الماتى ارناسىنداعى «وتكىر ءتىل» باعدارلاماسىنا قوناق بولعان ازۋلى اقىن رينات زايىتوۆ وزىنە «ۇيعىر» دەپ شەتتەتكىسى كەلەتىندەرگە ادۋىندى جاۋاپ بەردى.

13 قاراشادا ەفيردەن كورسەتىلگەن سانىندا، باعدارلاما جۇرگىزۋشىسى نارتاي ارالباي ۇلى:

«ءوزىڭىزدىڭ ءتۇپ ناعاشىلارىڭىز ۇيعىر ۇلتىنان ەكەنىن، ولاردىڭ قىتايدا تۇراتىنىن جاسىرماي ايتىپ ءجۇرسىز. اتىڭىز رينات، اكەڭىزدىڭ ەسىمى رەفحات، سويىڭىز زايىت بولعان سوڭ، «رينات قازاق پا ەكەن، جوق پا ەكەن؟» دەپ كۇدىك كەلتىرىپ جاتاتىندار بار. جاقسى.كز-دە ءبىر ماقالا شىعىپتى. وركەن كەنجەبەك ەرجان ءابدىرامان دەيتىن ازاماتقا بىلاي دەپ جازىپتى: «ۇيعىر وگەي بالامىز با؟ نەگە قازاق ۇيعىرعا قىرىن قارايدى؟ رينات زايىتوۆتىڭ ۇرانىندا نە شيكىلىك بار؟» دەپ اڭداتپا جازىپتى. بۇنىڭ نە سىرى بار؟»، - دەپ سۇراق قويادى باعدارلاما قوناعىنا.

«مەن ءاۋ باستان جەتى اتامنان قازاقتىڭ تاربيەسىمەن، قازاق بولىپ وسكەن اداممىن. ەسەنقۇل جاقىپبەكوۆ جارىقتىقتىڭ شەشەسى ورىس بولدى. ءبىراق، قاشان ول ساحناعا شىعىپ قازاق پەن ورىس تاتۋ بولسىن دەدى. كىندىكتەن قاي ۇلتتان تارادى، سول ۇلتقا قىزمەت ەتۋگە بارلىعى مىندەتتى. بۇل بىرىنشىدەن. ەكىنشىدەن، قازاقستاندا تۇرىپ جاتقان ۇيعىرلاردى ءبىراز زەرتتەدىم. ولاردىڭ ءوزى ەكى توپقا بولىنەدى. قازاقيلانعانى بار، باسقاسى بار. اكەمنىڭ شەشەسى 1958 جىلى سول قىتايدا قالىپ قويعان ادام. اكەم ءتورت جاسىندا بولعاندا. مەن ول كىسىنى 2006 جىلى ءبىر رەت كوردىم قىتايعا بارعانىمدا. باسقا حات-حابارىم دا جوق. بولەك جانۇياسى بار، اكەم حابارلاسىپ تۇرادى. باسقا تۋىستار ارالاسادى.

ول ۇراننىڭ ارتىندا ەشقانداي شيكىلىك جوق. مىنانى ءتۇسىنىپ الۋىن سۇرايمىن:  جاڭاعى وركەن كەنجەبەك دەگەن وتە اقىلدى ادامدار كوپ. بۇلاردىڭ ارتىندا كىمدەر تۇرعانىن، بۇلار نە ءۇشىن ول اڭگىمەنى ايتىپ وتىرعانىن دا جاقسى بىلەمىن. ونى ايتاتىن بولسا تاعى دا قازاق ەكىگە بولىنەدى. ول شۋدىڭ اراسىندا كىم قالادى، تاعى دا رينات زايىتوۆ قالادى. وركەن كەنجەبەك بولسىن، جەلكەن كەنجەبەك بولسىن تۇگەلىنە ءبىر-اق اۋىز ءسوز ايتام. مەن قازاقستاننىڭ بالاسى ەمەسپىن. مەن قازاقتىڭ بالاسىمىن! وسى ەكەۋىن اجىراتىپ السىن، ويتكەنى مەن قازاق ۇلتىنا، قازاق ۇلتىنىڭ بولاشاعىنا تىرناقتاي ۇلەس قوسا السام مەنىڭ جەر بەتىندەگى ميسسيام اياقتالدى دەپ ەسەپتەي بەرۋگە بولادى. سوعان قانشا قاجىرىم جەتەدى، مەن سوعان قىزمەت ەتۋگە بارىمدى سالامىن.

الىپ قاشپا اڭگىمەلەر كوپ. كوپ ەستيمىن. جاقسى ادامنىڭ ارتىنان ءسوز ەرەدى. يت ۇرەدى، كوش جۇرەدى»، - دەپ جاۋاپ بەردى ايتىستىڭ وراق ءتىلدى اقىنى «وتكىر ءتىل» باعدارلاماسىنىڭ سۇراعىنا.