Eks-depýtat, ǵalym Amangeldi Aıtaly Aqtóbe oblysyndaǵy dinı jaǵdaıdyń ýshyǵý sebebin Memleket hatshy Gúlshara Ábdiqalyqovaǵa jaıyp saldy, - dep habarlaıdy «Qamshy» portaly NUR.KZ-ke silteme jasap. Qoǵam qaıratkeriniń aıtýynsha, dinı saýaty joq ákimdik qyzmetkerleri tek "dikeńdeýmen" júıkeni juqartyp, quqyq qorǵaý qyzmetkerleri qýdalaýmen jaǵdaıdy tek asqyndyryp jatqan kórinedi.

«Ateısik qoǵamda din jaǵdaıy óte kúrdeli. Bizdiń elimizde jasandy dinshil bolyp kóriný bar. Ysyrapshyldyq, kıim, kóp áıel alý, órkókirektik, dinge degen salqyndyq áli bar. Memlekettik qyzmetshiler men muǵalimder namaz oqıtyn jastarǵa kúdikpen qaraıdy. Meshitke baratyn jastardy jumysqa qabyldamaı, alalaý bar. Ekstremızmge jaqyn dep otbasy múshelerine kúdikpen qaraý bar. Din tóńiregindegi jaǵdaı ońdy bolmaı otyr», - deıdi qoǵam qaıratkeri.

Amangeldi Aıtaly Memlekettik hatshy Gúlshara Ábdiqalyqovaǵa shynaıy jaǵdaıdy baıandaı otyryp, oblys ákiminen qadaǵalaýdy surady.

«Jastar quqyq qorǵaý organdarynyń jumysyna rıza emes. Pagon taǵatyn adamdar namaz oqıtyn jastardy  qýdalap, shamadan tys kúdiktenip, úıine kelip aıyptaıdy! Qazir ýaqyt ózgerdi, biraq, kóneniń psıhologıasy kete qoıatyn emes. Osyny quqyq qorǵaý organdary eskerse eken. Biz elbasynyń ınstıtýsıonaldyq baǵytyn júzege asyrý boıynsha naqty qadam josparyn bastadyq. Onda birinshi kezekte memlekettik qyzmetkerlerdiń mádenıeti tur. Ol din máselesine de qatysty. Memlekettik mekemelerde mádenıet joq», - dedi Amangeldi Aıtaly.

Teris aǵymmen jappaı kúresti bastaǵan memqyzmetkerler "dikeńdeýden" ári aspaı jatyr.

«Berdibek Mashbekuly, bizdiń ákimdiktegi qyzmetkerlerdiń dinı saýaty tómen. Bular "dikeńdeýdi" biledi, baqylaýdy biledi. Biraq, mádenıeti joq. Olarda eldiń arasyndaǵy rızashylyq kemde kem. Mekteptiń dırektoryn ákimshilikke shaqyryp «Seniń balań nege meshitke barady» dep jaǵadan alady. Osyndaıdan keıin býyny qatpaǵan jastar nege teris aǵymǵa túspesin, túsedi! Sondyqtan, mende bir usynys bar. Ol tek meniń usynysym emes. Basqarý organdarynda, ákimshilik,  quqyq qorǵaý organy bolsyn din turǵysynan saýatty bolýy kerek. Meshitke baryp "dikeńdemeı" «qurmetti ımam» dep qurmet kórset. Biz keıde adamdardy osy minezimizben ýshyqtyryp almaımyz ba dep qorqamyn. Teris aǵymǵa myltyqpen,  polısıamen kúres júrgize almaımyz. Ideıany ıdeıamen jeńý kerek. Azamattyq qoǵam kúshimen kúresemiz. Aǵymdarǵa qazaq dástúrin nasıhattaýmen jeńemiz», - dedi qoǵam qaıratkeri.

Óńirdegi dinı jaǵdaıdyń ýshyǵýyna júrgizilip jatqan tekseristerdiń de áseri baryn aıtqan Amangeldi Aıtaly tózimmen, sabyrlyqpen jumys jasaýdyń jetpeı turǵanyn aıtty.

«Dindi qorǵaý - ulty qorǵaý. Dinge senimsizdik týǵyzý - ult bolashaǵyna senimsizdik týǵyzý.  Qalyń qazaq arasynda shúkirshilik etetinder kóp. Kelisimniń turaqty bolyp otyrýy sonyń arqasy. Olarǵa kúdik týǵyzbaý kerek. Qýdalamaý kerek», - degen Amangeldi Aıtaly.