Mine, san salaly oqıǵalarǵa toly 2015 jyl da tarıh qoınaýyna ótti. Jaman bolsyn, jaqsy bolsyn, Qazaq eli tól tarıhynyń taǵy bir jańa paraǵyn shyp otyr. Osy rette ótken jyldyń mańyzdy oqıǵalaryna taǵy bir márte kóz júgirtip ótkendi jón sanadyq.
Ótken jyldyń basty áńgimesi daǵdarys pen devalvasıa bolyp otyr. Bul qubylys jańa jyl kirisimen sap tyıyla qoıady deýden de aýlaqpyz. Al, 2015 jyldyń tamyzynan bastap tól teńgemiz quldyraý baǵytynda «júzip keledi». Degenmen de bárine kezek-kezek toqtalǵan durys bolar.
Sonymen, ótken jyly soltústik kórshimizdiń basshysy V. Pýtın myrza «Qazaqtarda memleket bolmaǵan» dep málimdegen soń, Prezıdent arnaıy tapsyrma berip, apyl-ǵupyl Qazaq handyǵynyń 550 jyldyǵyn atap óttik. Tarazdaǵy toı men osy dataǵa oraı basqa da uıymdastyrý jumystary bılik dálizinde baqyttan basy aınalyp júrgen Mádenıet pen sporttyń mınıstri Arystanbek Muhamedıaulyna tapsyrylǵan. Osy aıtýly oqıǵaǵa oraı 20 serıaly «Qazaq eli» serıalyn túsirý týraly sheshim shyǵarylǵan.
Alaıda, kınoǵa dep bergen qarajat qaıda ketkeni túsiniksiz. Fılm serıalary qysqara-qysqara qurdymǵa ketti. Ázirge saryla kútken serıaldyń tek treılerin ǵana kórdik. Al, serıaldyń ózin keler jyly kórip qalýymyz múmkin.
Ótken jyldyń basty oqıǵalarynyń birine merziminen buryn ótken Prezıdent saılaýyn da jatqyzýǵa bolar. Qazaqstan halyq Assambleıasy bas bolyp, Parlament biraýyzdan maquldap, sáýir aıynda prezıdentimizdi qaıta saılap aldyq. Halyqtyń 97,7 prosenti Tuńǵysh Prezıdentti qoldap daýys berdi.
Prezıdenttiń aınalasynan uzamaı turyp, taǵy bir saıası oqıǵany esterińizge salaıyq. Ol – Darıǵa Nursultanqyzynyń Premer-mınıstrdiń orynbasary laýazymyna taǵaıyndalýy. Buǵan deıin Májilis tóraǵasynyń orynbasary bolǵan Darıǵa Nazarbaeva qyrkúıek aıynyń basynda Úkimet tóraǵasynyń áleýmettik sala, bilim jáne ǵylym, densaýlyq saqtaý, mádenıet syndy máselelerge jaýapty orynbasary bolyp taǵaıyndaldy.
27 shildede Qazaqstan resmı túrde Dúnıejúzilik saýda uıymyna múshe boldy. Jenevada uıymnyń Bas dırektory Roberto Azevedo men Qazaqstan Prezıdenti N. Nazarbaev ortaq hattamaǵa qol qoıdy.
Halyqaralyq deńgeıdegi taǵy bir mańyzdy oqıǵa - Qazaqstanda qysqy Olımpıada oıyndaryn ótkizbeý týraly sheshim. Halyqaralyq Olımpıada komıtetinde 2022 jylǵy qysqy Olımpıadany ótkizýge úmitker eki qalanyń biri Almaty bolatyn. Daýys berý qorytyndysy boıynsha 40-44 esebimen Qytaı astanasy Pekın 2022 jylǵy qysqy Olımpıada oıyndary ótetin qala dep tanyldy. "Bul jańalyqty estigen qazaqstandyqtardyń qýanyshynda shek bolǵan joq", - dep jazdy sheteldik aqparat quraldary.
Ótken jyldy oılasaq eske túser taǵy bir oqıǵa – Qazaqstan tarıhynda ekinshi márte Premer-mınıstr laýazymyn atqarǵan tulǵanyń isti bolýy. Á. Qajygeldınen soń Serik Ahmetovke jemqorlyq qylmystar jasady dep aıyp taǵylyp, ol 10 jylǵa bas bostandyǵynan aıryldy. Ahmetovpen birge onyń komandasynda bolǵan birneshe sheneýnik te temir tordyń ar jaǵyna attandy.
Ótken jylǵy Rahat Álıevtiń ólimi men MS Saılaýbektiń «bydy-bydysyna», Kárim Másimovtiń shyǵystaǵy kórshimizde ótken bir jıynda hanzýsha shúldirlegenine soqpaı eleýli oqıǵalardy odan ári tizbektesek. Daǵdarys qyspaqqa alǵanda, syrtqa satylatyn basty ónim munaı baǵasy quldyraǵanda bizdiń bılik bas salyp álemdik qarjy uıymdarynan nesıe alýdy ádetke aınaldyryp keledi. Aldyńǵy alǵany bar, keıin qosylǵany bar, búginde Qazaqstannyń syrtqy qaryzy 7 trıllıon teńgeden asyp otyr.
