"ۇلتتاردىڭ ءوزارا جاقىنداسۋى" دەگەندى كەيبىرەۋلەر تەك شاعىن ۇلتتاردىڭ ورىستارعا نەمەسە قىتايلارعا جاقىنداسۋى دەپ تۇسىنەتىن سياقتى. قاي ۇلت ءوزىنىڭ ءتىلىن، ءداستۇرىن ەرتەرەك جويىپ ورىستانۋ، قىتايلانۋ جولىنا تۇسسە، ولارشا سول ۇلت "جاقىنداسۋعا، ينتەرناسيونالدانۋعا" بەت تۇزەگەن بولىپ ماداقتالادى. "جاقىنداسۋ" دەگەن، ەڭ الدىمەن كسرو-دا ورىسپەن، كحر-دا قىتايمەن جاقىنداسۋ، ءوزىن ءوزى جويىپ جىبەرۋ جولىنداعى قاسىرەتتى كۇندەردى جىلاپ تۇرىپ كۇتىپ الۋعا زورلاپ كوندىرۋ دەگەن ءسوز. ادىلدىگىن، قۇدايشىلدىعىن ايتار بولساق، ورىستار دا، قىتايلار دا باسقا حالىقتارعا ادالدىقپەن جاقىنداسۋى كەرەك قوي. وڭمەڭدەگەن، وزبىرلانا، وكتەمدىكپەن كيمەلەي جاقىنداۋدان نە شىعادى؟ قازىرگى جاعىدايدا"سەن ماعان جاقىنداسۋعا مىندەتتىسىڭ، ال مەن ساعان جاقىنداسۋعا مىندەتتى ەمەسپىندى" عانا كورىپ وتىرمىز. شىنتۋايتقا كەلگەندە، ءسوز ويناتۋدى، ساياسي قۇيتىرقىلىقتى قايىرىپ قويىپ، شىندىقتىڭ بەتىنە تۋرا قاراي الساق، زور، وكتەم بيلەۋشى ۇلت پەن بودان، كىرمە ۇلتتىڭ اراسىندا ەشقاشان دا، ەش جەردە دە تەڭدىك بولعان ەمەس، ءارى بولمايدى دا. تاريحتىڭ ءبىز كورىپ- بىلگەن شىندىعى وسى، قالعاندارىنىڭ ءبارى- تەك سۇرقيا ناسيحاتتىق داڭعازا عانا!