ول – بولمىسىنان، تابيعاتىنان اقىن ەدى. ول الدەبىرەۋلەر سەكىلدى ومىردە اقىننىڭ وبرازىن جاساعان جوق. ومىردە باسى «نوقتاعا سىيماي» اقىن بولىپ ءومىر ءسۇردى. ول باسقاشا ءومىر سۇرە الماس تا ەدى. 
ەسەنين تانىمال اقىنعا اينالعاندا ونى كورۋدى، ونىمەن تانىسىپ، جاقىن ارالاسۋدى تالاي جاس اقىن، تالاي وقىرمان ارماندادى. ەسەنينگە ەلىكتەپ، ەسەنينشە ولەڭ جازعىلارى كەلدى. ەسەنيندەي ومىرگە ەركەلەپ، ءومىر سۇرگىسى كەلدى. ءبىراق ءومىر ەشكىمدى ەركەلەتكەن ەمەس. ءتىپتى تۋمىسىنان دارىندى، ەرەكشە جاراتىلىس يەسى، ەركە، نازىك، سەزىمتال، سەنگىش، اڭعال، تاكاپپار ەسەنيندى دە. ...امەريكالىق تانىمال ءبيشى، وزىنەن ون سەگىز جاس ۇلكەن ايسەدورا دۋنكانعا ۇيلەنگەنىن بىرەۋلەر جازعىرىپ جاتتى. ءبىراق... ءوزىن ءوزى قۇتقارۋ ءۇشىن، ساقتاۋ ءۇشىن، تاعى دا ولەڭ جازۋى ءۇشىن ول سولاي ەتۋگە ءماجبۇر ەدى. تالانتىنا تۇساۋ، شابىتىنا تەجەۋ بولعان ايار دۇشپانداردان الىس كەتۋ ءۇشىن، ءبىراز ۋاقىت شەتەلگە كەتۋ ءۇشىن كەدەي اقىن بيشىگە ۇيلەنۋگە ءتيىس ەدى. ايسەدورا دۋنكان ورىس ءتىلىن وتە ناشار بىلەتىن، ءتىپتى ويىن جەتكىزىپ ايتا المايتىن، ال ەسەنين اعىلشىنشا مۇلدەم بىلمەيتىن. ەكەۋى ىممەن سويلەسىپ، ءبىرىن-بىرى ايتەۋىر تۇسىنەتىن. 
ايسەدورا تالانتتى، تاعدىرلى ءبيشى ەدى. ۇلكەن ۇلى مەن قىزى جولاپاتىنا ۇشىرايدى. ولار مىنگەن ماشينا كوپىردەن سەناعا قۇلاپ، ماشينامەن بىرگە بالالارى سۋعا باتىپ، ولەدى. اۋىر قايعىدان كوپكە دەيىن ءبيشى ءوز وزىنە كەلە المايدى. 
زامانداستارى: «العاش تانىسقان ساتتە-اق ەكەۋى ءبىرىن-بىرى بۇرىننان بىلەتىن سەكىلدى اسەر قالدىردى. ەركە، تەنتەك ەسەنين ايسەدورانىڭ تىزەسىنە باسىن قويىپ جاتتى. ايسەدورا «التىن باس» دەپ ونىڭ شاشىنان سيپاپ وتىردى» دەيدى. 
ايسەدورا دۋنكان ەسەنينگە تۇرمىسقا شىعاردا ءوزىنىڭ جاسىن جاسىرىپ، ءتىپتى پاسپورتتاعى ومىرگە كەلگەن جىلىن وزگەرتەدى. ەسەنين «ايسەدورانى وزىنەن توعىز جاس ۇلكەن» دەپ ويلايدى، ال شىن مانىندە، ايەلى وزىنەن ون سەگىز جاس ۇلكەن ەدى. 
ايسودوراعا دەيىن ەسەنين زينايدا رايح ەسىمدە اكتريسامەن نەكەدە بولدى. زينايدادان ەكى بالاسى بار. جۋرناليست، ءارى ءوزىنىڭ ادەبي كومەكشىسى گالينا بەنيسلاۆسكايامەن ايسەدورا دۋنكانعا ۇيلەنگەنشە بىرگە تۇردى. دۋنكانمەن اجىراسقاننان كەيىن گاليناعا قايتىپ كەلدى، ءبىراق ەكەۋى ۇيلەنگەن جوق. ەسەنين ومىردەن وتكەننەن كەيىن ءبىر جىلدان كەيىن گالينا اقىننىڭ بەيىتىنىڭ باسىندا ءوزىن ءوزى اتىپ، ولتىرەدى. 
ليەۆ تولستويدىڭ نەمەرەسى سوفيا – ەسەنيننىڭ سوڭعى ايەلى. سوفياعا ۇيلەنگەننەن كەيىن ءبىر جىلدان كەيىن ەسەنين وزىنە قولجۇمساپ ولەدى. ءبىراق بۇگىندە مىنەزدى اقىننىڭ وزىنە ءوزى قولجۇمساپ ولمەگەنىن، ونىڭ ولىمىنە نكۆد-نىڭ قاتىسى بارى جازىلىپ تا، ايتىلىپ تا جاتىر.

اياگۇل مانتاي