«اسقار جاكۋلين اتىنداعى قايىرىمدىلىق قورى» قاتەرلى ناۋقاستارعا، ونىڭ ىشىندە بالالار ەمحانالارىنا قايىرىمدىلىق جاساۋدى داعدىعا اينالدىرعان بولاتىن. وسى جولى قايىرىمدىلىق قورى الماتى قالاسىنداعى «ونكولوگيا جانە راديولوگيا قازاق عىلىمي زەرتتەۋ ينستيتۋتى» ورتالىعىنىڭ بالالار بولىمىنە باردى. بارعاندا دا بالعىن بالالىق شاعىندا باتپانداي اۋرۋعا جولىققان بالالاردىڭ كوڭىلىن اۋلاپ، ومىرگە دەگەن ءۇمىتىن وياتىپ، اۋىر سىرقاتپەن كۇرەسۋگە جىگەر بەرەتىن جىلى كوڭىلىمەن باردى، - دەپ حابارلايدى Qamshy.kz.
«اسقار جاكۋلين اتىنداعى قايىرىمدىلىق قورى» بالالار ءبولىمىنىڭ مەڭگەرۋشىسى بىكوۆسكايا اننا نيكولايەۆنانىڭ وتىنىشىمەن، بالالار بولىمىنە وتىزعا جۋىق ساپالى جينالمالى توسەك جانە كورپە جاستىق جيىنتىعىن سىيلاپ، ونىڭ ۇستىنە ەكى ءجۇز شارشى مەتر ويىن الاڭىنا سوڭعى ۇلگىدىگى توسەنىش جاتقىزىپ بەردى. شارا بارىسىندا قور وكىلدەردەرىنە دارىگەرلەر دە، اتا-انالار دا شەكسىز ريزالىقتارىن ءبىلدىردى.
جالپى قۇنى ەكى جارىم ميلليون تەڭگەگە باعالانعان سىيلىقتاردى تابىستاۋ راسىمىنە اقىن، قازاقستاننىڭ مادەنيەت قايراتكەرى الماس احمەتبەك ۇلى، قور ديرەكتورى گۇلنار سەيدوللا، سونداي-اق قوردىڭ قامقورشىلار كەڭەسىنىڭ مۇشەلەرىمەن بىرگە اسقاردىڭ قىزى ايدانا جاكۋلينا دا قاتىسىپ، بالالارعا جىگەر قايرات بەرە سويلەپ، قوردىڭ ماقساتتارىمەن تانىستىردى.
الماس احمەتبەك ۇلى وسى جىلدىڭ اقپانىندا دۇنيەدەن وزعان اسقار جاكۋلين تۋرالى سىر شەرتە كەلە، بۇگىندە قور قىزمەتكەرلەرى قامقورلىققا ەڭ مۇقتاج ەمدەۋ مەكەمەلەرى مەن كومەككە ءزارۋ بالالاردى وزدەرى ىزدەپ تاۋىپ، قولداۋ كورسەتىپ جاتقانىن ايتسا، اسقاردىڭ قىزى ايدانا جازدىق دەمالىس كەزىندە قور جۇمىسىنا ارالاسىپ جۇرگەنىن، بۇنداي سىرقاتپەن كۇرەسۋ سىرقات ادامعا دا، ونىڭ جاناشىرلارىنا دا قانداي رۋحاني سالماق تۇسەتىنىن اكەسىنىڭ سىرقاتىنان بىلگەنىن جەتكىزىپ، سىرقات بالالارعا جىگەر بەرە سويلەدى.
بالالار ءبولىمى مەڭگەرۋشىسىنىڭ مىندەتىن ۋاقىتشا اتقارۋشى جوعارعى ساناتتى دارىگەر توحمولدايەۆا قارلىعاش التىنبەكوۆنا حانىم اۋرۋحانا مەن ناۋقاس بالالاردىڭ جايىنا توقتالىپ: بالالاردىڭ ساۋىعۋ كورسەتكىشى جاقسارىپ كەلە جاتقانىن وسى قوردىڭ ءبىرىنشى ماۋسىم "بالالار قورعاۋ مەيرامى" كۇنىنە ۇيىمداستىرعان كوڭىل كوتەرۋ شارالارى جانە بۇگىنگى ءىس-شاراسى سىرقات بالالار مەن ولاردىڭ اتا-انالارىنا ۇلكەن قولداۋ ەكەنىن ايتىپ، اسقار جاكۋليننىڭ وتباسىنا اماندىق تىلەپ زور راحمەتىن جەتكىزدى. ال سول اۋرۋحانادا جاتقان ايسۋلتاننىڭ اجەسى احمەتوۆا بانۋ اپا قورعا دەگەن العىسىن بىلدىرە كەلىپ، اسقار جاكۋليننىڭ وتباسىنا كوڭىل ايتتى.
قور جەتەكشىسى گۇلنار سەيدوللا حانىم سوزىندە، - «اسقار جاكۋلين اتىنداعى قايىرىمدىلىق قورىنىڭ» باستى ماقساتى - اۋرۋعا شالدىققان ادامدار ىشىندەگى ەڭ قورعانسىز بولىگى – بالالارعا كومەك كورسەتۋ بولىپ تابىلادى. قور مۇمكىندىگىنشە ەڭ قاتەرلى اۋرۋلارمەن اۋىراتىن بالالارعا ەم الۋعا نە سونداي اۋرۋلاردىڭ الدىن الۋ شارالارىنا قولداۋ كورسەتەدى،- دەدى.
«اسقار جاكۋلين اتىنداعى قايىرىمدىلىق قورى» وسى جىلدىڭ ناۋرىزىندا اسقاردىڭ جارى جاينا جاكۋلينا حانىمنىڭ باستاماسىمەن قۇرىلىپ مەملەكەتتىك تىركەۋدەن وتكەن بولاتىن.