Qyrkúıek aıynyń alǵashqy on kúnindegi áńgime Aıdyn Aıymbetov degen jigittiń ǵaryshqa ushýy tóńireginde boldy. Bas gazet «Egemen Qazaqstan» «Aı men Aıdyn» dep maqala berip, jer-jahanǵa jar salǵan ǵaryshkerimizdiń tegin jazý aıǵa ushqannan da qıynǵa soqqandaı. Sebebi, dál osy máselede qazaq baspasózi birshama dúdamaldyqqa tústi. Qazaqsha bilmegen soń, buǵan ushqyshymyzdyń ózi basyn qatyra qoımaǵan bolar. Al, otandyq aqparat quraldary taratqan habarlarda «Aıymbetov» pen «Aımbetov» degen famılálar jarysa jazyldy. Memleket bolsa álgi jigitti ǵaryshqa ushyrý úshin qazynadan 20 mıllıon AQSH dollaryn jumsapty. Táýelsizdik kúni qarsańyndaǵy jıyndardyń birinde Elbasy «Aıymbetovtyń ǵaryshta ne bitirgenin eshkim bilmeıdi» dep qoıyp qaldy. Degenmen, úshinshi ǵaryshker «Qazaqstannyń Halyq Qaharmany» atandy.
Áńgime basynda aıtylǵandaı, ótken jylǵy ózekti taqyryp – aqsha. Aqsha bolǵanda da, tól teńgemizdiń taǵdyry. Tamyz aıynyń 20-y kúni valúta naryǵyn úılestirýshi memlekettik organ Ulttyq bank valúta baǵamyna basshylyq jasaýdan at-tonyn ala qashyp, teńgege qoldaý bildirýden bas tartty. Muny ózderi ulttyq valútany «erkin júzýge jiberý» dep túsindirdi. Al, bul jaǵdaılarǵa qarap halyq ǵalamdyq daǵdarystyń dúmpýinen bıliktegilerdiń ózderi «jiberip» qoımady ma eken dep ań-tań boldy. Tamyzdaǵy teńge tálkeginde ulttyq valúta birden 87 paıyzǵa qunyn joǵaltty.
Kóp uzamaı Bas bankır Qaırat Kelimbetov ketip, ornyna Danıar Aqyshev keldi. Kelimbetovpen birge ketken teńgeniń dáýreni Aqyshevtiń kelýimen oralmady. Danıar da aldyńǵy áriptesinen asyp túspese kem qalmady. Nátıjesi – ózderińiz kórip júrgendeı, AQSH dollarynyń baǵamy 340 teńgege jetti. Halyq osynshama valútalyq sekiristerdiń sanynan jańylyp, qaısysy devalvasıa, qaısysy «valútalyq tolqýlar» ekenin ajyratýdan qaldy.
Teńge tóńiregindegi taǵy bir taqyryp – aınalymǵa 20 myńdyq banknottyń shyǵýy.
Ulttyq bank «devalvasıa» jobasymen qosa, aınalymǵa 20 myń teńgelik «týyndysyn» usyndy. Sóıtsek, bul erterekte ázirlenip qoıǵan, tek syn saǵatyn kútip turǵan banknot eken. Muny prezıdenttiń ózi «Endi toıǵa barǵanda qınalmaısyńdar. Birden syılyqqa osyny aparyńdar» dep túsindiripti.
Qazaqstandyq kásipqoı boksshy Qanat Islam qarasha aıynda kásibı rıngtegi jıyrmasynshy jekpe-jegin jeńispen aıaqtady. "Qazaqstan" ulttyq arnasy ótkizgen "Jyl úzdigi-2015" baıqaýynda Qanat "Úzdik sportshy" ataǵyn ıelendi.
Shilde aıynda Almaty qalasynyń Naýryzbaı aýdanyndaǵy Qarǵaly jáne Qaraǵaıly aýyldary mańyda ózender arnasynan asyp, laı kóshkinine toldy. Almaty qalasynyń sol kezdegi ákimi Ahmetjan Esimov shaharda tótenshe jaǵdaı jarıalady. Jańadan taǵaıyndalǵan ákim Baýyrjan Baıbek «TJ» rejımin alyp tastady. Sel zardaptary kópshiliktiń kómegimen joıyldy.
Ótken jyldyń basty oqıǵalaryn osylaısha tizbektegen boldy. Sondaı-aq saıtymyzdan 2015 jyly baqıǵa attanǵan tanymal tulǵalar men ótken jyldyń basty taǵaıyndaýlary týraly maqalalardy da oqı alasyzdar.
