Talap, eńbek, tereń oı. Memlekettik qyzmetke qabyldaýdyń qańtardan bastap jańa júıesi engizildi. Testileý erejesi de ózgerdi, - dep habarlaıdy «Qamshy» portaly 24-arnaǵa silteme jasap.
Jańa jylmen kelgen jańa túzetýdiń artyqshylyǵy qandaı? Testileýdiń qaı tustary jetildirildi? Artýr Birimjanov búgin memlekettik testileýden súrinbeı ótti. Kúni-túni kóz maıyn taýysyp, talmaı, túrli zańdy jattaǵan eńbegi esh ketpedi. Ol B korpýsynyń S5 sanatyndaǵy qyzmetke ornalasýdy kózdegen. Artýr Birimjanov, qala turǵyny: - Qazirgi ýaqytta esh jerde jumys istemeımin. Aqparatty egov.kz saıtynan taýyp, halyqqa qyzmet kórsetý ortalyǵynda testke qatysý týraly ótinish qaldyrdym. Ekinshi baǵdarlama boıynsha test tapsyrǵandarǵa 100 mınýt ýaqyt beriledi. Al men barlyq suraqty 70 mınýtta belgilep shyqtym. Astanada Artýr sekildi qańtardyń alǵashqy kúnderinen beri júzge jýyq adam jańa erejemen test tapsyrǵan. Buryn úmitker ár zańǵa berilgen 15 suraqtyń kemi 10-yna jaýap berýi tıis bolatyn. Al osy júıe boıynsha ol shekteý alyndy. Jalpy durys jaýaptar sany esepteledi. Test baǵdarlamasy 3 sanatqa bólingen. Marat Tursynov, «Memlekettik qyzmetti basqarý ulttyq ortalyǵy» AQ múshesi: - Birinshi baǵdarlama 135 suraqtan turady. Sonyń ishinde testileýshilerge 95 suraqty belgileý qajet. Ekinshi baǵdarlama 120 suraq, onyń ishinde 72 durys jaýap bolý qajet. Úshinshi baǵdarlama sáıkesinshe 90 suraq, 45 durys jaýap bolýy qajet. Byltyr el boıynsha 59 myń adam memlekettik testileýdi tapsyrǵan. Biraq onyń 33%-y ǵana ótken. Osyǵan deıin synnan súringender qaıta testke qatysýy úshin 3 aı kútýi tıis edi. Qazir merzim 2 aıǵa deıin qysqarǵan. Taǵy bir ózgeris – memlekettik qyzmetke ótýdiń jańa III kezeńi shyqty. Ǵanıjan Asan, QR Memlekettik qyzmet isteri mınıstrliginiń ókili: - III kezeń – bul memlekettik organnyń ózinde, ıaǵnı bos laýazymǵa konkýrs jarıalanǵan memlekettik organdarǵa áńgimelesý. Bul satyda úmitkerdiń jeke bilimderi, tájirıbeleri aıqyndalady. Sonyń nátıjesi boıynsha konkýrstyq komısıa alqaly túrde sheshim qabyldap, belgili bir kandıdatty jeńimpaz retinde tanıdy. Memlekettik qyzmet týraly zańnamany jetildirý, úmitkerlerdi suryptap, sapaly mamandy taǵaıyndaýǵa tikeleı septigin tıgizedi.
