قۇرمانعازى راحمەتوۆ. جاستىق جالىن، جانعان وت، قۇربان جاستىق

«جەلتوقسان 86-2»

ەرتەڭىمىز نە كۇتىپ تۇرعانىن بىلمەگەن دە ەدىك. سارسەنبىنىڭ ءساتتى كۇنى بىزدەر ءۇشىن، ەكى پار ساباقتان كەيىن، «دينامو» ستاديونىنىڭ ىشىندە دەنە تاربيەسىمەن اياقتالاتىن. كۋرستىڭ ونشاقتى جىگىتتەرى ەركىن كۇرەسپەن اينالىسىپ، الماتىدا اۋناپ–قۋناپ قايتاتىنبىز. جاتاقحاناعا كەلسەك، ابىر-سابىر،بىرەۋلەرىنەن جاعدايدى سۇراستىرساق جاڭا عانا ءبىر توپ جاستاردىڭ بايتۇرسىنوۆ كوشەسىمەن الاڭعا كوتەرىلىپ بارا جاتقاندارىن كورگەن، قولدارىندا ترانسپورانتتارى بارىن دا ايتتى. كەشەگى كەشكىلىك كەزدەسۋدەن كەيىنگى جىگىتتەردىڭ بىزدەن ەرتەرەك قيمىلداعاندارىن بايقاپ، تەز-تەز جينالىپ مەيىرجان، نۇرلىبەك ۇشەۋىمىز «الاڭ قايداسىڭ؟» دەپ تارتىپ وتىردىق.

اباي كوشەسىنەن بايسەيىتوۆا كوشەسىمەن جوعارىلاپ بارا جاتقاندا – اق حالىق كوپ كەزدەسە باستادى، كوبىنەسە جاستار. الاڭنىڭ كىرە بەرىسى ءيىن تىرەسكەن حالىق، ورتاسىندا شوعىرلانعان جاستاردى بەلبەۋلەي قورشاپ تۇرعان ميليسيونەرلەردىڭ ساپىمەن ارپالىسا ءجۇرىپ ىشكە ەندىك. مەيىرجان مەن نۇرلىبەكتى سول جەردە جوعالتىپ الدىم. الاڭ تولى جاستارمەن قاۋىشىپ، دەنەنى ءبىر كەرەمەت سەزىم بيلەپ الا جونەلگەنى...

ونداي كەرەمەت سەزىم قۇشاعىن، بۇرىن سوڭدى بايقاماپپىن. ءۇش جاقتان جاڭادان كەلىپ جاتقان جاستار لەگى كەڭەستەر وداعىنداعى سول كەزدەگى ەڭ ۇلكەن، ەڭ كورىكتى الاڭىن تولتىرىپ تا جىبەردى. ءيىن تىرەسكەن جاستار. مىنبەر جاعىندا دا قوزعالىس نىشانىنىڭ كۇشەيىپ كەلە جاتقانىن بايقاماۋ، مۇمكىن ەمەس ەدى. ءقازىر جەلتوقساندىقتارعا ءىلىنىپ تۇرعان تاقتا ماڭىنان ۇلكەندەردىڭ «ەلىم-ايلاتقاندارى» دا قوسىلىپ كەتتى.

