تەرراكت وقيعاسىنان كەيىن قازاقستاندىق ونەر جۇلدىزدارىنىڭ ىشىندە «مۋزارت» توبى العاشقىلاردىڭ ءبىرى بولىپ، اقتوبەگە ارنايى كەلدى. تانىمال توپ حالىقتىڭ ەڭسەسىن كوتەرۋ ءۇشىن تەگىن كونسەرت قويىپ كەتتى. ورتالىق ساياباققا اعىلعان اقتوبەلىكتەردىڭ سانىندا ەسەپ جوق، - دەپ حابارلايدى Qamshy.kz NUR.KZ – كە سىلتەمە جاساپ.

«قازالى وتباسىلارعا قايعىرىپ كوڭىل ايتامىز. جازىقسىز جاپا شەككەن جانداردىڭ بارلىعىنا سىزدەرمەن بىرگە ەكەنىمىزدى بىلدىرەيىك دەگەن نيەتىمىز بار. ءبىز سىزدەردى جىلاتۋعا ەمەس، جۇباتۋعا كەلدىك، اعايىن. تاۋەلسىزدىگىمىزدىڭ 25 جىلدىعى قۇتتى بولسىن! بارشامىزعا تىنىش مەملەكەتتە عۇمىر كەشۋگە ءناسىپ ەتسىن. ۇرپاقتارىمىز اداسپاسىن، بولاشاعى جارقىن بولسىن! كوزىمىزدەن شىققان جاس تەك قۋانىشتىڭ جاسى، قۋانىشتىڭ تامشىسى بولسىن دەگىمىز كەلەدى»، – دەدى ساكەن مايعازييەۆ.

بەس مىڭنان اسا تۇرعىن «مۋزارت» اندەرىنە بيلەدى. حالىقتىڭ ىقىلاسى شەكسىز. اق جاۋلىقتى انالار، جاستار، بۇلدىرشىندەر بەيبىت كۇننىڭ اندەرىن تىڭدادى. جۇلدىزدى توپ 15 جىلدىقتارىنا ارنالعان كونسەرتتەرىن اقتوبەدەن باستاپ جاتقاندارىن ايتتى.

«بيىل ءبىزدىڭ توپقا 15 جىل. قۋانىشىمىزدى اقتوبە قالاسىنان باستاپ جاتىرمىز. سىزدەردىڭ اق باتالارىڭىزدى الۋعا كەلدىك. ەڭسەلەرىڭىزدى كوتەرۋگە، جاقسىلىقتى، بەيبىتشىلىكتى ناسيحاتتاۋعا كەلدىك. يسلامعا كىر كەلتىرىپ جۇرگەن ءتۇرلى اعىمداردان اۋلاق بولايىق. اتا-بابالارىمىز تەر توگىپ جەتكەن تاۋەلسىزدىگىمىزدى قۇرمەتتەيىك»،- دەدى “مۋزارتتىقتار”.

كونسەرتكە بەردىبەك ساپاربايەۆتىڭ ءوزى ارنايى كەلىپ، «مۋزارت» توبىنا اقتوبەلىكتەردىڭ اتىنان العىسىن ايتتى.

«ەلدەگى بولىپ جاتقان جاعدايعا بەي-جاي قاراماي، اقتوبەلىكتەردىڭ كوڭىلىن كوتەرۋگە كەلگەن سىزدەرگە راحمەت. كەشەگى وقيعادان كەيىن بۇل جىگىتتەردىڭ وزدەرى «اقتوبە جۇرتىنا تەگىن كونسەرت جاسايىق» دەگەن ۇسىنىس جاسادى. «حالىقتىڭ كوڭىلىن كوتەرەيىك، قاسىندا بولايىق» دەگەندەرى ءبىزدىڭ، ەلدىڭ مەرەيىن وسىرەدى. سوندىقتان سىزدەردىڭ اتتارىڭىزدان وسى توپقا شىعارماشىلىق تابىس تىلەيمىز. مەملەكەتىمىزدىڭ ابىرويىن ارتتىرا بەرىڭىزدەر. ەلىمىزدە تىنىشتىق، بەرەكەت بولسىن. ءار وتباسى بالالارىنا جاقسى تاربيە، ءبىلىم بەرسە، بىزدە تىنىشتىق تا، بەرەكەت تە، ابىروي دا بولادى»، – دەدى اقتوبە قالاسىنىڭ اكىمى بەردىبەك ساپاربايەۆ.