Úkimet baǵdarlamasyna saı Ońtústiktegi turmysy qıyn óńirler halqyn eldiń soltústik oblystaryna kóshirý jumystary bastalyp ketti, - dep habarlaıdy «Qamshy» portaly Azattyqqa silteme jasap.
Eldiń ońtústiktiginen soltústigine kóshkisi keletin turǵyndar qonys aýdarýdyń basty sebebi retinde jumyssyzdyqty aıtady. Jergilikti bılik ókilderiniń sózinshe, bul máseleniń demografıalyq qyry da bar.
Ońtústik Qazaqstan oblysy Qazyǵurt aýdany Qyzylseńgir aýylynyń turǵyny, úsh jyldan beri temirjolshy mamandyǵy boıynsha jumys tappaǵan Batyrjan Lesbaev Soltústik Qazaqstan oblysyna kóshýge qamdanyp júr.
- Bizde turaqty jumys joq. Óıtkeni halyq kóp, tyǵyz. Ár jerdi bir jaldanyp jumys isteýden sharshadym. Úıdegi jeti jan – áke-sheshem, inim, áıelim men eki balam bar bárimiz sheshemniń zeınetaqysyna qarap otyrmyz. Turaqty jumys taýyp berse, jerdiń túbine bolsa da baramyz, – deıdi Batyrjan Lesbaev.
Soltústiktiń aýa raıy ońtústikke qaraǵanda sýyq ekenin aıtqan jigit «turaqtylyq joq bolsa, jyly jerde otyrǵan nege kerek» deıdi.
«TÚPKİ OI – DEMOGRAFIANY KÓTERÝ»
Ońtústik Qazaqstan oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Sátjan Polatovtyń aıtýynsha, jyl basynan beri Batyrjan Lesbaev sıaqty soltústikke kóshýge nıetti 500 adam ótinish bergen. Soltústik Qazaqstan usynyp otyrǵan jumys oryndarynyń kóbi – aýyl sharýashylyǵy salasynda.
- Ońtústik Qazaqstan oblysynda jumyssyz júrip, nápaqa tabý qıyn bolyp turǵanda Soltústik Qazaqstan oblysynda jasalyp jatqan jeńildikterdi paıdalanǵan abzal. Kóship barý tegin, shyǵyn óteledi. Jekeshelendirýge bermese de, ýaqytsha tegin turýǵa baspana beriledi. Jumysqa ornalastyrylady. Bar qıyndyǵy aýa raıynda, soltústikte qys – uzaq, jaz – qysqa, – deıdi Sátjan Polatov Azattyqqa.
Onyń aıtýynsha, byltyr da ońtústikqazaqstandyq 70 otbasy oblys ákimdikteriniń ózara kelisimi boıynsha Soltústik Qazaqstan men Shyǵys Qazaqstan oblystaryna tegin kóshirilgen. Ol azamattar ákimdikterdiń demeýimen jumysqa turyp, baspanaly bolǵan.
- Bıyl «Jumyspen qamtý – 2020» memlekettik baǵdarlamasyna jańa tarmaq engizildi. Úkimet ońtústik aımaqtardy – halqy kóshýshi, soltústik aımaqtardy – kóshti qarsy alýshy aımaqtar retinde belgilep berdi, – deıdi Sátjan Polatov.
Ońtústik Qazaqstan oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasarynyń sózinshe, azamattardy tústikten teriskeıge kóshirýdiń demografıalyq sebebi de bar. Sátjan Polatov bul sózine «Ońtústik Qazaqstan oblysynda – 3 mıllıonǵa jýyq, al Soltústik Qazaqstan oblysynda 6 júz myńdaı ǵana turǵyn bar» degen derekti ýáj etedi.
- Soltústik Qazaqstan oblysynyń halqy kórshi Reseıge jáne oblys ortalyǵy Petropavlǵa kóshe bastaǵan. Aýyldarda adam sany azaıǵannan soń mektep pen balabaqshalar jabylyp jatyr. Ol jaqta jer keń, ıgerýge adam jetispeıdi. Túpki oı – demografıany kóterý, jumyssyzdyqtyń aldyn alý, – deıdi Sátjan Polatov.
«BIYL 300 OTBASYN KÓSHİRİP ALA ALAMYZ»
Soltústik óńirge jumys kúshi kóp aımaqtardan azamattardy kóshirý máselesi bul óńirde «demografıalyq ahýal nasharlap, halyq sanynyń azaıýynan týǵanyn» Soltústik Qazaqstan oblystyq jumyspen qamtýdy úılestirý jáne áleýmettik baǵdarlamalar basqarmasynyń bas mamany Alma Mahmetova da rastaıdy. Onyń aıtýynsha, bul oblysqa byltyr Ońtústik Qazaqstannan 18 otbasy (37 adam) kóship kelgen.
- Olardyń 27-si jumysqa jaramdy, qazir 21-i jumysqa ornalastyryldy. Barlyq otbasy baspanamen qamtamasyz etildi. Olardyń ishinde aýyl sharýashylyǵy salasyndaǵy jumysshylarǵa qosa, muǵalimder men dárigerler de bar, – deıdi bas maman.
Alma Mahmetovanyń dereginshe, Soltústik Qazaqstan oblysynyń 2016 jyly 300 otbasyn kóshirip alýǵa múmkindigi bar.
- Dál qazir aýdandarda 185 bos jumys orny men 110 bos jeke turǵyn úı bar. Bos jumys ornynyń 110-y – aýyl sharýashylyǵy salasynda, 75-i – búdjettik mekemelerde. Kóship kelgen otbasylardyń balalaryn mektep, balabaqshaǵa kedergisiz ornalastyramyz, – deıdi Soltústik Qazaqstan oblystyq jumyspen qamtýdy úılestirý jáne áleýmettik baǵdarlamalar basqarmasynyń bas mamany Alma Mahmetova.
Soltústik Qazaqstanǵa kóshýge nıet etip júrgen ońtústik turǵyndarynyń biri, maqalanyń basynda sóz bolǵan Batyrjan Lesbaev qańtardyń 19-y kúni Ońtústik Qazaqstan oblystyq jumyspen qamtýdy úılestirý jáne áleýmettik baǵdarlamalar basqarmasyna baryp, qajetti qujattaryn tapsyryp, arnaıy anketany toltyryp qaıtty. Basqarma mamandary sol kúni Batyrjan Lesbaevtyń qujattaryn Soltústik Qazaqstan oblysyndaǵy áriptesterine elektrondyq poshtamen jiberdi.
Qazaqstan úkimeti «Jumyspen qamtý 2020 jol kartasy» baǵdarlamasyn 2013 jyly qabyldaǵan. Bul baǵdarlamada «jumys kúshine tapshy» aımaqtarǵa «jumys kúshi artyq» oblystardan mamandardy shaqyrý jaıy da aıtylǵan. Ár oblys osy baǵdarlama negizinde azamattardy kóshirý josparyn jasaýǵa kirisken. Sondaı óńirlerdiń biri – Shyǵys Qazaqstan oblysynyń 2014 jyldan bastap «jumys kúshi mol aımaqtardan (Almaty, Jambyl, Qyzylorda, Ońtústik Qazaqstan oblystarynan) eńbekke jaramdy azamattardy» kóshirip alýǵa kiriskenin Azattyq buǵan deıin de jazǵan.
Derekkóz: Azattyq
