جاسىراتىنى جوق، ءقازىر «ەكىنشى ايەل بولعىم كەلەدى» دەيتىن قىزدار وتە كوپ. العاشىندا تۇسىنبەيتىنمىن، «نەگە وزدەرىڭدى ەكىنشى سورتقا جاتقىزاسىڭدار» دەپ، سويتسەم كوپ جاعدايدا ەكىنشى ايەلدىڭ كوپ جاۋاپكەرشىلىگى جوق بولادى ەكەن، ەرى كوپ بالا تاپ دەپ تە مازالامايدى ەكەن. ەسەسىنە، قىمبات سىيلىقتار كوپ سىيلانادى ەكەن. وعان جان جاعىمداعى ەكىنشى ايەل بولىپ جۇرگەن قىزداردىڭ ءومىرى كۋا.

مەن دە توقالدىققا قارسى ەدىم. ءبىراق ءقازىر ومىردە كەيبىر نارسەلەردى ۋاقىتتىڭ سۇرانىسىنا قاراي وزگەرتۋگە بولادى دەپ سانايمىن. ماسەلەن ءقازىر قوعامىمىزدا جاسى 27-28 دەن اسقان قىزدار وتە كوپ. تۇرمىس قۇرعىسى كەلمەيدى ەمەس، كەلەدى تەك شاڭىراق كوتەرەيىك دەپ سەنىمدى تۇردە ايتا الاتىندارى جوق. مەنىڭ دە جاسىم بيىل 31-گە كەلدى. تۇرمىسقا شىققىم كەلەدى.

ايتسە دە تۇرمىسقا شىعا قويارلىقتاي جىگىت جوق. جاسىڭ 27-دەن اسقان سوڭ تۇرمىسقا شىقشى دەپ بىرەۋدىڭ ۇسىنىس ايتا قويمايتىنىنا كوزىڭ دە جەتە باستايدى ەكەن. بۋحگالتەرمىن. تۇراقتى ەكى جۇمىس ورنىم بار. قوسىمشا كەيبىر ۇساق كومپانيالاردىڭ ەسەپ-قيسابىن جۇرگىزىپ بەرىپ اقشا دا تابامىن. ءبىر بولمەلى جاتاقحانام بار. ماتەريالدىق تۇرعىدا تاۋەلسىزبىز دەپ ايتا الامىن. ءبىراق سول وتىزدان اسسام دا جالعىز جۇرگەنىم جانىما باتادى. بىلتىردان بەرى جۇمىستا جاسى 46-داعى بىرگە جۇمىس ىستەيتىن قىزمەتتەس، وتباسىلى جىگىتپەن ارالاسىپ تۇرامىن. العاشىندا جاي قىزىعۋشىلىقپەن تيىسكەنمەن، سول جاسىما دەيىن قىز بولىپ جۇرگەنىمە ءسۇيسىندى اۋ دەيمىن، ارامىز سودان بەرى ۇزىلگەن ەمەس. ول تۋرالى وزىمە دە ايتقان. ءبىراق ءبىر شاڭىراق استىنا تۇراتىنداي اڭگىمە ايتپايدى. شىنى كەرەك، بىرەۋدىڭ شاڭىراعىن بۇزعىزىپ، وزىمە قوساتىن ويىم جوق. ءبىراق ارالاساتىن قۇربىلارىمنىڭ وتباسىن كورىپ، جاقىن جۋىقتى كورىپ سوڭعى كەزدەرى ەكىنشى ايەل بولساڭ دا وتباسىن بولۋدىڭ قاجەت ەكەنىن، ايەل ادام ءۇشىن ماڭىزدىلىعىن سەزىنىپ ءجۇرمىن. ءوزىم «مەنى توقال قىلىپ ال» دەپ ايتۋعا نامىستانامىن. ءبىراق شىنى كەرەك، بۇگىنگى ىستەپ جۇرگەنىم توقالدىڭ قىزمەتى ەكەنىن بىلەمىن. الدىنان تاتتىلەپ تاماعىن دايىنداپ قويامىن، اراسىندا كيىم ساتىپ اپەرەمىن. بالالى بولعىم كەلەدى. بالا ءوزىم ءۇشىن تۋعىم كەلەدى. ونى ايتىپ ءتۇسىندىردىم دە، «ەشقانداي اقشا تالاپ ەتپەيمىن، ءوزىم باعىپ قاعامىن» دەپ الدىن الا ايتتىم. جاسىرىپ كەرەگى نە، ءوزى دە گۇلىن الىپ كەلىپ تۇرادى، ارا تۇرا سىيلىق تا جاسايدى. الايدا توقال رەتىندە قابىلداعىسى جوق.
وسىندايدا ويلايمىن، توقال الۋعا نەگە رۇقسات ەتپەسكە، ەڭ بولماسا بالاما اكەسىنىڭ تەگىن الىپ بەرە الار ەدىم، ءوزىم تۋىستارىمنىڭ الدىندا جولداسىم دەپ تە تانىستىرا الار ەدىم. توقال الۋعا رۇقسات بەرۋ تالاي جانباي قالعان شىراقتىڭ جانۋىنا سەبەپ بولار ەدى. شاڭىراقتاردىڭ سەبەپسىز بۇزىلۋىنىڭ الدىن الار ەدى. سوندىقتان توقال الۋعا رۇقسات بەرسەك، قوعامداعى ءبىر ماسەلەنىڭ شەشىلگەنى بولار ەدى.
وسىندايدا ايتا كەتەر جايت قۇربىم دا بىرەۋدىڭ توقالى. جاقىندا الگى ەر ادام كولىك الىپ بەردى. ەستۋىمشە ءوز ايەلى ءالى كولىككە وتىرماعان كورىنەدى. ءوز ايەلىنەن بۇرىن توقالىنا كولىك سىيلاۋىنان-اق ونىڭ كىمدى ارتىعىراق جاقسى كورەتىنى كورىنىپ تۇر. شىنىن ايتايىق ءقازىر توقالى جوق، ەر ادام قوعامىمىزدا كەمدە كەم. تەك زاڭدى تۇردە رۇقساتتىڭ جوقتىعى ولاردى قينايتىن سياقتى. سوندىقتان توقال الۋدى زاڭداستىرساق دۇرىس بولار ەدى.

لاۋرا، قاسكەلەڭ قالاسى