq eliniń Táýelsizdigine qarsy jazylǵan plakattar ustap shyqty. Atalǵan plakattarda «Mundaı táýelsizdik qurysyn!», «Bizdiń otanymyz – KSRO», «Nazarbaev, orystardyń mazasyn alma, onyń arty jaman bolady» dep jazylǵan.
Belsendilerdiń aıtýynsha, Qazaq eli men Ýkraınanyń táýelsizdik alýy Reseı úshin qaraly kún. Óıtkeni, atalǵan kúnder KSRO syndy alyp ımperıanyń qulaǵanyn eske salady. Sondaı-aq, partıa ókilderi Qazaq elin Reseıdiń senimdi seriktesi degenge kúmán keltirip otyr. Sebebi, shovınıser Aqordanyń Túrkıa men Qytaı memleketterimen tyǵyz qarym-qatynas ornatyp otyrǵanyn synapty. Budan bólek, olar resmı Astananyń reseılik kózqarastaǵy azamattardy qýyn-súrginge ushyratyp otyrǵanyn jaqtyrmaıtynyn jetkizipti.
Uzyn sózdiń qysqasy, Resedegi eń iri partıa Qazaq eliniń Táýelsiz el bolýyna qarsy. Alaıda Qazaq eli «Drýga Rossıa» partıasy qarsy boldy eken dep Táýelsizdikten bas tartpaq emes. Óıtkeni, biz úshin Táýelsizdikten asqan baılyq joq.
Negizinde, belgili bir eldiń táýelsizdigine qarsy aksıa tek Reseıde ǵana ótetin shyǵar. Óıtkeni, álemdegi damyǵan órkenıetti elderde mundaı aksıa ótken emes. Máselen, Japonıa – Ońtústik Koreıanyń, Ulybrıtanıa – Úndistannyń Táýelsizdigine qarsy aksıa ótkizgen joq. Soǵan qaramastan, atalǵan memleketter Reseıden kósh ilgeri damyp otyr. Al, aldaǵy ýaqytta jarym-jan kózqarasty Reseı tastama onyń damyp, ósip-órkendeýi múmkin emes.
Serik JOLDASBAI
Astana