«...قاراتاۋدىڭ باسىنان، كوش كەلەدى-اۋ،

كوشكەن سايىن ءبىر تايلاق بوس كەلەدى-اۋ،» - دەگەن جەرلەرى بابالارىمىزدىڭ باستارىنان وتكەن سان قيلى تاريحىن كوز الدىمنان وتكىزگەندەي اسەر قالدىردى. ءبىزدى قورشاپ تۇرعان ميليسيالارمەن جاستار الىسىپ، ارپالىسىپ كىرىپ جاتتى. كەيبىر جەرلەردە شەپتەرىن وزدەرى اشىپ جىبەرىپ، لەك-لەگىمەن ورتاعا جىبەرىپ قويىپ جاتقاندارىن دا بايقاپ قالدىم. «بەلبەۋ» سياقتى ميليسيونەرلەر شەبىنىڭ ارعى جاعى دا جاستار بولاتىن. مەگافون قولدان قولعا ءوتىپ، سويلەپ تۇرعان ادامدى كورۋ ءۇشىن جاستار ءبىر ساتتە وتىرا قالىپ، جالىندى سوزدەرگە قۇلاق اسىپ، اۋىزبىرشىلىكتىڭ وزىق ۇلگىلەرىن دە كورسەتە باستادى. الاڭ ءبىراۋىزدان مىنبەرگە دىنمۇحامەد احمەت ۇلى قونايەۆتىڭ ءوزى شىعىپ، تولىق جاعدايدى ءتۇسىندىرىپ بەرۋىن تالاپ ەتتى. بولماعان جاعدايدا بۇل الاڭنان تارقامايتىنىن، قاجەت بولسا كەش، ءتۇن، تاعى دا ءبىر كۇن كۇتەتىنىن جەتكىزدى. «دولوي كولبينا، كاجدومۋ نارودۋ سۆوەگو ۆوجديا»،- دەگەن ورىسشا، «كولبين كەت، ءار ۇلتقا ءوز باسشىسى، كوسەمى اۋەلبەكوۆ، نازاربايەۆ بولسىن»،- دەگەن ۇرانداردى جاستار ءبىراۋىزدان قايتالاپ جاتتى. ءبىراق مىنبەر جاقتىڭ تالابى: تارقاڭدار، تارقامايتىن بولساڭدار كۇش قولداناتىندارىن ەسكەرتىپ، بىرىنەن كەيىن ءبىرى ايتىپ جاتتى. كىمنىڭ كىم ەكەنىن تانىپ، اجىراتىپ جاتقان ءبىز ەمەس. مەگافون قولىما تيگەن كەزىندە، پارتيا باسشىلىعىنا كاكىمبەك سالىقوۆتىڭ كانديداتۋراسىن ۇسىنىپ، زامانداستارىما جالىندى ءسوزىمدى ارناپ ۇلگەردىم. كوپشىلىك مەنىڭ سوڭىمنان كەيىن ءۇش-تورت رەت قايتالادى. كەيبىر جەرلەردەن كوزگە ەرەكشە ءتۇسىپ قالعانداردى بىر-بىردەن شىعارىپ الۋعا تىرىسىپ، كەي جەردە الىپ تا كەتىپ جاتتى. الاڭنىڭ باتىس جاق شەتىنەن ەنگەن قولىنا جەتەكتەگەن بالاسى بار ايەلدىڭ ايعايلاپ سويلەگەن سوزىنە بەت بۇردىق. ءبىر ءسات ءوزىمنىڭ ىعىسىپ تريبۋنا جاقتى جاعالاي ەكى-ۇش ساپ قاتار تۇرعان ميليسيا قاتارىنا جاقىنداپ قالعانىمدى بايقادىم. الدىڭعى قاتاردان فاكۋلتەتتىڭ جىگىتتەرىن كەزدەستىرىپ قالدىم. ءجيى-جيى جاريالانىپ جۇرگەن سۋرەتتىڭ الدىڭعى قاتارىندا تۇرعان فيزفاكتىڭ سەرىك دەگەن جىگىتى، 69 جىلعى، قىزىلوردالىق. ءسال ارتىندا قايرات سارييەۆ تۇر. مەن وبەكتيۆكە سيماي قالىپپىن، ءسال سولعا قاراي تورت-بەس جىگىتتەن كەيىن تۇرعان ەدىم. ەكى جاقتىڭ تالاپتارى دا ورىندالمايتىنداي كۋلميناسيالى جاعدايلار دا جاقىنداپ كەلە جاتقانىن ءىشىم سەزدى. العاشقى قار كەسەكتەرى مەن ميليسيونەرلەردىڭ باس كيىمدى جۇلىپ الىپ ورتاعا لاقتىرعاندارىن دا كوزىم شالىپ قالدى. تەمىر ستولبقا شىعام دەگەن جىگىتتەردىڭ ۇش-تورتەۋىنىڭ جولى بولمادى. ۇزىنشا كەلگەن جىگىتتىڭ ورمەلەپ بارا جاتقانىن كورىپ كوڭىلىم ەرىكسىز سول جاققا اۋدى.

