O ZAMAN MEN BU ZAMAN...

 Ol zamanda bári basqa bolatyn,

Súıgen janmen kóńil shalqyp, tolatyn.

O zamanda - arýlardyń qushaǵy

Qyrdyń qyzyl gúlderine tolatyn.

Pende bitken bul ómirdiń qonaǵy,

Ýaqytshasyń, myna sen de, o daǵy.

Bu zamanda - saıtandardyń qaltasy,

Ýys-ýys kók qaǵazǵa tolady...

O zamannyń arýlary arly edi,

Qaı-qaısy da qurbysynyń aldy edi.

Bu Zamanda, isip, tolyp, shalqaıar,

Álde kimniń sháldegi men áldegi...

Kóp júrmeı-aq búri ketken tabannan,

Bu Zamanda uıat ketken adamnan.

Uıaty joq, nysaby joq jandardy,

Kórip turyp, qabaq qatty qabarǵan.

Jumbaq bolsa kesheginiń aıtary,

Ashyq, shashyq - búginginiń saıqaly,

Til qatpasa, O Zamannyń arýy,

«Sheshin!..»-deıdi bu Zamannyń saıtany...

Netken osal bul pendeniń sanasy,

Jáne de joq emdeletin daýasy.

Senesiz be, ketken qatty alshaqtap,

O Zaman men bu Zamannyń arasy...

«ARMAN QALAM» - QAIDA EKEN?..

Kúlki :  «qarq-qarq...», «syńǵyr-syńǵyr...», údeıdi,

Tilemsek kóz túndi úńgip tileıdi...

Tursa daǵy jaryq shamǵa shomylyp,

Almatymnyń túni qandaı úreıli...

Kileń tobyr, oıyndary osylǵan,

Yrdý-dyrdý, dýman izdep josylǵan.

Jatsa daǵy sansyz kólik aǵylyp,

Arý qalam, dir-dir eter shoshynyǵan.

Tyǵylatyn qara toǵaı, ormanǵa,

Shaıtan bitken bul qalaǵa qonǵan ba?

Qonaq úıler, meıramhana, saýnalar -

Jyn-oınaqtan áńki-táńki bolǵan ba?

Asyp, tolyp, shaıqap iship erikken,

Myna túnde kimder eken jelikken?

Las bireýdeı jan dúnıesi kirlegen,

Arman qalam tunjyraıdy nelikten?

Arman qala dir-dir etti, tońǵan ba,

Qansyz júzi appaq bolyp ońǵan ba?

Kez kelgenniń qushaǵyna jyǵylǵysh,

Arman qala - azǵan qala bolǵan ba?

Qansyz, sólsiz, oısyz, túksiz janardaı,

Onyń syıqy - beıne jyndy adamdaı.

Men keshegi: «Arman qala» atanǵan,

Almatymdy qalǵandaımyn taba almaı...

Búginginiń qýǵandary «paıda» eken,

Kóńilderi - aspandaǵy Aı da eken.

Ary taza, táni taza arýdaı,

«Arman qalam» - sol Almatym qaıda eken?..

ALMATY DA AŃSAǴANDAI AQ QYSTY...

Kesh batty ma, basyp turar qara tún,

Bul qaladan alys jatyr dala tym.

Sary aıazdan tıtimdeı de belgi joq,

Ashyq júrgen betten súıip alatyn.

Aýyrsynar qala sulý kóp kirden,

Qalyń uıqy kimniń ishin keptirgen?

Aq boran joq alaı-dúleı boraǵan,

Aıyrma joq kóp kún menen kóp túnnen.

Alaqaılar: «áppaq qysyń keldi!» dep,

Soqqan emes bul qalada jel de údep.

Bolsa daǵy jeltoqsannyń aıaǵy,

Almatymda qystan ıtteı belgi joq.

Sanalardan saǵynysh bop ushty eles,

Kúdikti oılar syrtta qalǵan, ish te emes.

Ne qys emes, ne jaz emes, kúz emes,

Kóktem de emes, aq ton kıgen qys ta emes.

Qysty ańsaýmen sarǵaıǵandaı sana da,

Júrekterde Úmit órt bop jana ma?

Aq qalpaqty Alataý da muńaıyp,

Qarap tur ma kirlep ketken qalaǵa?..

Jaqyn emes, bolǵan búgin jat kúshti

Bizden qashyp, aıdalaǵa Baq ta ushty.

Muńaıǵandaı saǵynyshtan sarǵaıyp,

Búkil qala ańsaǵannan aq qysty...

Qysty ańsaǵan myna meniń júregim,

Týlap, týlap, «dúrs-dúrs» soqty, bilemin.

Dep tileımin, men ishimnen kúbirlep:

«Myna qystan aman shyqsyn Uly Elim!..»

Jumash KENEBAI,

29.12.2015 jyl ,