Aıtysker aqyn Rınat Zaıtov «Astana» arnasyndaǵy «Syrlasý» baǵdarlamasynda qonaq bolyp, biraz syryn aqtardy, — dep habarlaıdy Baistars.kz.

Aıtysker aqyn sońǵy jyldary oǵan «joǵarǵy jaqtan» bireýdiń aıtysqa shyǵýyna kedergi keltirip júrgenin tilge tıek etti. «Aıtysqa shaqyrsa — baryp qatysamyn, biraq kóp jaǵdaıda meniń qatysýymdy qalamaıtyndar bar kórinedi» — deıdi aqyn. Júrsin Ermanmen BAQ betterinde birshama daýlasqanymen, qazirgi tańda jaqsy qarym-qatynasta ekenin aıtyp, biraz ósek-aıańnyń túbine núkte qoıǵandaı boldy.

Áńgimeniń deni kóbine onyń sońǵy kezderi qazaq estrada juldyzdarynyń ánderine sóz jazýy tóńireginde órbidi. Aıtysker aqyn estradadaǵy ánshilerdi «qazaqı jáne qazaqı emes» dep qarastyratynyn aıtty. Sonymen qatar keıbirinen tipti jıirkenetinin jasyrmady. Oǵan ásirese «Orda» tobynyń solısi Erbolat Bedelhannyń bastaýymen qurylǵan toptyń («Ninety One» — avt.)  shashtaryn boıap, syrǵa taǵyp júretini múlde unamaıdy eken. Ol tipti olardan qorqatyn kórinedi. «Olardy teledıdardan kórsetip otyrǵan adam da — qylmysker, olardy shyǵaryp otyrǵan adam da — qylmysker, olarǵa án jazyp otyrǵandar da — qylmysker. Olardyń ózderi de úlken qylmyskerler!» — dedi aqyn. «Zaman degenimen, ár ulttyń óz bolmysy bar, ózine tán ánderi bar» — dep sózin jalǵady aıtysker.

Esterińizge salsaq, «Ninety One» toby 2015 jyly «Orda» tobynyń solısi Erbolat Bedelhannyń bastaýymen quryldy. Jaqynda ǵana toptyń Q-pop (Qazaq-pop) dep atalatyn sýbmádenıettiń negizin qalamaqshy ekeni habarlanǵan edi.