ول كوپ كىدىرمەستەن باسىنا جەتىپ، ءبىر قولىمەن تەمىر ستولپتى قاپسىرا، ەكىنشى قولىمەن داۋىس كۇشەيتكىشتى جۇلقىپ-جۇلقىپ جەرگە تاستاي سالدى. كوپشىلىك شۋلاپ، قول سوعىپ جاتىر. كەيىننەن ءبىلدىم، ول سول ارەكەتى ءۇشىن بەس جىلعا باس بوستاندىعىنان ايرىلعان، ەت كومبيناتىنىڭ سول كەزدەگى جۇمىسشىسى جۋاندىقوۆ بولات ەكەن. وسىدان كەيىن-اق، بەيبىت ميتينگىنىڭ ءسانى مەن ءمانى وزگەرىپ، ءبىر جاعى جاستار، ەكىنشى جاقتان قارۋلى اسكەرلەر مەن ميليسيا قىزمەتكەرلەرىنىڭ اراسىنداعى قاندى قاقتىعىس باستالىپ كەتتى. جان الىسىپ، جان بەرىسكەن وسى قاقتىعىس الما كەزەك، يت جىعىسقا ۇقساعانداي. بىزدەردى الاڭنىڭ شەتىنە قۋىپ تىقسا، بارارعا جەرى قالماعان جاستاردىڭ بويىنداعى جىگەرى مەن نامىسى قارۋلى اسكەردى الاڭنىڭ ەكىنشى شەتىنە اتويلاپ، ارۋاقتاپ، قۋىپ تاستايدى. بايقاعانىم، ءار جولدا ەكى جاقتان دا 20-30 ادامنان ءارتۇرلى جاراقات العاندار الاڭ ورتاسىندا قالىپ جاتتى. ۇلگەرگەنىمىزشە كەيبىرىن الاڭنىڭ شەتىنە شىعارىپ، ىشىمىزدەن سول جەردە جەدەل تۇردە جاساقتالعان توپ ولاردى شەت جاققا جەتەلەپ، سۇيرەلەپ، تاسىپ جاتتى. وسىلاي ءۇش-تورت تولقىندى باسىمنان وتكەرگەن ەدىم. سوڭعى تولقىن كەزىندە قاشىپ ءجۇرىپ توبەلەسىپ كەلە جاتىپ، ءبىر قىزدىڭ ءسۇرىنىپ قۇلاپ قالعانىن بايقادىم. كومەككە ۇمتىلعان كەزىمدە اسكەريدىڭ "دۋبينكامەن قىزعا ۇمتىلعانىن بايقاپ، ارۋاقتاپ جەتىپ بارىپ وڭ اياعىممەن تەپپەك بولعان ساتىمدە، «ششيتىن» قويىپ ۇلگەرگەن ەكەن، تىزەمنەن تومەن ورتا ءتۇسىن ورىپ ءتۇستى. باسىندا ەت قىزۋىمەن بايقاماعان ەكەنمىن، جەتەكتەپ العان قىزىمدى جىگىتتەردىڭ قولىنا تاپسىرعاننان كەيىن، اياعىمنىڭ باستىرتپايتىنىن بايقاپ، جانىماداعىلارعا سەندەرگە ماسىل بولمايىن دەگەندى ايتىپ، الاڭنان سىلتي باسىپ جاتاقحاناما تارتتىم. كەلسەم كەيبىر جىگىتتەرىمىز، جارالارىن تاڭىپ، قايتا الاڭعا كەتىپ تە جاتىر ەكەن. مەن ءۇشىن الاڭداعى ايقاس وسىمەن تامام بولعان ەدى. اياعىمدى مىقتاپ تاڭىپ الىپ، قازاق جاستارىنىڭ ەرلىكتەرىنىڭ ءاربىر ەپيزودتارىن