الەمنىڭ بارلىق جوو ءۇشىن ءبىلىم بەرۋ نارىعىندا حالىقارالىق دارەجەدە مويىندالۋ مەن تابىستى باسەكەگە قابىلەتتىلىك ۋاقىت وتكەن سايىن ەرەكشە مانگە يە بولىپ كەلەدى. جەتەكشى ۋنيۆەرسيتەتتەردىڭ دارەجەسى ەڭ الدىمەن حالىقارالىق رەيتينگتەردە انىقتالادى. قازاقستان رەسپۋبليكاسى پرەزيدەنتىنىڭ جارلىعىمەن 2020 جىلعا دەيىن قازاقستاننىڭ كەم دەگەندە ەكى جوعارى وقۋ ورنى الەمنىڭ ەڭ ۇزدىك ۋنيۆەرسيتەتتەرىنىڭ قاتارىنا قوسىلۋ مىندەتى قويىلدى. ءال-فارابي اتىنداعى قازۇۋ از عانا ۋاقىت ىشىندە الەمدىك ءبىلىم بەرۋ رەيتينگتەرىندە قارقىندى العا جىلجىپ، حالىقارالىق QS (ۇلىبريتانيا) رەيتينگىنىڭ كورسەتكىشى بويىنشا ۇزدىك-300 ۋنيۆەرسيتەتتەردىڭ قاتارىنا ەندى.

ءال-فارابي اتىنداعى قازۇۋ-دىڭ حالىقارالىق QS (ۇلىبريتانيا) رەيتينگىندەگى جەتىستىكتەرى الىس-جاقىن شەتەلدەردەگى كوپتەگەن ۋنيۆەرسيتەتتەردىڭ قىزىعۋشىلىعىن ارتتىرىپ وتىر. شەتەلدىك ارىپتەستەردىڭ رەسمي ءىس-ساپارى سوعان دالەل. رەسەيدىڭ وڭتۇستىك ورال مەملەكەتتىك ۋنيۆەرسيتەتىنىڭ رەكتورى الەكساندر شەستاكوۆتىڭ باسشىلىعىمەن كەلگەن دەلەگاسيا وكىلدەرى قازۇۋ-دىڭ ناتيجەگە باعىتتالعان باسقارۋ (نبب) قىزمەتىن جوعارى باعالادى. اتالمىش جۇيە نەگىزىندە وقىتۋشىلار مەن قىزمەتكەرلەردىڭ جۇمىسىن رەيتينگتىك باعالاۋدا تازا ءتارتىپ ورناتىلعان. ول ۋنيۆەرسيتەتتىڭ حالىقارالىق رەيتينگتە جوعارى كورسەتكىشكە قول جەتكىزۋىنە ايتارلىقتاي اسەر ەتتى.

 «ءبىزدىڭ ماقساتىمىز ءالى دە كەڭ ەتەك جاياتىن ەۋرازيالىق ەكونوميكالىق وداق اياسىندا ءوزارا ىنتىماقتاستىقتى دامىتۋ. ۋنيۆەرسيتەتپەن تانىسقاننان كەيىن، قازۇۋ – ەۋروپا ەلدەرىندە تەڭدەسى جوق، كەرەمەت ستۋدەنتتىك ورتالىق پەن كامپۋس دەپ ايتا الامىن. قازۇۋ فەنومەنى، ونىڭ ساياساتى مەن ەندىگى ەكى جوعارى وقۋ ورىنى اراسىنداعى مۇمكىندىكتەر مەن ءوزارا ءتيىمدى ارىپتەستىك ورناتۋ ءبىزدىڭ ۋنيۆەرسيتەتتەردى دامىتۋعا باعىتتالعان ءساتتى قادام»، – دەدى وڭتۇستىك ورال مەملەكەتتىك ۋنيۆەرسيتەتىنىڭ رەكتورى الەكساندر شەستاكوۆ.

