اقبوتا كەرىمبەكوۆا العاش رەت ءوزىنىڭ الفونس كۇيەۋلەرى تۋرالى ايتىپ بەردى. ءانشى ەكى رەت تۇرمىسقا شىققان. ءبىرىنشى رەكەت كۇيەۋى ونى قاتتى جاقسى كورگەن ەكەن. الايدا ءانشىنىڭ ءوزى وعان دەگەن لاۋلاعان سەزىمىنىڭ بولماعانىن ايتادى. ال ەكىنشى كۇيەۋىمەن اجىراسۋىنا ەنەسى سەبەپ بولعان. ەنەسى اقبوتانى “بالامدى دۋالاپ الدىڭ” دەپ ايىپتاعان.

بۇل تۋرالى 31 ارنانىڭ “ۇيات ەمەس” باعدارلاماسىندا ايتىلدى دەيدى stan.kz.

اقبوتا كەرىمبەكوۆا بالالىق شاعىنىڭ باقىتسىز كۇندەرگە تولى بولعانىن جاسىرمادى. اكەسى ىشىمدىك ءىشىپ، اناسىنا قول كوتەرگەن ەكەن. ولار اقبوتانىڭ 11-12 جاسىندا اجىراسىپ كەتكەن. ءانشى اتا-اناسىنىڭ اجىراسقانىنا تەك قانا قۋاناتىنىن ايتادى.

– ءبىرىنشى كۇيەۋىڭمەن ساعان قول كوتەرگەنى ءۇشىن اجىراستىڭ با؟

– جوق! اللا كورىپ تۇر جولداسىم ماعان قول كوتەرىپ، ۇرىپ-سوققان ەمەس. ءبىرىنشى كۇيەۋىم 93-94 جىلدارداعى بىلعارى كۇرتە كيىپ جۇرەتىن رەكەتتەردىڭ ءبىرى بولدى. تازا جولمەن جۇرمەسە دە، مۇنداي ىستەردەن باس تارتامىن دەپ ۋادە بەرگەن-دى. ءبىراق، قويمادى. ءقازىر قايدا جۇرگەنىن دە بىلمەيمىن. ەركەكتى سىيلاۋ كەرەك دەگەن قازاقى تاربيەمنىڭ ارقاسىندا وعان كوپ نارسەنى كەشىردىم. باسقالاردى ۇرعان شىعار، ءبىراق ماعان ساۋساعىنىڭ ۇشىن دا تيگىزگەن ەمەس. مەندە لاۋلاعان سەزىم بولماسا دا، كۇيەۋىم مەنى قاتتى جاقسى كوردى. اقشامىز بولماعاندىقتان، توي جاسامادىق. داستۇرگە ساي ەشنارسە بولمادى. ەكەۋىمىز دە قاراپايىم وتباسىنان شىققان. مەنىڭ اكە-شەشەم “ماسەلە اقشادا ەمەس، بىر-بىرلەرىڭدى شىن سۇيسەڭدەر بولدى” دەگەن قاعيدانى ۇستاندى. كوپ نارسەگە كوز جۇمىپ قارادى. اسىرەسە، شەشەم كوپ نارسەنى كەشىردى.

– جولداسىڭمەن بىرگە ءومىر سۇرە المايتىنىڭدى قاشان ءتۇسىندىڭ؟

– كۇن سايىن ۇيدەگى اڭگىمەمىز ۇرىس-توبەلەستىڭ اينالاسىندا ءوربىدى. شارشاتىپ جىبەردى. مەن ونەر ادامى بولعىم كەلدى. كىشكەنە كۇنىمنەن ءانشى بولۋدى ارمانداماسام دا، مۋزىكاعا جاقىن بولىپ ءوستىم. ىشتەي ءان ايتقىم كەلىپ تۇراتىن. جولداسىم ۇيلەنگەنگە دەيىن “ماعان ءبىر ۇل تۋىپ بەرسەڭ بولدى. ارى قاراي جۇڭگو اسىپ كەتسەڭ دە ءبارىبىر” دەپ جۇرەتىن ازامات ەدى. كەيىن بارىنەن قىزعاناتىن بولدى.