ەسىمە الىپ، اسىرەسە، قارشاداي قازاق قىزدارىنىڭ ەتەكتەرىن كوتەرىپ الىپ، تاس پەن مرامورلاردى تاسىپ، جاندارىمىزدا جاي عانا جۇگىرىپ جۇرگەندەرى ەمەس، جىگىتتەردىڭ نامىس پەن جىگەر وتتارىن قايراپ، ورتاق كۇرەستە ءوز ۇلەستەرىنىڭ ەر ازاماتتاردان ەشقانداي كەم ەمەستىگىن بايقاتقاندارىن ويلاپ جاتىپ، ۇيىقتاپ كەتىپپىن. تاڭەرتەڭىنە دەكاناتقا شاقىرىپ جاتىر دەگەننەن كەيىن بارسام، ورىس گرۋپپاسىندا وقيتىن قوعامدىق «كاسسيرىمىز» كەلمەي قالعان ەكەن. دەكاناتتىڭ تاپسىرماسىمەن ءبىر جىگىتتى ەرتىپ الىپ قازمۋ-دىڭ قالاشىعىنا ءبىرىنشى كۋرستىڭ (ستيپەنديالارىن) شاكىرت اقشالارىن اكەلۋگە كەتتىم. اقشالارىن اكەپ تاپسىرعاننان كەيىن، جاتاقحاناداعى جىگىتتەرمەن بولعان وقيعا جايىن ەگجەي–تەگجەيلى سۇراستىرۋعا كىرىسىپ كەتتىم. تەلەديداردان شەتەلدەردەگى قاقتىعىستاردى كورگەن باسقا دا، بىزدە ورىن العان مىنادايلارى كورۋ باسقا. قالانىڭ جالپى جاعدايىن بىلەيىن دەگەن ماقساتپەن، ناعاشى اعامنىڭ ۇيىنە تارتتىم.
جولدا قولدارىنا قىزىل داكە تاققاندارمەن دە ءبىر قىرقىسىپ الدىم. اياعىمنان سىلتىپ باسقانىم بولماسا، بەتى-كوزىم امان ەدى. ۇيگە كەلسەم، ناعاشى اعام دا، مەكتەپتىڭ ونىنشى سىنىبىندا وقيتىن باۋىرىم دا، بارشامىزدىڭ ايتار تاقىرىبىمىز دا وسى بولدى. ءتۇن ورتاسى اۋا، اقىرىن تۇرىپ الىپ ناعاشىمنىڭ باسپا ماشەڭكەسىنە قونجيىپ، بۇۇ اسسامبلەياسىنىڭ باس حاتشىسى - حاۆەر پەرەس دە كۋەليارعا بولعان وقيعالاردى بايانداپ، بىزدەرگە كومەك كورسەتۋلەرىن سۇراپ، ءبىر بەت حاتىمدى جازىپ، جاقسىلاپ تىعىپ الىپ، تاڭنىڭ اتۋى مەن اۆتوبۋستىڭ قاتىناۋىن كۇتىپ جاتتىم. ەرتەمەن جاتاقحاناعا كەلە سالىسىمەن ستاروستالار مەن كومسورگتاردى جيىپ، ويلارىمىزدى ورتاعا سالىپ، «لەنيندىك ۇلت ساياساتى جاساسىن!»، «قازسسر كونستيتۋسيا قاعيدالارى ساقتالۋى ءتيىس!»،- دەگەن ەكى لوزۋنگ ازىرلەپ، ءبىر پاردان كەيىن بارلىعىمىز الاڭعا قايتا شىعاتىن بولىپ كەلىستىك. اركىم وزدەرى جەكە-جەكە تاپسىرما الىپ، جاۋاپكەرشىلىكتەرىن دە مويىندارىنا الاتىن بولىپ كەلىستىك.

