قازىرگى كەزدە ءار ايماقتا ءدىن وكىلدەرىنەن، ساقال جىبەرىپ، شولاق شالبار كيگەندەردەن قاۋىپتەنۋ ءۇردىسى بايقالادى. اركىم ءوز وتباسى جانە تۋعان ەل اماندىعى ءۇشىن مۇسىلمان قاعيداتتارىن ورىنداپ قانا ءجۇرۋى مۇمكىن ەمەس بولىپ قالدى. پەندەلەر ءدىندى جارناماعا، ءتىپتى ساياساتقا اينالدىرىپ جىبەردى. باياعىدا اتا-اجەلەر ناماز وقيتىنىن ەشكىمگە ايتپاۋشى ەدى. ءقازىر سۋرەتكە، ۆيدەوعا ءتۇسىرپى، عالامتور ارقىلى ەلگە كورسەتۋگە قۇشتار. نەگىزى ءدىن تۋرالى ايتۋعا، ايتىسۋعا بولمايدى. مۇسىلمان بولساڭ ءوزىڭ ءۇشىن، باسقاعا سونى پاش ەتىپ، ارتىق ۋاعىزبەن جۇرتتىڭ مازاسىن الۋعا بولمايتىنىن كەيبىرەۋلەر ەسكەرمەيدى.
تەرروريزم ءقاۋپى دەگەندە اسىرە دىنشىلدەر مەن كەيبىر سەكتالارعا ەرىپ كەتكەن جاستاردى "تارتىپكە شاقىرۋ كەرەك " دەپ جاتادى. ۇكىمەتتەگى شەنەۋنىكتەر، ءتىپتى لاۋازىمدى زاڭ قىزمەتكەرلەرىنىڭ اراسىندا ۋاعىزشىلار بار ەكەنىن بايقامايتىن سياقتىمىز. كەيبىر يمامدارعا، دىنگە قاتتى بەرىلگەن قازاقتارعا كۇدىكپەن قاراعانىمىز بالكىم ءجون شىعار، ءبىراق بارىنەن ءقۋىپتىسى اق سالدەلى تەرروريزم ۋاعىزشىسى ەمەس كوستيۋمدى ۋاعىزشى، اعايىن.
ۇكىمەت قۇرامىنداعى قىزمەتكەرلەردى تومەنگى ساتىدان باستاپ جوعارىعا دەيىن، نەمەن شۇعىلداناتىنىن جاسىلاپ تەكسەرۋ كەرەك. دوكەي كرەسلودا وتىرعان ءبىر زاڭ قىزمەتكەرىمەن كەزدەسكەنىم بار. الگى ادام ءوزىنىڭ شەنەۋنىك ەكەنىن ۇمىتىپ، جۇرتقا ۋاعىز ايتقاندا "مولداڭ بەر جاقتا قالادى ەكەن" دەپ ويلادىم. ونىمەن قويماي، قاسىنداعى قىز-كەلىنشەكتەرگە (ۇستىندەگى كيىمى جابىق بولسا دا) حيدجاپ كيۋگە ۇگىتتەي باستادى. ءوزى اراپ ءتىلىنىڭ كۋرسىنا بارادى ەكەن. سودان دىنگە قاتتى بەرىلىپ كەتكەن. دىنگە بەرىلگەنىنە ەشكىمنىڭ قارسىلىعى جوق، ءبىراق زايىرلى مەملەكەتتىڭ شەنەۋنىگى بولا تۇرا اسىرە اراپشىل يدەولوگيانى كوشىلىككە ناسيحاتتاۋدىڭ نە قاجەتى بار دەسەڭىزشى؟!
الگى لاۋازىمدى زاڭگەر قىزداردى حيدجاپ كيۋگە ۇگىتتەپ بولعاندا ءسوز اۋانىن دجيحادقا اۋىستىردى. "دجيحاد اركىمنىڭ وزىنەن باستالادى" دەگەندى دە ايتتى. ەگەر ونىڭ الگى ناسيحات ۋاعىزىن ەستىگەن ادام "بالەن دەگەن شەنەۋنىك دجيحاد تۋرالى اڭگىمە ايتىپ، اراب يدەولوگياسىن ۋاعىزدادى" دەسە، ونىڭ سوزىنە كىم قۇلاق اسادى؟ "ءيا، شەنەۋنىكتىڭ دە اراب ءتىلى كۋرسىنا بارىپ، باسقالار سياقتى ءدىن جولىنا تۇسۋىنە قۇقى بار" دەپ قارسى ءۋاج ايتىلۋى مۇمكىن. ءبىراق سونداي شەنەۋنىكتەر ەل ىشىنە بىلدىرتپەي يدەولوگيالىق ۋ تاراتىپ، ونداي ناسيحاتتىڭ ۇلت بولاشاعى ءۇشىن ءقاۋىپتى ەكەنىن ەشكىم ەسكەرمەيتىن سياقتى. قوعامدى ءدۇر سىلكىندىرگەن وقيعا بولعاندا ءبىراق ءمان بەرەمىز.
بيىل شەنەۋنىكتەردىڭ كوپشىلىك جينالعان جەردە ىشىمدىك ىشپەۋى مەن كيىنۋ ەتيكاسىنا قاتىستى تالاپتار كوپ تالقىلاندى. شەنەۋنىكتەردىڭ (كىشى قىزمەتكەردەن باستاپ لاۋازىمدىسىنا دەيىن) بوس ۋاقىتىندا نەمەن اينالىساتىنى ءجىتى تەكسەرىلىپ، ولاردىڭ ءدىن مەملەكەتتەن بولەك بولىپ تابىلاتىن زايىرلى مەملەكەتتە ۋاعىز ايتۋىنا تيىم سالىنۋى كەرەك. ويتكەنى، ولاردىڭ اراسىندا جاستاردىڭ ساناسىن ۋلايتىن اسىرە ۋاعىزداردى جۇرگىزەتىندەرى بارىن كورىپ قالامىز كەيدە. جالپى ءدىندى ناسيحاتتاۋ شەنەۋنىكتىڭ ءىسى ەمەس. ۇكىمەت قىزمەتكەرلەرىنىڭ كوپشىلىك جينالعان ورىندا سويلەگەن ءسوزى، ىستەگەن ىسىنە دە باقىلاۋ قويىلۋى كەرەك.
ايعانىم ءبىرتۋار
