وسىدان 20 كۇن بۇرىن «قامشى» پورتالى «التى ايلىق ءسابيدى اياۋسىز قۇرعان ايەل» تۋرالى ماتەريال جاريالاعان بولاتىن.  وندا، فاريزا اتتى قولدانۋشى بولىسكەن ۆيدەودا كىشكەنتاي ءسابيدى شاپالاقپەن «جاپ مىنا اۋىزدى» دەپ ساباعان ايەلدىڭ ءىسى «جۇرتتىڭ ۇرەيىن ۇشىرعان» ەدى. بۇنداي قاتىگەزدىك جاساعان بالا كۇتۋشىنىڭ وزبەكستاننان كەلگەن، كۋرمانبايەۆا ايگۋل كوجاباييەۆنا ەسىمدى ەميگرانت ەكەنى عانا بەلگىلى بولاتىن.

بۇل ماسەلەگە بايلانىستى «قامشى» ءتىلشىسى دابىل كوتەرىپ، ق ر ىشكى ىستەر مينيسترلىگىنە حابارلاسىپ، رەسمي اقپارات سۇراعان. ءىىم مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋبايەۆ: كەشە ينتەرنەت جەلىسىندە كىشكەنتاي بالانى ۇرىپ جاتقان ايەلدىڭ ۆيدەوسى جارىق كورگەن بولاتىن. سول بويىنشا ازاماتشا تۇلعاسىن انىقتاۋ جۇمىستارىن جۇرگىزىپ جاتىرمىز. وقيعانىڭ انىق-قانىعى بەلگىلى بولعاندا ماسەلەگە پروسەسسۋالدى باعا بەرىلەتىن بولادى»، - دەگەن ەدى.

بۇگىن بەلگىلى بولعانداي، پارلامەنت ءماجىلىسىنىڭ جالپى وتىرىسى بارىسىندا تىلشىلەر ساۋالىنا جاۋاپ بەرۋ كەزىندە ق ر ىشكى ىستەر ءمينيسترى قالمۇحانبەت قاسىموۆ: «قازاقستان پوليسياسى نارەستەنى اياۋسىز ۇرعان ايەلدىڭ ءىسىن وزبەكستانعا تاپسىرۋ باعىتىندا جۇمىس ىستەپ جاتقانىن» باياندادى.

 «ول وزبەكستان ازاماتشاسى، ءبىراق قىلمىستى ءبىزدىڭ ەلدە جاسادى. قازىرگى كەزدە ول ءوزىنىڭ مەملەكەتىندە. سوندىقتان دا ءبىزدىڭ قىزمەتكەرلەر كورشى ەلگە بارىپ، ۋاعدالاستىققا سايكەس تەرگەۋ جۇرگىزدى. قازىرگى كەزدە باس پروكۋراتۋرا ارقىلى قىلمىستىق ءىستىڭ ماتەريالدارىن وزبەكستانعا تاپسىرۋ تۋرالى ماسەلەنى شەشۋدەمىز»،-دەپ ءتۇسىندىردى قاسىموۆ.