اعىلشىن تىلىندە وقيتىن ءبىرتالاي گرۋپپالاستارىم مەن ەكى قازاق گرۋپپاسى جالپى الپىس-جەتپىستەيىمىز جينالىپ بايتۇرسىن ۇلى كوشەسىمەن جوعارى كوتەرىلىپ بارا جاتتىق. جول جونەكەي جانىمىزداعى تەاتر كوركەمسۋرەت ينستيتۋتىنىڭ جاتاقحاناسى مەن قازمۋ-دىڭ حيميا فاكۋلتەتىنىڭ ستۋدەنتتەرىنە ايعايلاپ، بىزدەردى قولداۋىن سۇرادىق. ماسانچي كوشەسىنىڭ بۇرىشىنا جەتە بەرگەنىمىزدە ءۇش ادام بىزگە بۇيىرىمىزدەن قوسىلىپ، ۇلكەندەۋ بىرەۋى ءمان-جايدى سۇراستىردى. جاعدايلارىمىزدى ءتۇسىندىرىپ، بەيبىت تۇردە الاڭعا بارىپ، ەكى كۇن قىرعىندا ۇستالىپ، قاماۋدا وتىرعانداردى بوساتۋلارى جونىندەگى تالاپتارىمىزدى جەتكىزبەكشىمىز دەدىم. توپتىڭ ارتقى جاعىندا كەلە جاتقانمىن. باسىمدى كوتەرىپ قالسام، الدىمداعى كۋرستاستارىم جان-جاققا جامىراي قاشىپ جاتىر ەكەن، ءتۋسىنىپ تە ۇلگەرگەن جوق ەدىم، ارتىمنان سوققى كەلىپ ءتيدى. بۇرىلىپ جالت قاراسام، قارسى الدىمدا قازاقتىڭ «مەنتى»، وڭ قولىندا دۋبينكاسى، سول قولىندا قالقانى، قاسقيىپ قاراپ تۇر. كوز جانارىمنان ۇشقان وتتى بايقاپ قالعان دا بولۋى كەرەك، ول دا تاپجىلماي سىلەيىپ تۇرىپ قالعان. جانارىنا كوزىم ءتۇسىپ، ەش نارسەنىڭ ءىزىن بايقاي المادىم. ءالى كۇنگە دەيىن سول «مەنتتىڭ» جانارى قالىپ قويعان سياقتى. كەلگەننەن كەيىن دە ءبىراز ىزدەستىردىم. قايدا ەكەن سول قازاقتىڭ «مەنتى»؟... جەرگە قاراسام، قان تامىپ تۇر ەكەن. سوندا عانا يەگىمنەن قان سورعالاپ تۇرعانىن بايقادىم. كۇرتەشەمنىڭ «كاپيۋشونى» بار ەدى، ارتتان كەلىپ سوققان كەزدە، ءسال ۇستىگە نەمەسە استىعا كەلگەنىندە، ءتىرى قالىپ، وسىنداي ەستەلىك جازىپ وتىرۋىم ەكىتالاي ەدى. جاراتقاننىڭ كورسەتەر جارىعى بارىن سوندا عانا سەزىندىم. جانىنداعى ميليسيونەرلەر جاقىنداپ، ون مەتردەي جەردە كەلىپ توقتاعان اۆتوبۋستىڭ ىشىنە تىقپالاپ وتىرعىزا باستادى. مەنىڭ جارامدى بايقاپ، توقتاماي اققان قاننان سەكەم الدى ما، ايتەۋىر، بوساتىپ جىبەردى. جاتاقحانادان ونشاما ۇزاماعاندىقتان، جانىمدا كىم بارى ەسىمدە جوق ەكى-ۇشەۋ بولىپ جاتاقحاناعا قايتتىق. كەلە سالىسىمەن، جارامدى جۋىپ، ءوزىمدى ءوزىم تارتىپكە كەلتىرگەنىم سول ەدى، دەكانىمىز باستاعان ەكى-ۇش ءمۇعالىم كومناتاعا كىرىپ كەلدى. مەن ورىن العان جايدى ايتىپ، گرۋپپالاستارىمنىڭ كوبىنىڭ بۇعان سونشاما قاتىسى جوقتىعىن، مەن باستاپ اپارا جاتقانىمدى مويىنداۋعا تۋرا كەلدى. كوپ نارسەنى سۇراماستان، تىنىشتالىپ، ەشقايدا شىقپايتىنىمىز جايىندا ءسوزىمدى الىپ، شىعىپ كەتتى. ءبىرازدان كەيىن ورالا باستاعان گرۋپپالاستاردى تەكسەرە كەلسەك، سەرىك دەگەننەن باسقاسى وسىندا ەكەن.
