Almatyda komýnaldy qyzmetter jaýǵan qardy tazalaýdyń jańa tehnologıasyn paıdalanyp jatyr. Bul týraly qalalyq ákimdiktiń baspasóz qyzmeti habarlady.

Aıta ketý kerek, búgin tańǵa jýyq qalada qar jaýa bastady. Qalanyń taýly aımaqtarynda túsken qardyń bıiktigi 15-20 sm-ge jetti.

«Suıyq eritindimen qamtylǵan qumsepkish kólikter jolda ylǵaldanǵan reagent granýlalaryn tegis tósep ótip jatyr. Mundaı tóseme kólikterdiń dóńgeleginen shashyramaıdy. Osyndaı kólikpen burynǵydan bes ese artyq aımaqty tazalap shyǵýǵa bolady. Qum-hlorıdti qosyndynyń birneshe ese az jumsalatynyn eskersek, bul qorshaǵan ortaǵa keri áserin de azaıta túsedi», - dedi qalalyq Tabıǵı resýrstar jáne tabıǵatty paıdalaný basqarmasynan.

Qazir trotýar mańyndaǵy qardy 65 traktor tazalap jatyr. Bul jumysqa sondaı-aq, 585 adam jumyldyrylǵan.

Qumsepkish kólikter arqyly 1895 tonna qum-hlorıd qosyndysy men 91 tonna tehnıkalyq tuz sebildi.