– سەن رەكەتتىڭ ايەلى بولدىڭ. ءوزىڭنىڭ باسىڭا ءقاۋىپ تونگەن جاعدايلار بولدى ما؟

– باسىما ءقاۋىپ تونگەن كۇندەر بولعان ەمەس. ەركەكتىك قاسيەتىنىڭ ارقاسىندا وندايعا جەتكىزبەدى. قاتتى جاقسى كورگەندىگى دە شىعار. ءبىر كۇنى “مەن سىرتقا شىعىپ كەتسەم، سەندەردى ءولتىرىپ كەتەدى” دەگەن اڭگىمە ايتا باستادى. سول كەزدە “اجالىمىز كەلسە، ءبارىن دە كورەمىز” دەيتىنمىن. وتباسىمىزدى قانشا ساقتاپ قالامىز دەسەك تە، بىرگە تۇرا المادىق. ول ءوز جولىن تاڭدادى. مەن شىداپ-كونىپ جۇرە بەرەتىن ايەلدەردىڭ قاتارىنان ەمەسپىن. كوزىم جەتسە بولعانى، اپ-ساتتە شەشىم قابىلدايمىن. اجىراسۋعا ۇسىنىس تاستاعان ءوزىم.

– ەكىنشى نەكەڭ دە ءساتسىز اياقتالدى. نە سەبەپتەن؟

– ەكىنشى كۇيەۋىم وتە جۋاس جىگىت بولدى. وزىندىك پىكىرى بولمادى. “مەن وتاعاسىمىن. وتباسىمدى قورعاپ، اسىراۋىم كەرەك” دەگەن تۇسىنىك بولمادى. اناسىنىڭ ايتقانىمەن ءجۇردى. ءبىزدىڭ اجىراسۋىمىزعا ەنەم سەبەپكەر بولدى. وسى باعدارلامانى كورىپ وتىرعان بولسا، ول كىسىگە ەش رەنىشىم جوق. تولىقتاي كەشىردىم. ولارعا مەنەن گورى، دۇنيەم كەرەك بولعان سياقتى. بۇل اشىقتان-اشىق ايتىلدى. ۇيىمە، كولىگىمە، اقشاما، مەنىڭ تاپقان تابىسىما قىزىعا باستادى. جۇرت اقبوتا كەرىمبەكوۆا ميلليونەر، اقشانى تۋىپ جاتىر دەپ ويلايتىن شىعار… وسىلايشا قاراپايىم 50-60 مىڭ تاۋىپ جۇرگەن ادام بايلىققا كەنەلگەندە الجىپ قالدى. دىم كورمەگەندىك دەگەن وسى بولار.

– سەنەن گورى اقشاڭا قىزىققانىن قالا ءبىلدىڭ؟

– جالپى جولداسىم ەكەۋىمىز ەشقاشان ۇرىسقان ەمەسپىز. اڭگىمەنىڭ بارلىعى ەنەمنىڭ تاراپىنان ايتىلدى. ول كىسىنىڭ “بالامدى دۋالاپ الدىڭ” دەگەن سوزىنە شىدامادىم. مۇنداي قاسيەتىم بولسا، جوعارىداعى ءمينيستردى نەمەسە ميلليونەردى، جاعدايى جاقسى ادامدى دۋالاپ المايمىن با؟! وسى ءسوزدى مەن كەشىرە المادىم. قورعاۋشى جالداپ، اجىراسىپ كەتتىم. مەنەن ەشنارسە الا المادى. ەكى كۇيەۋىم دە تابىس تاپقان ەمەس.

ەكەۋى دە مەنىڭ شاڭىراعىمدا تۇردى. ەكەۋىنىڭ دە تاماعىن، كيىمىن ءوزىم الىپ بەرىپ، جاعدايلارىن جاسادىم. اللادان جاسىرمايمىن! مۇنىڭ بارلىعى شىندىق. ءبىر كۇنى “قوي، بوتاش! ارى قاراي ءومىرىڭدى ءسۇر! ءۇيىڭدى سال. انا ءۇش بالاڭدى دۇنيەگە الىپ كەلگەن ەكەنسىڭ، اسىراپ ب ا ق” دەدىم. بۇل ومىردە ەشكىم ەشكىمگە مىندەتتى ەمەس. ونىڭ ۇستىنە مەن وزگە بىرەۋدەن تيىن سۇراۋعا داعدىلانباعان اداممىن. توي-تومالاق پەن كونسەرتتەن الدانىپ، ۇرىنىپ جۇرسەم دە، شۇكىر، تابىس تابامىن. ءقازىر ءۇش بالاما انام ەكەۋىمىز قارايلاپ وتىرمىز.