جاتاقحانامىز ستۋدەنتتەردەن كورى مۇعالىمدەرگە تولىپ كەتكەندەي بولىپ كورىندى. مەنى ادەيى ىزدەپ كۋراتورىمىز كەلگەن ەكەن. ورىس ۇلتىنان بولسا دا، بولعان وقيعالاردان ماعلۇمات الىپ، تۇسىنىسپەۋشىلىك بولدى، سەن قام جەمە، جاراڭدى ەمدە،- دەپ ەڭسەمدى ءبىر كوتەرىپ كەتتى. كەشكىلىك جاتاقحاناما جان دوسىم، دانيار مارقۇم ىزدەپ كەلگەن ەكەن. ول ااسي-دا ستۋدەنت ەدى. جازعى جۇمىستاردان تاپقان قوماقتى اقشاسى دا وزىمەن كورىنەدى، گيتارامدى بىلدىرتپەي الىپ شىعىپ، تاكسيمەن تۇرعان جەرىن ايتتى. ءسويتىپ جالىنداعان جاستىقتىڭ الاۋىمەن اينابۇلاق ىقشاماۋداۋىندا تۇراتىن دانياردىڭ جەڭگەسىنىڭ تۋعان كۇنىنە تارتىپ وتىردىق. ماعان ەڭ قىزىعى الاڭدا ەكىگە بولىنگەن ميليسيونەرلەردىڭ قاي جاعىن ۇستاعان نۇرلىباي اعامىزدى كورۋ ەدى. ارينە، مەن قاتەلەسپەپپىن. ول كىسى تالاي جاستارعا قولىنان كەلگەن كومەگىن اياماعانىن ايتىپ بەردى. ەرتەسىندە ەرتەمەن تۇرىپ جۋىنىپ جاتسام، جانىما كورەەس جىگىتى (ءاتى-جونى ەسىمدە قالماپتى، كومسومولدىڭ بەلسەندىلەردىڭ ءبىرى) ، ءبىزدىڭ فيزفاكتىڭ كومسومول جەتەكشىسى ەكەۋى كەلىپ تۇرعانىن ايتتى. تەزىرەك جۋىنىپ شىعۋىمدى دا سۇرادى. تاكسي كۇتىپ تۇر ەكەن. سودان قالالىق كومسومول ۇيىمىنا دا كەلىپ جەتتىك. بيۋرو مۇشەلەرى كۇتىپ وتىر ەكەن. مەنەن تۇسىنىكتەمە جازىپ بەرۋىمدى سۇرادى. قازاق تىلىندە جازاتىنىمدى ايتىپ، اياق استىنان قىرسىعىم ۇستاپ، ەكى ساعاتتان استام ۋاقىت كۇتتىرىپ قويىپ، جازىپ بەردىم. شەشىمى كومسومول قاتارىنان شىعارىلدىم. جانىمداعى جاستاردىڭ ۇنجىرعاسى تۇسپەسىن دەگەن ويمەن، «ساسپاڭدار، قايتا كومسومول قاتارىنا الادى»،- دەپ قويامىن. مەدەت، قاھار، سەرىك، مەنىمەن قوسا بەس ادامدى كومسومول قاتارىنان شىعارعان ەكەن. قۇدايدىڭ قۇدىرەتىنىڭ مىقتىلىعى سول جەردەن قازمۋ-دىڭ كومسومول جەتەكشىسى بايانداروۆ مىرزا تاعى دا تاكسيمەن «كازگۋراد» قالاشىعىنا الىپ بارعانى. ۇلكەن زالعا ەنسەك، وڭشەڭ دەگىشتەر مەن «جەگىشتەر» ەكى جاققا ءبولىنىپ الىپ، ورتاعا السايشى-اۋ كەلىپ.