ءال-فارابي اتىنداعى قازۇۋ رەكتورى عالىمقايىر مۇتانوۆ ءوز كەزەگىندە بىرلەسكەن جۇمىستىڭ مۇمكىندىكتەرى مەن ءبىرىنشى كەزەكتە ورىندالاتىن ىستەردىڭ ءتىزىمىن ايقىندادى. «ەۋرازيالىق ەكونوميكالىق وداق اياسىندا بۇگىندە قازۇۋ 119 كەلىسىمشارت نەگىزىندە رەسەي فەدەراسياسىنىڭ كوپتەگەن جوعارى وقۋ ورىندارىمەن ىنتىماقتاستىق قارىم-قاتىناس ورناتقان. كەلەسى جىلى «ەكسپو-2017» كورمەسىندە «كەلەشەكتىڭ ەنەرگياسى» باستى تاقىرىپتاردىڭ ءبىرى بولماق. قازۇۋ بۇۇ-نىڭ «اكادەميالىق ىقپالداستىق» باعدارلاماسىنىڭ جاھاندىق حابى بولعاندىقتان، اتالمىش كورمەدە جاسىل ەكونوميكا جانە قايتا قالپىنا كەلەتىن ەنەرگيا كوزدەرى باعىتىندا جاسالعان بىرلەسكەن جوبالاردى كورسەتۋ قوعام ءۇشىن وزەكتى ءارى قىزىقتى بولادى»، - دەپ اتاپ ءوتتى قازۇۋ رەكتورى. كەزدەسۋ سوڭىندا ەكى جاق «جىلۋەنەرگەتيكا» ماماندىعى بويىنشا قوسديپلومدى ءبىلىم بەرۋ باعدارلاماسى اياسىندا كەلىسىمگە قول قويدى. سونىمەن قاتار ءتىل ۇيرەنۋ، سونىڭ ىشىندە قازاق ءتىلى مەن اعىلشىن ءتىلىن جەتىلدىرۋ ماقساتىندا شەتەلدىك ستۋدەنتتەرمەن الماسۋعا كەلىسىپ، بىرلەسكەن جاڭا جوبالاردى قولعا الۋ ماسەلەلەرىن تالقىلادى.

انىقتاما ءۇشىن:

وڭتۇستىك ورال مەملەكەتتىك ۋنيۆەرسيتەتىنىڭ نەگىزى 1943 جىلى 2 قاراشادا چەليابينسك مەحانيكو-ماشينا قۇراستىرۋ ينستيتۋتى بولىپ قالانعان، 1951 جىلى چەليابينسك پوليتەحنيكالىق ينستيتۋتى، ال 1990 جىلى چەليابينسك مەملەكەتتىك تەحنيكالىق ۋنيۆەرسيتەت بولىپ قايتا قۇرىلعان. 1997 جىلدان بەرى وڭتۇستىك ورال مەملەكەتتىك ۋنيۆەرسيتەتى رەتىندە قىزمەت اتقارىپ كەلەدى.

2008 جىلى ۋنيۆەرسيتەتتە قولدانبالى جانە فۋندامەنتالدى زەرتتەۋلەردى مودەلدەۋ ءۇشىن سۋپەركومپيۋتەر ورتالىعى اشىلدى. بۇگىندە وڭتۇستىك ورال مەملەكەتتىك ۋنيۆەرسيتەتىندە الەمنىڭ ەڭ قۋاتتى TOP500 كومپيۋتەرلەر رەيتينگىندە 348-ورىنعا جايعاسقان «تورنادو يۋۋرگۋ» سۋپەركومپيۋتەرى قولدانىلۋدا. 2010 جىلى وڭتۇستىك ورال مەملەكەتتىك ۋنيۆەرسيتەتىنە ۇلتتىق زەرتتەۋ ۋنيۆەرسيتەتى كاتەگورياسى تاعايىندالدى.

2015 جىلدىڭ قازان ايىندا ۋنيۆەرسيتەت 5-100 جوباسىنا قاتىسۋ ءۇشىن ىرىكتەلگەن التى جوعارى وقۋ ورىننىڭ تىزىمىنە ەندى. اتالمىش جوبانىڭ ماقساتى جەتەكشى رەسەيلىك ۋنيۆەرسيتەتتەردىڭ جاھاندىق نارىقتا ءبىلىم بەرۋ قىزمەتى مەن زەرتتەۋ جوبالارىننىڭ باسەكەگە قابىلەتتىلىگىن  بارىنشا ارتتىرۋ.