«Ulttyq qordaǵy qarajat 6-7 jylda taýsylady» dep suhbat bergen Berik Ótemurat qyzmetinen bosatyldy. Shyndyqty aıtqany úshin ol «QR Ulttyq bankiniń Ulttyq ınvestısıalyq korporasıasy» AQ basshysy qyzmetinen qýylyp otyr. Al onyń ornyna ile-shala Esjan Birtanov taǵaıyndaldy. Bir qaraǵanda bul máselege basa nazar aýdarýdyń qajeti joq sıaqty. Alaıda, Berik Ótemurattyń áreketin nazardan tys qaldyrýǵa áste bolmaıdy.
Jalpy joǵary laýazymdy basshylardyń ótkir másele kóterip, buqaralyq aqparat quraldaryna suhbat berýi óte sırek kezdesedi. Al alda-jalda ashyq málimdeme jasaı qalǵan jaǵdaıda onyń basy daýǵa qalyp, jumystan qýylady. Muny bildeı bir korporasıany basqarǵan Berik Ótemurattyń bilmeýi múmkin emes. Alaıda, ol «Qazaq eliniń Ulttyq qoryndaǵy 64 mlrd dollar aldaǵy alty-jeti jyl ishinde taýsylýy múmkin» jáne «Biz Ulttyq ál-aýqat qoryn «jep jatyrmyz» dep ashyq aıtty.
Uzyn sózdiń qysqasy Berik Ótemurat Kárim Másimov basqaratyn mınıstrler kabınetiniń jumysyn syn sadaǵyna aldy. Óıtkeni, Úkimet Ulttyq qordyń ınvestısıalyq menedjmentine durystap nazar aýdarmaı keledi. Qazirgi tańda Berik Ótemurattyń osy suhbaty qyzý talqylanyp jatyr. Azamattardyń basym kópshiligi ony «shyndyqty aıtty» dep maqtasa, ekinshi tarap muny «qandaıda bir oıyn bolýy múmkin» dep kúmándanýda. Bul máseleniń aq-qarasyn aıyrý áste múmkin emes. Alaıda, bizdiń elde shyndyqty aıtqan basshynyń qyzmette kóp turaqtamaıtyny kópshilikke jasyryn emes. Ulttyq banktiń burynǵy tóraǵasy Q. Kelimbetov te qyzmetinen teńge baǵamynyń tómendegeni úshin emes, birińǵaı jınaqtaýshy zeınetaqy qoryndaǵy qarajattyń aınalymyna qatysty qupıalardy ashyp qoıǵany úshin ketti deıdi biletinder.
Máselen buǵan Berik Ábdiǵalıdyń bir kúnde qyzmetten qýylǵany dálel bola alady. Atalǵan azamat Ulytaý aýdanynan bastap Jezqazǵan, Arqalyq qalalaryn jaqsy basqarǵan bolatyn. Tipti Arqalyq jurty ákimderine rıza bolǵany sonsha «Aq Berik» atty ánde shyǵardy. Osy eńbeginiń arqasy bolar ol Qaraǵandy oblysy ákiminiń orynbasary laýazymyna taǵaıyndaldy. Áıtse de, atalǵan qyzmette bir aı otyrmastan ony qyzmetten alyp tastady. Sebebi, ol aldyna kelgen jýrnalısiń suraǵyna jaýap berip, ózge basshylar sıaqty buqaralyq aqparat quraldarynan qashpaıtyn. Mine osy suhbattarynda alashshyl azamat shyndyqty jasyrmaı ashyq áńgime aıtty.
Jalpy bizdiń elde ótkir málimdeme jasap, kózge túsken azamattardy jumystan alyp tastaıtyn «dástúri» qalyptasqan. Aınalyp kelgende munyń bári jabyq qoǵamnyiń saldary. Eger de elimiz ashyq qoǵamǵa birtaban jaqyn bolsa, Berik Ábdiǵalı, Berik Ótemurat syndy taǵy da basqa azamattar jumystan qýylmas edi. Ókinishke qaraı, biz ashyq qoǵamnan alshaqtap, jabyq qoǵamnyń qushyǵana enip ketkenbiz. Al ashyq qoǵamnan neǵurlym alshaqtaı bastasaq, soǵurlym Berik Ábdiǵalı, Berik Ótemurat sıaqty azamattardan aıyryla beremiz. Máselen órkenıetti elderde qandaıda bir basshyny qyzmetten alyp tastasa, onyń nelikten otstavkaǵa ketkeni týraly aqparat beriledi. Al bizdiń elde jumystan bosatylǵan azamattyń ne úshin aıypty bolǵany týraly eshteńe aıtylmaıdy. Aınalyp kelgende munyń bári jabyq qoǵamnyń jazylmaǵan zańynyń saldarynan bolyp otyr.
Serik JOLDASBAI
Astana