ەتىم ۇيرەنىپ تە ۇلگەرىپتى، ولاردىڭ ايتىپ جاتقاندارىنا. كەرىسىنشە، ەكىگە بولىنگەن قوعامنىڭ، قايسىسىنىڭ نە ايتقانىن باعىپ، ىشىمە ءتۇيىپ تۇردىم. قىسقاسى، كومسومولدان قالالىق بيۋرودا شىعىپ كەلگەنىممەن شارۋالارى جوق، قازمۋ كومسومولىنىڭ قاتارىنان شىعارۋ تۋرالى قاۋلىلارىن قابىلداپ، بيلەتىمدى تاپسىرۋدى سۇرادى.تاعى دا تاكسي، مەنىڭ قالتامنان ەمەس، جاتاقحاناعا كەلدىك. كوپ قينالماستان دوسىممەن ايىرباستاسقان مۇقاباسىن شەشىپ الدىم دا، بيلەتتى قولدارىنا ۇستاتىپ قويا بەردىم. وسىمەنەن بەس جىلدان استام ىشكى قالتامىزدان تۇسپەيتىن، سول كەزدەگى جاستاردىڭ «اتريبۋتىنا» اينالعان كومسومول بيلەتىمەن قوش ايتىستىم.
مەنى جەتى جىلعا سوتتاپ، جيىرما بەس "فيزفاكتفقتاردى" وقۋدان شىعارىپتى. كەيىننەن قايتا ورنالاسقاندارى بار، ءقايسىبىرى باسقا جوو ءتۇسىپ، كەيبىرى قولدارىن ءبىراق سەرمەپ الماتىدان مۇلدەم كەتىپ قالعان ەكەن. بايتال تۇرماق باس قايعى زامانانى باسىمنان وتكىزىپ، كەيىننەن، ويلاپ قاراسام تىكەلەي بولماسا دا كوپ جاستاردىڭ وبالىنا قالعانداي ەكەنمىن. تارىداي شاشىلىپ كەتكەن سول كۋرستاستارىم ەسىمە ءتۇسىپ، وتىز جىلدىق كەزدەسۋىمىزدىڭ الدىندا سولاردىڭ ءتىزىمىن وزدەرىڭىزگە ۇسىنۋدى ءجون كورىپ وتىرمىن. جەلتوقسان86-دا ءبىر فاكۋلتەتتەن وسىنشاما ادامنىڭ قۋدالاۋعا تۇسكەنىن ەستىمەگەن ەدىم، ونداي بولماعان دا ەدى. بالكىم، بىرەۋى كورشىڭىز، بىرەۋى اۋىلداسىڭىز، بىرەۋىمەن ءبىر مەكتەپتە، بولماسا، جوو قىزمەت جاساپ جۇرگەن دە بولارسىزدار؟ جەلتوقسان86-نىڭ وتىز جىلدىعىنا بايلانىستى تاۋەلسىزدىگىمىزدىڭ بەسىگى - الماتىنىڭ باس الاڭىندا، 17 جەلتوقسان كۇنى باس قوسىپ، سول الاڭدا كەلمەستىڭ كەمەسىنە وتىرىپ كەتكەندەر مەن وسى كۇنگە جەتپەگەندەردىڭ ارۋاقتارىنا قۇران باعىشتاپ، رۋحتارىنا تاعزىم ەتەتىنىمىزدى جەتكىزەرسىزدەر دەگەن ۇمىتپەن، ەستەلىك اۆتورى - قۇرمانعازى.