Ońtústik Qazaqstanda memlekettik kiris departamentiniń úsh qyzmetkeri munaı urlaýmen aınalysqan qylmystyq top qurdy degen kúdikke ilinip, ekeýi qamaýǵa alyndy, bireýi qashyp ketken - dep habarlaıdy «Qamshy» portaly.
Top munaıdy Pavlodar-SHymkent munaı qubyrynan urlap kelgen. Shymkenttiń ál-Farabı aýdandyq sotynyń habarlaýynsha kúdikke ilingenderdiń ishinde 36 jastaǵy memlekettik kiris departamentiniń aǵa ofıserine uıymdasqan qylmystyq top quryp, basqardy degen aıyp taǵylýda. Bul úshin ol 13 jylǵa bas bostandyǵynan aırylýy múmkin.
«Bul baptardyń biriniń sanksıasy 8-den 13 jylǵa deıin bas bostandyǵynan aıyrýdy kózdeıdi jáne asa aýyr qylmystar sanatyna jatady. Ol qylmystyq top qurdy jáne ony basqardy dep aıyptalýda. Bul jaǵdaıda ony kepilzatpen bosatý qarastyrylmaǵan»,- deıdi kúdiktilerdi tutqyndaýǵa sanksıa bergen sýdıa Ǵanı Baıarystan.
Tergeýshilerdiń aıtýynsha, OQO Sozaq aýdanynda munaı qubyrlarynan qara altyn urlaýshylar isin zertteýge tıis bul ofıserler shyn máninde sol toptyń zańsyz áreketine basshylyq jasap kelgen.
